AZƏRBAYCAN RESPUBLİKASININ ƏDLİYYƏ NAZİRLİYİ KOLLEGİYA QƏRARI № 3-16/1-KQ/11/2025 Bakı şəhəri 28 noyabr 2025-ci il Xüsusi İcra Məmurlarının İntizam Komissiyasının Tərkibi və Əsasnaməsinin təsdiq edilməsi haqqında "Xüsusi icra məmurları haqqında" Azərbaycan Respublikasının 2025-ci il 14 iyul tarixli 248-VIIQ nömrəli Qanununun tətbiqi və bununla əlaqədar Azərbaycan Respublikası Prezidentinin bəzi fərmanlarında və Sərəncamında dəyişiklik edilməsi barədə" Azərbaycan Respublikası Prezidentinin 2025-ci il 13 avqust tarixli 478 nömrəli Fərmanının 3.1.1.7-ci abzasının icrasını təmin etmək məqsədilə Azərbaycan Respublikası Prezidentinin 2006-cı il 18 aprel tarixli 391 nömrəli Fərmanı ilə təsdiq edilmiş "Azərbaycan Respublikasının Ədliyyə Nazirliyi haqqında Əsasnamə"nin 19-cu hissəsini rəhbər tutaraq, Kollegiya QƏRARA ALIR:
1. "Xüsusi İcra Məmurlarının İntizam Komissiyasının Əsasnaməsi" təsdiq edilsin (əlavə olunur).
2. "Xüsusi İcra Məmurlarının İntizam Komissiyasının Tərkibi" təsdiq edilsin (əlavə olunur).
3. Bu Qərarın Azərbaycan Respublikasının Hüquqi Aktların Dövlət Reyestrinə daxil edilməsi təmin olunsun (E. Nəsibov).
4. Bu Qərar Azərbaycan Respublikasının Hüquqi Aktların Dövlət Reyestrinə daxil edildikdən sonra 72 saat müddətində rəsmi dərc edilməsi üçün zəruri tədbirlər görülsün (L. Hüseynzadə).
5. Nazirliyin Sənəd dövriyyəsi və vətəndaşların müraciətləri ilə iş idarəsi bu qərarla bağlı məlumatlandırmanı həyata keçirsin.
6. Bu Qərarın 1 və 2-ci hissələri 2026-cı ilin yanvarın 1-dən qüvvəyə minir.
Kollegiyanın sədri, Nazir III dərəcəli dövlət ədliyyə müşaviri Fərid Əhmədov
Azərbaycan Respublikası Ədliyyə Nazirliyinin Kollegiyasının 2025-ci il 28 noyabr tarixli 3-16/1-KQ/11/2025 nömrəli qərarı ilə təsdiq edilmişdir. Xüsusi İcra Məmurlarının İntizam Komissiyasının Əsasnaməsi
1. Ümumi müddəalar
1.1. Bu Əsasnamə "Xüsusi icra məmurları haqqında" Azərbaycan Respublikasının Qanununun 32.1-ci maddəsinə uyğun olaraq hazırlanmışdır və Xüsusi İcra Məmurlarının İntizam Komissiyasının (bundan sonra — Komissiya) səlahiyyətlərini və fəaliyyət qaydasını müəyyən edir.
1.2. Komissiya öz fəaliyyətini qanunçuluq, kollegiallıq, qərəzsizlik və obyektivlik prinsipləri əsasında qurur.
1.3. Komissiya öz fəaliyyətində Azərbaycan Respublikasının Konstitusiyasını, Azərbaycan Respublikasının qanunlarını, Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını, bu Əsasnaməni və digər hüquqi aktları rəhbər tutur.
