Azərbaycan Respublikası Nazirlər Kabinetinin 2025-ci il " 21 " oktyabr tarixli 310 nömrəli Qərarına Dərman vasitələrinə əlçatanlığın artırılması və maliyyə risklərinin bölüşdürülməsi haqqında müqavilənin nümunəvi forması və bağlanılması QAYDASI
1. Ümumi müddəalar
1.1. Bu Qayda "Tibbi sığorta haqqında" Azərbaycan Respublikası Qanununun 15-23-2.3-cü maddəsinə əsasən hazırlanmışdır və dərman vasitələrinə əlçatanlığın artırılması və maliyyə risklərinin bölüşdürülməsi haqqında müqavilənin (bundan sonra — Müqavilə) nümunəvi forması və bağlanılması qaydasını müəyyən edir.
1.2. Bu Qayda sığortaolunanların ambulator və stasionar şəraitdə istifadə olunan dərman vasitələrinə əlçatanlığının artırılması və icbari tibbi sığorta fondunun maliyyə sabitliyinin təmin olunması üçün İcbari Tibbi Sığorta üzrə Dövlət Agentliyi (bundan sonra — Agentlik) ilə dərman vasitəsinin dövlət qeydiyyatı haqqında vəsiqə sahibi (bundan sonra — vəsiqə sahibi) arasındakı münasibətləri tənzimləyir.
1.3. Müqavilədə icbari tibbi sığorta fondunun vəsaiti hesabına maliyyələşdirilən dərman vasitəsinin proqnozlaşdırılan istifadə həcmi müqabilində vəsiqə sahibi tərəfindən endirimlərin tətbiq edilməsi, icbari tibbi sığorta fondunun vəsaiti hesabına maliyyələşdirilən dərman vasitəsinin klinik tədqiqatlar üzrə məlumatlarına uyğun proqnozlaşdırılan effektivliyinə nail olunmadıqda dərman vasitəsinə görə ödənilən vəsaitin Müqavilə ilə razılaşdırılmış hissəsinin vəsiqə sahibi tərəfindən Agentliyə geri qaytarılması, geri qaytarılan vəsaitlərin hesablanması şərtləri, həmçinin tərəflərin hüquq və vəzifələri müəyyən edilir.
2. Müqavilənin bağlanılması qaydası
2.1. Dərman vasitələrinə əlçatanlığın artırılması və icbari tibbi sığorta fondunun maliyyə sabitliyinin təmin olunması ilə bağlı münasibətlər Agentlik ilə vəsiqə sahibi (bundan sonra — Tərəflər) arasında bağlanılmış və bu Qaydanın əlavəsinə uyğun tərtib edilmiş müqavilə əsasında tənzimlənir.
2.2. Müqavilə Agentliyin təşəbbüsü və ya vəsiqə sahibinin Agentliyə müraciəti əsasında bağlanılır.
2.3. Müqavilə Tərəflərin qarşılıqlı razılığı ilə müəyyənləşdirilmiş müddətə bağlanılır.
2.4. Vəsiqə sahibi ambulator şəraitdə buraxılan dərman vasitələrinə münasibətdə Müqavilənin bağlanılması üçün Agentliyə ərizə ilə müraciət edir.
2.5. Ərizəyə aşağıdakı sənədlər əlavə edilir:
2.5.1. ərizəçi rezident hüquqi şəxs olduqda hüquqi şəxslərin dövlət reyestrindən çıxarışının surəti, ərizəçi xarici hüquqi şəxs olduqda onun rezidenti olduğu ölkədə qeydiyyatdan keçdiyini təsdiq edən sənədin surəti;
2.5.2. dərman vasitəsinin dövlət qeydiyyatı haqqında vəsiqəsinin surəti;
2.5.3. dərman vasitəsinin istehsal olunduğu ölkədə təsdiq edilmiş dərman vasitəsinin qısa xarakteristikasının və Azərbaycan Respublikasının Səhiyyə Nazirliyi tərəfindən təsdiq edilmiş istifadə təlimatının surəti.
