AZƏRBAYCAN RESPUBLİKASININ ƏDLİYYƏ NAZİRLİYİ KOLLEGİYA QƏRARI № 3-16/1-KQ/8/2025 Bakı şəhəri 28 noyabr 2025-ci il "Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydası"nın təsdiq edilməsi haqqında "Xüsusi icra məmurları haqqında" Azərbaycan Respublikasının 2025-ci il 14 iyul tarixli 248-VIIQ nömrəli Qanununun tətbiqi və bununla əlaqədar Azərbaycan Respublikası Prezidentinin bəzi fərmanlarında və Sərəncamında dəyişiklik edilməsi barədə" Azərbaycan Respublikası Prezidentinin 2025-ci il 13 avqust tarixli 478 nömrəli Fərmanının 3.1.1.1-ci abzasının icrasını təmin etmək məqsədilə Azərbaycan Respublikası Prezidentinin 2006-cı il 18 aprel tarixli 391 nömrəli Fərmanı ilə təsdiq edilmiş "Azərbaycan Respublikasının Ədliyyə Nazirliyi haqqında Əsasnamə"nin 19-cu hissəsini rəhbər tutaraq, Kollegiya QƏRARA ALIR:
1. "Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydası" təsdiq edilsin (əlavə olunur).
2. Bu Qərarın Azərbaycan Respublikasının Hüquqi Aktların Dövlət Reyestrinə daxil edilməsi təmin olunsun (E. Nəsibov).
3. Bu Qərar Azərbaycan Respublikasının Hüquqi Aktların Dövlət Reyestrinə daxil edildikdən sonra 72 saat müddətində rəsmi dərc edilməsi üçün zəruri tədbirlər görülsün (L. Hüseynzadə).
4. Nazirliyin Sənəd dövriyyəsi və vətəndaşların müraciətləri ilə iş idarəsi bu qərarla bağlı məlumatlandırmanı həyata keçirsin.
5. Bu Qərarın 1-ci hissəsi 2026-cı il yanvarın 1-dən qüvvəyə minir.
Kollegiyanın sədri, Nazir III dərəcəli dövlət ədliyyə müşaviri Fərid Əhmədov
Azərbaycan Respublikası Ədliyyə Nazirliyinin Kollegiyasının 2025-ci il 28 noyabr tarixli 3-16/1-KQ/8/2025 nömrəli qərarı ilə təsdiq edilmişdir. Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma Qaydası
1. Ümumi müddəalar
1.1. Bu Qayda "Xüsusi icra məmurları haqqında" Azərbaycan Respublikasının Qanununun (bundan sonar — Qanun) 8.2-ci maddəsinə əsasən hazırlanmışdır və xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydasını müəyyən edir.
1.2. Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılması Qanunun 9.1-ci maddəsinə uyğun olaraq yaradılmış Müsabiqə Komissiyası tərəfindən həyata keçirilir.
2. Müsabiqənin elan edilməsi və müraciətlərin qəbulu
2.1. Xüsusi icra məmuru vəzifəsi üçün vakansiyalar olduqda müraciət etmək üçün son müddət göstərilməklə Azərbaycan Respublikasının Ədliyyə Nazirliyinin, Xüsusi İcra Məmurlarının Palatasının rəsmi internet səhifələrində və digər mediada elan verilir.
2.2. Xüsusi icra məmuru vəzifəsinə qəbul olunmaq arzusunda olan və Qanunun 7-ci maddəsinə uyğun olaraq xüsusi icra məmuruna dair tələblərə cavab verən şəxslər müsabiqədə iştirak etmək üçün bu Qaydanın 1 nömrəli əlavəsinə uyğun tərtib edilmiş formada (elektron və ya kağız daşıyıcılar vasitəsilə) Müsabiqə Komissiyasına müraciət edirlər.