1.4. Komissiyanın üzərində adı həkk olunmuş blankı vardır.
1.5. Komissiya ictimai əsaslarla fəaliyyət göstərir.
2. Komissiyanın səlahiyyətləri
2.1. Komissiyanın aşağıdakı səlahiyyətləri vardır:
2.1.1. xüsusi icra məmurunun fəaliyyətində intizam pozuntusunun əlamətləri aşkar edildikdə Azərbaycan Respublikası Ədliyyə Nazirliyinin (bundan sonra — Nazirlik) və ya Xüsusi İcra Məmurlarının Palatasının (bundan sonra — Palata) təqdimatı əsasında intizam icraatına başlamaq və həmin icraatı aparmaq;
2.1.2. intizam icraatına başlanılmasına dair təqdimatda göstərilən faktları aydınlaşdırmaq və təqdim edilmiş materialları tədqiq etmək;
2.1.3. intizam icraatına başlanılmasına dair təqdimatda göstərilən faktları aydınlaşdırmaq üçün zəruri olan məlumatlar və sənədlərin alınması üçün dövlət orqanlarına, hüquqi və fiziki şəxslərə müraciət etmək;
2.1.4. intizam icraatına başlanılmasına dair təqdimatda göstərilən faktları aydınlaşdırmaq üçün xüsusi icra məmurundan yazılı izahat və sübutlar tələb etmək;
2.1.5. öz təşəbbüsü və ya intizam məsuliyyəti məsələsinə baxılan xüsusi icra məmurunun təklifi əsasında digər şəxsləri iclasa dəvət etmək, onları dinləmək;
2.1.6. intizam icraatının predmetini təşkil edən məsələnin davam edən məhkəmə icraatının predmeti olması aşkar edildikdə, məhkəmə qərarı qanuni qüvvəyə minənədək intizam icraatını dayandırmaq;
2.1.7. intizam icraatının nəticələri üzrə əsaslandırılmış qərar qəbul etmək.
3. Komissiya üzvlərinin vəzifələri
3.1. Komissiya üzvləri aşağıda qeyd edilən vəzifələri daşıyır:
3.1.1. barəsində intizam icraatı aparılan xüsusi icra məmuru və ya onun nümayəndəsi ilə yaxın qohumluq və ya şəxsi münasibətdə olduqda, yaxud iclasda baxılan məsələ Komissiyanın üzvünün şəxsi maraqlarına toxunduqda, habelə obyektivliyinə və qərəzliliyinə təsir göstərə biləcək digər hallarda özü-özünə etiraz etmək;
3.1.2. intizam icraatı üzrə tam, hərtərəfli və obyektiv araşdırma aparmaq;
3.1.3. Komissiyanın fəaliyyətinə və qərəzsizliyinə xələl gətirə biləcək hərəkətlərə yol verməmək, obyektiv və ədalətli mövqe nümayiş etdirmək, malik olduğu hüquqlardan vicdanla istifadə etmək;
3.1.5. Komissiyanın qərarları üzrə səsvermədə iştirak etmək;
3.1.6. Komissiyanın qərarlarını imzalamaq;
3.1.7. Komissiyanın iclaslarını üzrsüz səbəblərdən buraxmamaq;
3.1.8. intizam icraatı üzrə əldə etdiyi məlumatların konfidensiallığını təmin etmək;
3.1.9. Komssiyanın fəaliyyəti ilə bağlı digər vəzifələri yerinə yetirmək.
4. Komissiya üzvlərinin hüquqları
4.1. Komissiya üzvləri aşağıda qeyd edilən hüquqlara malikdir:
4.1.1. intizam icraatı üzrə aparılan araşdırılmada iştirak etmək;
4.1.2. intizam icraatına başlanılmasına dair təqdimatın və intizam icraatı üzrə digər sənədlərin surətini əldə etmək;
4.1.3. intizam icraatı ilə bağlı təqdim edilmiş materiallarla tanış olmaq, onlardan çıxarışlar etmək;
4.1.4. Komissiyanın iclasının tarixi, vaxtı və yeri barədə əvvəlcədən məlumatlandırılmaq;
4.1.5. barəsində intizam icraatı aparılan xüsusi icra məmuruna və ya xüsusi icra məmuru nümayəndə vasitəsi ilə təmsil olunduqda nümayəndəsinə suallar vermək, zəruri sənəd və digər materialların tələb edilməsi barədə təklif vermək, baxılan məsələlər üzrə öz mülahizələrini təqdim etmək;
4.1.6. Komissiyanın iclas protokolları və digər sənədləri ilə tanış olmaq;
4.1.7. Komissiyanın iclasında qəbul olunması təklif edilən qərarlara dair fikirlər bildirmək;
4.1.8. Komissiyanın qərarı ilə razı olmadıqda və ya həmin qərarla bağlı xüsusi rəyi olduqda yazılı şəkildə rəy bildirmək;
4.1.9. qanunla nəzərdə tutulmuş digər hüquqları həyata keçirmək.