2.6. Bu Qaydanın 2.5-ci bəndinə uyğun olaraq tələb olunan sənədlərin Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər ərizəçidən tələb edilmir. Belə sənədlərin Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi ərizəçinin razılığı ilə sorğu əsasında müvafiq dövlət orqanından (qurumundan) tələb olunur və ya ərizəçi tərəfindən təmin edilir.
2.7. Ərizə və ona əlavə edilmiş sənədlər Agentlik tərəfindən qəbul edilir, həmin gün qeydiyyata alınır və bu Qaydanın 2.5-ci bəndinin tələblərinə uyğunluğu yoxlanılır.
2.8. Agentlik sənədlərə ərizənin qeydiyyata alındığı tarixdən 5 (beş) iş günü ərzində baxaraq vəsiqə sahibinə bu Qaydanın əlavəsindəki formaya uyğun 2 (iki) nüsxədə tərtib edilməklə hazırlanmış müqaviləni bağlamaq və ya bu Qaydanın 2.5-ci bəndində sənədlər natamam olduqda səbəbi göstərilməklə imtina barədə yazılı cavab təqdim edir.
2.9. Müqavilənin hər 2 (iki) nüsxəsinin vəsiqə sahibi tərəfindən alındığı gündən 5 (beş) iş günü ərzində imzalanır və möhürü ilə təsdiq edilərək Agentliyə təqdim olunur.
2.10. Vəsiqə sahibi tərəfindən imzalanmış və möhürlə təsdiq edilmiş Müqavilə onun daxil olduğu tarixdən 3 (üç) iş günü ərzində Agentlik tərəfindən imzalanır və möhürlə təsdiq olunur.
2.11. Vəsiqə sahibi stasionar şəraitdə buraxılan dərman vasitələrinə münasibətdə "Dövlət satınalmaları haqqında" Azərbaycan Respublikasının Qanununa uyğun olaraq qalib elan olunduqdan sonra Şərtlər Toplusuna əsasən müqavilənin bağlanılması məqsədilə 2 (iki) nüsxədə tərtib edilməklə Agentliyə ərizə ilə müraciət edir. Agentlik isə vəsiqə sahibindən bu Qaydanın 2.5-ci bəndinin tələblərinə uyğunluğunu yoxladıqdan sonra əlavə sənədlər tələb etmədən 5 (beş) iş günü ərzində həmin Müqaviləni imzalayıb və möhürlə təsdiq edərək vəsiqə sahibinə təqdim edir.
2.12. Tərəflər bu müqavilənin imzalanmasından əsassız olaraq imtina edə bilməzlər.
2.13. Qanunvericiliklə müəyyən olunmuş hallar istisna olmaqla, Tərəflər bu müqavilə və onun tərkib hissələri barədə məlumatları üçüncü tərəflərə açıqlaya bilməzlər.
"Dərman vasitələrinə əlçatanlığın artırılması və maliyyə risklərinin bölüşdürülməsi haqqında müqavilənin nümunəvi forması və bağlanılması Qaydası"na əlavə Nümunəvi forma Dərman vasitələrinə əlçatanlığın artırılması və maliyyə risklərinin bölüşdürülməsi haqqında MÜQAVİLƏ № _______ ___________ şəhər (rayon və s.) "____" ________ 20 ____ il Bu Müqavilə "Tibbi sığorta haqqında" (bundan sonra — Qanun), "Əhalinin sağlamlığının qorunması haqqında" və "Dərman vasitələri haqqında" Azərbaycan Respublikasının qanunlarına uyğun olaraq bir tərəfdən İcbari Tibbi Sığorta üzrə Dövlət Agentliyinin (bundan sonra — Agentlik) İdarə Heyətinin sədri __________________ ___________________________________________________________________ (soyadı, adı və atasının adı) şəxsində, digər tərəfdən "Dərman vasitələri haqqında" Azərbaycan Respublikasının Qanunu və __________________________________________________ əsasında (hüquqi şəxsin nizamnaməsi) fəaliyyət göstərən dərman _______________________________________________ vasitəsinin dövlət qeydiyyatı haqqında vəsiqənin sahibi (bundan sonra — vəsiqə sahibi) ___________________________________________________________________ (vəzifəsi, soyadı, adı və atasının adı) şəxsində (bundan sonra — Tərəflər) Qanunun tələblərinə əsasən aşağıdakı şərtlərlə imzalanmışdır.