2.3. Müsabiqənin test imtahanı (bundan sonra — imtahan) mərhələsindən müvəffəqiyyətlə keçən və müsahibədə iştirak etmək istəyən şəxslər bu Qaydanın 2 nömrəli əlavəsinə uyğun tərtib edilmiş ərizə ilə birlikdə aşağıdakı sənədləri 15 iş günü ərzində Müsabiqə Komissiyasına təqdim etməlidir:
2.3.1. şəxsiyyət vəsiqəsinin Elektron Hökumət İnformasiya Sistemi üzərindən əldə edilmiş surəti;
2.3.2. kadrların uçotunun şəxsi vərəqəsi;
2.3.3. tərcümeyi-hal;
2.3.4. ali təhsil haqqında dövlət sənədinin (diplomun) notariat qaydasında təsdiq olunmuş surəti (xarici ölkədə təhsil almış namizədin ali təhsil haqqında dövlət sənədinə (diplomuna) müvafiq xarici dövlətin ali təhsilə aid kvalifikasiyasının peşə tanınması barədə şəhadətnamənin surəti əlavə olunur);
2.3.5. ilk dəfə əmək fəaliyyətinə başlayanlar istisna olmaqla, Azərbaycan Respublikası Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sisteminin "Əmək və məşğulluq" altsistemindən əmək müqavilələrinə dair çıxarış,
Azərbaycan Respublikası Əmək Məcəlləsinin 7-ci maddəsinin 2-1-ci hissəsi ilə müəyyən edilmiş hallarda, eləcə də 2014-cü il iyulun 1-dək xitam verilmiş əmək müqavilələrinə münasibətdə isə əmək kitabçasının notariat qaydasında və ya işəgötürən tərəfindən təsdiq edilmiş surəti;
2.3.6. sağlamlıq barədə tibbi arayış;
2.3.7. hərbi biletin notariat qaydasında təsdiq edilmiş surəti, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin yerli qurumundan həqiqi hərbi xidmət keçmə və qeydiyyat haqqında, müddətli həqiqi hərbi xidmətə çağırışdan möhlət hüququ vardırsa və ya azad edilmişdirsə müvafiq təsdiqedici sənəd;
2.3.8. 4x6 sm ölçüdə 4 ədəd, 3x4 sm ölçüdə 2 ədəd rəngli fotoşəkil.
2.4. Müsahibədə iştirak etmək üçün tələb olunan sənədlərin Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər namizəddən tələb edilmir. Belə sənədlərin Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi namizədin razılığı ilə sorğu əsasında müvafiq dövlət orqanından (qurumundan) tələb olunur və ya namizəd tərəfindən təmin edilir.
2.5. Müraciət edən şəxs özünü xarakterizə edən başqa sənədləri də təqdim edə bilər.
3. Müraciətlərə baxılması qaydası
3.1. Bu Qaydanın 2.2-ci bəndinə uyğun olaraq müraciət etmiş namizədlər ümumi siyahıya salınır və hər bir namizədə müsabiqə və onun keçirilməsi ilə bağlı məlumatları özündə əks etdirən "Yaddaş kitabçası" verilir.
3.2. Anonimliyin təmin edilməsi məqsədilə siyahıya salınmış hər bir namizədə rəqəmlərlə ifadə olunan şəxsi eyniləşdirmə kodu verilir. İmtahanda yalnız şəxsi eyniləşdirmə kodundan istifadə olunur.
3.3. İmtahana azı 2 gün qalmış hər bir namizədə onun fotoşəkli olan buraxılış vərəqəsi verilir. İmtahanın keçiriləcəyi barədə elanda buraxılış vərəqəsinin veriləcəyi tarixə dair məlumat göstərilməlidir.
3.4. Buraxılış vərəqəsində namizədin şəxsi eyniləşdirmə kodu, imtahanın keçirildiyi ünvan, tarix, saat, auditoriya, auditoriyada sıra və yer nömrəsi göstərilir.