5. Komissiyanın tərkibi
5.1. "Xüsusi icra məmurları haqqında" Azərbaycan Respublikası Qanununun 32.1-ci maddəsinə əsasən Komissiya 9 (doqquz) üzvdən ibarət tərkibdə fəaliyyət göstərir. Komissiyanın 3 (üç) üzvü Nazirlik, 3 (üç) üzvü Palata və 1 (bir) üzvü Notariat Palatası tərəfindən təyin edilən nümayəndədən, 1 (bir) üzvü Məhkəmə Hüquq Şurası tərəfindən təyin edilmiş hakim və 1 (bir) üzvü isə Vəkillər Kollegiyası tərəfindən təyin edilmiş vəkildən ibarət tərkibdə formalaşdırılır.
5.2. Nazirlik, Palata və Notariat Palatası öz nümayəndələrini ali hüquq təhsilinə və hüquqşünas ixtisası üzrə beş ildən artıq iş stajına malik olan şəxslər sırasından, Məhkəmə Hüquq Şurası və Vəkillər Kollegiyası isə öz nümayəndəsini beş ildən artıq iş stajına malik olan hakimlər və vəkillər sırasından təyin edirlər.
5.3. Həmin qurumlar tərəfindən ehtiyat üzvlər də müəyyən olunur.
5.4. Komissiyanın fərdi tərkibi Nazirlik tərəfindən təsdiq edilir.
5.5. Komissiyanın səlahiyyət müddəti 3 (üç) ildir. 3 (üç) ildən sonra Komissiyanın üzvlərinin azı üçdə bir hissəsinin aşağıdakı ardıcıllıq və qayda ilə rotasiyası həyata keçirilir:
5.5.1. Nazirlik və Palata tərəfindən təyin edilən üzvlərdən hər 3 (üç) ildən bir azı 1 (bir) üzv yenisi ilə əvəz edilir .
5.5.2. Notariat Palatası, Məhkəmə-Hüquq Şurası və Vəkillər Kollegiyası tərəfindən təyin edilən üzvlər arasından Komissiyanın müəyyən etdiyi ardıcıllıqla hər 3 (üç) ildən bir azı 1 (bir) üzv yenisi ilə əvəz edilir.
6. Komissiyanın fəaliyyətinin təşkili
6.1. Nazirliyin və ya Palatanın təqdimatı daxil olduğu vaxtdan 20 (iyirmi) iş günündən gec olmayaraq xüsusi icra məmurunun intizam məsuliyyəti məsələsi ilə bağlı Komissiyanın iclası keçirilir.
6.2. Komissiyanın iclasına ən geci 3 (üç) iş günü qalmış intizam məsuliyyəti məsələsinə baxılan xüsusi icra məmuruna, təqdimat vermiş quruma və Komissiyanın üzvlərinə iclasın tarixi, vaxtı və yeri barədə məlumat verilir.
6.3. Komissiyanın iclası onun azı 6 (altı) üzvü iştirak etdikdə səlahiyyətlidir.
6.4. Komissiyanın üzvləri iclasda iştirak edə bilmədiyi təqdirdə, iclasda baxılacaq məsələlər barədə əsaslandırılmış rəylərini və birbaşa iştiraklarının qeyri-mümkünlüyünün səbəblərinə dair məlumatı iclasın keçirilməsindən əvvəl Komissiyaya təqdim etməlidirlər.
6.5. Komissiyanın iclasına Komissiyanın üzvlərindən başqa müstəqil ekspertlər, mütəxəssislər və digər şəxslər dəvət oluna bilərlər.
6.6. Komissiyanın iclasları protokollaşdırılır. Protokol Komissiyanın sədri və iclasın katibi tərəfindən imzalanır.
6.7. Komissiya öz qərarlarını sadə səs çoxluğu ilə qəbul edir. Səslər bərabər olduqda Komissiya sədrinin səsi həlledicidir. Səsvermə zamanı üzvlərin bitərəf qalmasına yol verilmir.