1. Müqavilənin predmeti
1.1. Bu Müqavilə sığortaolunanların ambulator və stasionar şəraitdə istifadə olunan dərman vasitələrinə əlçatanlığının artırılması və icbari tibbi sığorta fondunun (bundan sonra — fond) maliyyə sabitliyinin təmin olunması məqsədilə Agentlik və vəsiqə sahibi arasında ______________ adlı dərman vasitəsinə (bundan sonra —
dərman vasitəsi) münasibətdə aşağıdakı şərtlərdən birinin və ya hər ikisinin tətbiqi ilə bağlı məsələləri tənzimləyir:
1.1.1. fondun vəsaiti hesabına maliyyələşdirilən dərman vasitəsinin proqnozlaşdırılan istifadə həcmi müqabilində vəsiqə sahibi tərəfindən endirimlərin tətbiq edilməsi;
1.1.2. fondun vəsaiti hesabına maliyyələşdirilən dərman vasitəsinin klinik tədqiqatlar üzrə məlumatlarına uyğun proqnozlaşdırılan effektivliyinə nail olunmadıqda dərman vasitəsinə görə ödənilən vəsaitin bu Müqavilə ilə razılaşdırılmış hissəsinin vəsiqə sahibi tərəfindən Agentliyə geri qaytarılması.
1.2. Bu Müqaviləyə əsasən vəsiqə sahibi Qanunun və bu Müqavilənin şərtlərinə uyğun olaraq fondun vəsaiti hesabına maliyyələşdirilən dərman vasitəsinin proqnozlaşdırılan istifadə həcmi müqabilində vəsiqə sahibi tərəfindən endirimlərin tətbiq edilməsini, habelə fondun vəsaiti hesabına maliyyələşdirilən dərman vasitəsinin klinik tədqiqatlar üzrə məlumatlarına uyğun proqnozlaşdırılan effektivliyinə nail olunmadıqda dərman vasitəsinə görə ödənilən vəsaitin bu Müqavilə ilə razılaşdırılmış hissəsinin vəsiqə sahibi tərəfindən Agentliyə geri qaytarılmasını, Agentlik isə Qanunla müəyyən olunmuş qaydada dərman vasitələrinə görə sığorta ödənişini həyata keçirməyi öz öhdəsinə götürür.
2. Tərəflərin hüquq və vəzifələri
2.1. Agentliyin hüquqları aşağıdakılardır:
2.1.1. bu Müqavilənin 1.1.1-ci yarımbəndində nəzərdə tutulan şərtlər tətbiq edildikdə:
2.1.1.1. vəsiqə sahibi ilə fondun vəsaiti hesabına maliyyələşdirilən dərman vasitəsinin proqnozlaşdırılan istifadə həcmini bu Müqaviləyə əlavələr edilməsi yolu ilə Tərəflər arasında razılaşdırmaqla müəyyən etmək;
2.1.1.2. dərman vasitəsinin proqnozlaşdırılan istifadə həcminə uyğun olaraq bu Müqavilənin 3.1-ci bəndində nəzərdə tutulmuş endirimlərin tətbiq edilməsini vəsiqə sahibindən tələb etmək;
2.1.1.3. dərman vasitəsilə bağlı qanunvericilikdə nəzərdə tutulmuş zəruri məlumatları tələb etmək;
2.1.1.4. bu Müqavilənin 3-cü hissəsinə uyğun olaraq hesablanan məbləğin ödənilməsini tələb etmək;
2.1.2. bu Müqavilənin 1.1.2-ci yarımbəndində nəzərdə tutulan şərtlər tətbiq edildikdə:
2.1.2.1. dərman vasitəsinin istifadəsi nəticəsində müalicə olunmuş pasiyentlərin sayında və ya ölüm nisbətində ötən illə müqayisədə azalma baş vermədikdə bu Müqavilənin 3-cü hissəsində nəzərdə tutulmuş məbləğin Agentliyə geri qaytarılmasını tələb etmək;
2.1.2.2. bu Müqavilənin 2.1.1.3-cü yarımbəndində nəzərdə tutulmuş məlumatları tələb etmək;
2.1.3. bu Müqavilənin 1.1.1-ci və 1.1.2-ci yarımbəndləri eyni zamanda tətbiq edildiyi hallarda 2.1.1-ci və 2.1.2-ci yarımbəndlər tətbiq edilir.