3.5. İmtahandan müvəffəqiyyətlə keçən və müsahibədə iştirak etmək istəyən şəxslərin təqdim etdiyi sənədlərin tamlığı, onların namizədin ərizəsində əks olunan məlumatlara uyğunluğu müəyyən edildikdən sonra ərizələrin qeydiyyatı aparılır.
3.6. Natamam və ya bu Qaydaya uyğun olmayan sənədlər qəbul edilmir. Sənədlərdə sonradan çatışmazlıqlar aşkar edildikdə isə bu barədə namizədə sənədlərin təqdim edildiyi gündən 5 iş günü müddətində bildirilir. Çatışmazlıqlar aradan qaldırıldıqdan sonra sənədlər onların qəbulu üçün müəyyən edilmiş müddət çərçivəsində yenidən təqdim oluna bilər.
3.7. Sənədlər onların qəbulu üçün müəyyən edilmiş müddətin bitməsinə 5 iş günü və daha az müddət qalmış təqdim edildikdə aşkar olunmuş çatışmazlıqlar barədə namizədə məlumat verildiyi gündən 5 iş günü ərzində çatışmazlıqlar aradan qaldırılmalıdır.
3.8. Bu Qaydanın 3.7-ci bəndi nəzərə alınmaqla, sənədlərin qəbulu müddəti başa çatdıqdan sonra təqdim olunan sənədlər (göstərilən müddət ərzində poçta verilmiş sənədlər istisna olmaqla) qəbul edilmir.
3.9. Təqdim edilmiş sənədlər Müsabiqə Komissiyası tərəfindən yoxlanılır və yoxlamanın nəticəsinə uyğun olaraq namizədlər müsahibəyə buraxılır.
"Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydası"na Əlavə № 1 Azərbaycan Respublikası vətəndaşının xüsusi icra məmuru vəzifəsinə qəbulla bağlı müsabiqədə iştirak etməsi üçün müraciətinin forması
"Xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydası"na Əlavə № 2 Müsabiqə Komissiyasının sədri ______________________________________ ______________________________________ ______________________________________ ______________________________________ ünvanda yaşayan ______________________________________ (soyadı, adı, atasının adı) _____________________________ tərəfindən ƏRİZƏ Azərbaycan Respublikasının xüsusi icra məmuru vəzifəsinə qəbul olunmaq üçün müsahibəyə buraxılmağımı xahiş edirəm. ___________________________________________________________________________ doğulmuşam. (gün, ay, il, doğulduğu yer) Ali _________________təhsilə malikəm, ____________________________________________________ (hansı) ___________________________________________________________________________ ___________________________________________________________________________ (hansı ali təhsil müəssisəsini, nə vaxt, hansı ixtisas üzrə bitirmişdir, diplomun seriyası və nömrəsi) Hazırda_________________________________________________________________________________ (işlədiyi idarənin adı və tutduğu vəzifə) ___________________________________________________________________işləyirəm. Əlavə bildirirəm ki, Azərbaycan Respublikasının vətəndaşıyam, qanunvericiliklə xüsusi icra məmuru kimi fəaliyyət göstərməyimə mane olan hallar yoxdur. Xüsusi icra məmuru vəzifəsinə qəbul olacağım halda heç bir seçkili və ya digər təyinatlı vəzifələr tutmamağı, elmi, pedaqoji və yaradıcılıq fəaliyyətindən başqa heç bir sahibkarlıq, kommersiya və digər ödənişli fəaliyyətlə, həmçinin siyasi fəaliyyətlə məşğul olmamağı, siyasi partiyaya üzv olmamağı öhdəmə götürürəm. Xarici dilləri (_______________________________) bilirəm (bilmirəm), kompüter biliklərinə (hansıları) (üstündən xətt çəkilməli) malikəm (malik deyiləm). (üstündən xətt çəkilməli) İmza ____________________ "_____" __________ 20___ il (tarix)