6.8. Qərarlar iclasda iştirak etmiş bütün Komissiya üzvləri tərəfindən imzalanır.
Komissiyanın qərarı ilə razı olmayan və ya həmin qərarla bağlı xüsusi rəyi olan Komissiyanın üzvü rəyini yazılı şəkildə bildirə bilər. Xüsusi rəy açıqlanmır və işə əlavə olunur.
6.9. Komissiyanın qərarından məhkəməyə şikayət edilə bilər.
6.10. Komissiyanın işinə sədr rəhbərlik edir.
6.11. Komissiyanın sədri Komissiyanın birinci iclasında Komissiya üzvlərinin arasından sadə səs çoxluğu ilə seçilir.
6.12. Komissiyanın sədri:
6.12.1. Komissiyanın fəaliyyətini təşkil edir və ona rəhbərliyi həyata keçirir;
6.12.2. Komissiyanın iclaslarına sədrlik edir;
6.12.3. Komissiyanın qərarlarını, habelə Komissiyanın fəaliyyəti ilə bağlı digər sənədləri, o cümlədən Komissiyanın iclas protokollarını imzalayır;
6.12.4. öz təşəbbüsü ilə, habelə Komissiyanın üzvünün müraciəti əsasında müstəqil ekspertlərin və mütəxəssislərin, habelə öz təşəbbüsü və ya Komissiyanın üzvünün müraciəti əsasında, yaxud intizam məsuliyyəti məsələsinə baxılan xüsusi icra məmurunun təklifi əsasında digər şəxslərin Komissiyanın iclaslarına dəvət olunması ilə bağlı qərar qəbul edir.
6.12.5. barəsində intizam icraatı aparılan xüsusi icra məmurunun və ya onun nümayəndəsinin Komissiya üzvlərinə dair etirazını qəbul və ya rədd edir;
6.12.6. Komissiyanın iclaslarının nəticələrinə dair əsaslandırılmış qərarın surətinin aidiyyəti üzrə göndərilməsini təşkil edir;
6.12.7. Komissiyanın fəaliyyətinin təşkili ilə bağlı digər işlər görür.
6.13. Komissiyanın sədri müvəqqəti olmadıqda, onun səlahiyyətlərini Komissiyanın qərarı əsasında Komissiyanın üzvlərindən biri həyata keçirir.
6.14. Komissiyanın üzvlərinin səlahiyyətlərinə aşağıdakı hallarda vaxtından əvvəl xitam verilir:
6.14.1. öz arzusu ilə Komissiyanın üzvlüyündən çıxmaq barədə yazılı ərizə verildikdə;
6.14.2. nümayəndəsi olduğu qurumda fəaliyyətinə xitam verildikdə;
6.14.3. barəsində cinayət işinə bəraətverici əsaslar olmadan xitam verildikdə, habelə məhkəmənin qanuni qüvvəyə minmiş ittiham hökmü və ya tibbi xarakterli məcburi tədbirlərin tətbiqinə dair qanuni qüvvəyə minmiş qərarı olduqda;
6.14.4. Komissiyanın nüfuzuna xələl gətirə biləcək hərəkətlərə yol verdikdə;
6.14.5. üzrsüz səbəbdən ardıcıl üç dəfə və ya il ərzində altı dəfə Komissiyanın iclaslarında iştirak etmədikdə;
6.14.6. fəaliyyət qabiliyyətsizliyi və ya məhdud fəaliyyət qabiliyyəti məhkəmənin qanuni qüvvəyə minmiş qərarı ilə təsdiq edildikdə;
6.14.7. vəfat etdikdə, yaxud məhkəmə tərəfindən ölmüş və ya xəbərsiz itkin düşmüş elan edildikdə;
6.14.8. bu Əsasnamə ilə müəyyən edilmiş vəzifələrini yerinə yetirmədikdə.
6.15. Komissiyanın üzvlərinin səlahiyyətinə nümayəndəsi olduğu qurum tərəfindən öz təşəbbüsü ilə və ya Komissiyanın müraciətinə əsasən xitam verilir.