2.2. Agentliyin vəzifələri aşağıdakılardır:
2.2.1. dərman vasitələrinin qanunvericilikdə nəzərdə tutulmuş qaydada sığorta ödənişini həyata keçirmək;
2.2.2. sığortaolunanların səhhətinə dair məlumatların, həmçinin həkim sirri təşkil edən məlumatların mühafizəsini və məxfiliyini təmin etmək;
2.2.3. bu Müqavilənin məxfi saxlanılmasını və üçüncü tərəflərə açıqlanmamasını təmin etmək;
2.2.4. hər cari ayın 25-dən gec olmayaraq, əvvəlki təqvim ayında fondun hesabına təmin olunmuş dərman vasitəsinin istifadə həcmi, dərman vasitəsindən istifadə etmiş şəxslərin (populyasiyası göstərilməklə) sayı və diaqnozları haqqında vəsiqə sahibinə hesabat təqdim etmək;
2.2.5. növbəti il fevralın 15-dən gec olmayaraq, dərman vasitəsinin satışına dair ümumi illik hesabatı vəsiqə sahibinə təqdim etmək (bu Müqavilənin 2.2.4-cü yarımbəndində göstərilən məlumatlarla yanaşı, fonda qaytarılmalı olan məbləğ göstərilməklə);
2.2.6. dərman vasitəsini istifadə edən pasiyentlərin reyestrini yaratmaq və dərman vasitəsinin onların səhhətinə effektivliyini nəzarətdə saxlamaqla dərman vasitəsinin effektivliyi barədə məlumatları hər il dekabrın 25-dək Azərbaycan Respublikasının Səhiyyə Nazirliyindən əldə etmək və hər növbəti il fevralın 15-dək nəticələr barədə hesabatı vəsiqə sahibinə təqdim etmək (fonda qaytarılmalı olan məbləğ göstərilməklə).
2.3. Vəsiqə sahibinin hüquqları aşağıdakılardır:
2.3.1. bu Müqavilənin 1.1.1-ci yarımbəndində nəzərdə tutulan şərtlər tətbiq edildikdə:
2.3.1.1. bu Müqavilənin 2.2.4-cü və 2.2.5-ci yarımbəndlərində nəzərdə tutulan hesabatların vaxtında təqdim edilməsini Agentlikdən tələb etmək;
2.3.1.2. bu Müqavilənin şərtlərinin qanunvericiliklə müəyyən olunan hallar istisna olmaqla məxfi saxlanmasını və ictimaiyyətə açıqlanmamasını Agentlikdən tələb etmək;
2.3.1.3. dərman vasitələrinin proqnozlaşdırılan istifadə həcminin müəyyənləşdirilməsində iştirak etmək;
2.3.2. bu Müqavilənin 1.1.2-ci yarımbəndində nəzərdə tutulan şərtlər tətbiq edildikdə, qanunvericiliyin tələbləri qorunmaqla bu Müqavilənin 2.1.2.1-ci və 2.1.2.2-ci yarımbəndlərində nəzərdə tutulan məlumatların təqdim edilməsini tələb etmək və nəticələrini mübahisələndirmək;
2.3.3. bu Müqavilənin 1.1.1-ci və 1.1.2-ci yarımbəndləri eyni zamanda tətbiq edildiyi hallarda 2.3.1-ci və 2.3.2-ci yarımbəndlər tətbiq edilir.