6.16. Komissiyanın səlahiyyətlərinə vaxtından əvvəl xitam verilmiş üzvünün əvəzinə nümayəndəliyi irəli sürülmüş qurum tərəfindən ehtiyat üzv təyin edilir. Əvəz edilmiş üzvün səlahiyyət müddəti əvəz etdiyi üzvün səlahiyyət müddətinin bitdiyi vaxt başa çatır. 6.17. Komissiyanın fəaliyyətinin təşkili üzrə katiblik funksiyaları Nazirliyin İnsan resursları idarəsi tərəfindən həyata keçirilir.
6.18. Komissiyanın katibliyi aşağıdakı funksiyaları həyata keçirir:
6.18.1. Komissiyanın fəaliyyətinin təşkili ilə bağlı Komissiyanın sədrinin tapşırıqlarını icra edir;
6.18.2. Komissiyanın iclaslarının gündəliyini hazırlayır və təsdiq olunması üçün Komissiyanın sədrinə təqdim edir;
6.18.3. Nazirliyin və ya Palatanın təqdimatını Komissiyasının iclasından ən geci 5 (beş) iş günü əvvəl Komissiyanın üzvlərinə verir, habelə intizam məsuliyyəti məsələsinə baxılan xüsusi icra məmuruna alınmasını təsdiq edən istənilən vasitə ilə məlumat göndərir;
6.18.4. Komissiyanın iclaslarının tarixi, vaxtı və yeri, habelə gündəliyə daxil edilmiş məsələlər barədə iclasa azı 3 (üç) iş günü qalmış intizam məsuliyyəti məsələsinə baxılan xüsusi icra məmuruna, təqdimat vermiş quruma və Komissiyanın üzvlərinə yazılı (elektron) məlumat verir;
6.18.5. Komissiyanın sədrinin tapşırığı ilə müstəqil ekspertləri, mütəxəssisləri və digər şəxsləri Komissiyanın iclaslarına dəvət edir;
6.18.6. Komissiyanın iclaslarını protokollaşdırır və intizam icraatının yekununa dair əsaslandırılmış qərarı imzalanması üçün Komissiyanın sədrinə və üzvlərinə təqdim edir;
6.18.7. Komissiyanın qərarının nəticə hissəsi elan edildikdən 3 (üç) iş günü müddətində Komissiyanın əsaslandırılmış qərarının surətini intizam məsuliyyəti məsələsinə baxılan xüsusi icra məmuruna, Nazirliyə və Palataya göndərir.
6.18.8. Komissiyanın iclaslarında imzalanmış sənədlərin uçotunu aparır və onların saxlanılmasını təmin edir;
6.18.9. Komissiyanın fəaliyyətinin təşkili ilə bağlı digər işləri həyata keçirir.
Azərbaycan Respublikası Ədliyyə Nazirliyinin Kollegiyasının 2025-ci il 28 noyabr tarixli 3-16/1-KQ/11/2025 nömrəli qərarı ilə təsdiq edilmişdir. Xüsusi İcra Məmurlarının İntizam Komissiyasının Tərkibi
1. Toğrul Hüseynov Azərbaycan Respublikası ədliyyə nazirinin müavini
2. Səkinə Əliyeva Azərbaycan Respublikası Ədliyyə Nazirliyinin Qanunvericilik baş idarəsinin rəis müavini
3. Fəqan Şabanov Azərbaycan Respublikası Ədliyyə Nazirliyinin İcra xidmətinin rəis müavini
4. Seymur Səfərov Azərbaycan Respublikası Ədliyyə Nazirliyinin İnsan resursları idarəsinin rəis müavini
5. Pərviz Əliyev Azərbaycan Respublikası Ədliyyə Nazirliyinin İcra xidmətinin Hüquqi şəxslər və inzibati orqanlarla iş şöbəsinin rəisi
6. Hüseyn Məmmədov Azərbaycan Respublikası Ədliyyə Nazirliyinin Strateji planlaşdırma və monitorinq baş idarəsinin qrup rəhbəri (regional ədliyyə idarələri üzrə)
7. Tufan Məmmədov Bakı şəhəri 48 saylı notariat ofisinin xüsusi notariusu
8. Cavid Alıyev Vəkillərin İntizam Komissiyasının sədri
9. Rəna Qafarova Bakı şəhəri Səbail Rayon Məhkəməsinin hakimi