2.4. Vəsiqə sahibinin vəzifələri aşağıdakılardır:
2.4.1. bu Müqavilənin 3-cü hissəsinə əsasən hesablanmış məbləği hesabatlar təqdim edildiyi tarixdən 60 (altmış) gün ərzində Agentliyə geri qaytarmaq;
2.4.2. dərman vasitələri haqqında qanunvericilikdə nəzərdə tutulmuş məlumatları Agentliyə təqdim etmək;
2.4.3. bu Müqavilənin məxfi saxlanılmasını və üçüncü tərəflərə açıqlanmamasını təmin etmək;
2.4.4. dərman vasitəsinin dövlət qeydiyyatı dayandırıldıqda və ya ləğv edildikdə, bu barədə Agentliyə 1 (bir) gün ərzində məlumat vermək.
3. Vəsiqə sahibi tərəfindən tətbiq olunan endirimlər və geri qaytarılan vəsaitlərin hesablanması qaydası
3.1. Bu Müqavilənin 1.1.1-ci yarımbəndində nəzərdə tutulan şərtlər tətbiq edildikdə, ambulator şəraitdə istifadə olunan dərman vasitələrinin proqnozlaşdırılan istifadə həcmi müqabilində tətbiq olunacaq endirimlər Tərəflərin qarşılıqlı razılığı əsasında müəyyən edilir.
3.2. Bu Müqavilənin 1.1.2-ci yarımbəndində nəzərdə tutulan şərtlər tətbiq edildikdə, stasionar şəraitdə istifadə olunan dərman vasitələrinə münasibətdə geri qaytarılan məbləğ və bu Müqavilənin imzalanması şərti "Dövlət satınalmaları haqqında" Azərbaycan Respublikasının Qanununa uyğun olaraq satınalma zamanı Şərtlər Toplusunda göstərilir.
4. Müqavilənin müddəti və müqaviləyə xitam verilməsi şərtləri
4.1. Bu Müqavilə hər iki Tərəf tərəfindən imzalandığı gündən qüvvəyə minir.
4.2. Bu Müqaviləyə aşağıdakı hallarda xitam verilir:
4.2.1. Agentliyin bu Müqavilənin pozulması haqqında yazılı bildirişinə baxmayaraq, vəsiqə sahibi təqdim edilmiş sənəd əsasında 30 (otuz) gün müddətində tədbir görməməsi;
4.2.2. Tərəflərdən biri ləğv edildikdə;
4.2.3. vəsiqə sahibinin əczaçılıq fəaliyyəti növləri üzrə lisenziyası ləğv edildikdə və ya dayandırıldıqda;
4.2.4. Tərəflərdən birinin təşəbbüsü ilə 1 (bir) ay əvvəl yazılı şəkildə məlumatlandırmaq şərtilə;
4.2.5. vəsiqə sahibi tərəfindən öhdəliklər bu Müqavilə üzrə 1 (bir) il ərzində 5 (beş) dəfə tam və ya lazımi qaydada icra edilmədikdə;
4.2.6. dərman vasitəsi pozitiv siyahıdan çıxarıldıqda;
4.2.7. dərman vasitəsinin dövlət qeydiyyatı haqqında vəsiqə dayandırıldıqda və ya ləğv edildikdə.
4.3. Bu Müqaviləyə xitam verildikdə Tərəflər xitama qədər yaranan bütün öhdəlikləri lazımi qaydada yerinə yetirirlər.
4.4. Bu Müqavilənin müddəti Tərəflər arasında razılaşdırılır.
5. Tərəflərin məsuliyyəti
5.1. Tərəflər bu Müqavilə üzrə öhdəliklərinin tam və ya lazımi qaydada yerinə yetirilməməsinə görə məsuliyyət daşıyırlar və dəbbə pulunun ödənilməsini öhdəliyinə götürürlər.
5.2. Bu Müqavilə üzrə öhdəliklərin tam və ya lazımi qaydada yerinə yetirilməməsinə görə vəsiqə sahibinə tətbiq olunan dəbbə pulunun məbləği dəymiş zərərdən az olduqda, dəbbə pulundan artıq zərər tam məbləğdə ödənilir.
5.3. Dəbbə pulunun məbləği Tərəflər arasında razılaşdırmaqla müəyyən edilir.
5.4. Bu Müqaviləyə xitam verilməsi Tərəfləri bu Müqavilənin şərtlərinin pozulması ilə bağlı məsuliyyətdən azad etmir.
6. Tətbiq olunan hüquq
6.1. Bu Müqavilənin müddəalarının şərhi Azərbaycan Respublikasının mövcud qanunvericiliyinə uyğun olaraq aparılmalıdır.
6.2. Bu Müqavilə üzrə aparılan tədqiqatların nəticələri, hesabatlar və vəsiqə sahibi tərəfindən hazırlanan digər sənədlər Agentliyin mülkiyyəti hesab olunur və onun sərəncamında qalır. Vəsiqə sahibi bu sənədlərin surətini özündə saxlaya bilər.
7. Vergilər və rüsumlar Tərəflər Azərbaycan Respublikasının mövcud qanunvericiliyində nəzərdə tutulmuş tələblərə uyğun olaraq bütün vergilərin, rüsumların və qanunvericiliklə müəyyən edilmiş digər ödənişlərin aparılmasına məsuliyyət daşıyırlar.
8. Digər şərtlər
8.1. Müqavilə Azərbaycan və vəsiqə sahibi qeyri-rezident olduqda ingilis dillərində olmaqla 2 (iki) dildə tərtib olunur.
8.2. Bu Müqavilə eyni hüquqi qüvvəyə malik olan 2 (iki) əsl nüsxədə tərtib edilməklə, 1 (bir) nüsxəsi vəsiqə sahibində, digər nüsxəsi isə Agentlikdə saxlanılır. Bütün mətnlər bərabər autentikdir. Təfsir və tətbiq zamanı fikir ayrılığı yarandığı təqdirdə, Azərbaycan dilindəki mətnə üstünlük verilir.
8.3. Bu Müqavilə ilə əlaqədar Tərəflər arasında yaranmış mübahisələr danışıqlar yolu ilə həll edilir. Mübahisələri danışıqlar yolu ilə həll etmək mümkün olmadıqda, onlar məhkəmə qaydasında həll edilir.
8.4. Qanunvericiliyə və bu Müqavilənin şərtlərinə zidd olmamaq şərtilə bu Müqavilədə dəyişiklik edilə bilər. Bu Müqavilədə dəyişiklik edilməsinə yalnız Tərəflərin qarşılıqlı razılığına əsasən yol verilir və hər iki Tərəfin imzası və möhürü ilə rəsmiləşdirilir. Həmin dəyişiklik bu Müqavilənin ayrılmaz tərkib hissəsi hesab olunur.
9. Tərəflərin hüquqi ünvanları və bank rekvizitləri İcbari Tibbi Sığorta üzrə Dövlət Agentliyi Hüquqi ünvanı _______________________ VÖEN _____________________________ Bank rekvizitləri ______________________ Səlahiyyətli şəxsin ____________________ (vəzifəsi, adı, soyadı və atasının adı) İmzası _________ M. Y.
__________________________________ (vəsiqə sahibinin adı) Hüquqi ünvanı ______________________ VÖEN ____________________________ Bank rekvizitləri _____________________ Səlahiyyətli şəxsin ___________________ (vəzifəsi, adı, soyadı və atasının adı) İmzası _________ M. Y.
_______________