AZƏRBAYCAN RESPUBLİKASININ NAZİRLƏR KABİNETİ QƏRAR "Dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığa və proqram təminatına dair tələblərə uyğunluğun müəyyənləşdirilməsi ...........................Qaydası"nın təsdiq edilməsi haqqında "İnnovasiya və Rəqəmsal İnkişaf Agentliyinin fəaliyyətinin təmin edilməsi və Azərbaycan Respublikası Prezidentinin "Azərbaycan Respublikası Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyinin yaradılması haqqında" 2018-ci il 6 noyabr tarixli 325 nömrəli, "Azərbaycan Respublikası Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyinin fəaliyyətinin təmin edilməsi haqqında" 2019-cu il 22 fevral tarixli 545 nömrəli fərmanlarında dəyişiklik edilməsi barədə" Azərbaycan Respublikası Prezidentinin 2022-ci il 21 oktyabr tarixli 1862 nömrəli Fərmanının 2.1-ci bəndinin icrasını təmin etmək məqsədilə Azərbaycan Respublikasının Nazirlər Kabineti qərara alır:
1. "Dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığa və proqram təminatına dair tələblərə uyğunluğun müəyyənləşdirilməsi Qaydası" təsdiq edilsin (əlavə olunur).
2. Bu Qərarda dəyişiklik Azərbaycan Respublikası Prezidentinin 2023-cü il 6 oktyabr tarixli 2328 nömrəli Fərmanı ilə təsdiq edilmiş "İcra hakimiyyəti orqanlarının normativ hüquqi aktlarının layihələrinin hazırlanması, razılaşdırılması, qəbul edilməsi və dərc edilməsi qaydası haqqında Əsasnamə"nin 3.5-ci bəndinə uyğun edilə bilər.
Əli Əsədov Azərbaycan Respublikasının Baş naziri Bakı şəhəri, 28 dekabr 2023-cü il № 485
Azərbaycan Respublikası Nazirlər Kabinetinin 2023-cü il 28 dekabr tarixli 485 nömrəli Qərarı ilə təsdiq edilmişdir. Dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığa və proqram təminatına dair tələblərə uyğunluğun müəyyənləşdirilməsi QAYDASI
1. Ümumi müddəalar
1.1. Bu Qayda dövlət orqanlarının (qurumlarının) və yerli özünüidarəetmə orqanlarının informasiya sistemlərinin və ehtiyatlarının formalaşdırılması, aparılması, inteqrasiyası və arxivləşdirilməsi, habelə elektron xidmətlərin təşkili və göstərilməsi üçün istifadə etməli olduqları texnoloji avadanlığın və proqram təminatının bu Qaydanın 1.2-ci bəndində qeyd olunan texniki tələblərə uyğunluğunun müəyyənləşdirilməsi (bundan sonra — uyğunluğun müəyyənləşdirilməsi) ilə bağlı məsələləri tənzimləyir.
1.2. Dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığa və proqram təminatına dair texniki tələblər "İnnovasiya və Rəqəmsal İnkişaf Agentliyinin fəaliyyətinin təmin edilməsi və Azərbaycan Respublikası Prezidentinin "Azərbaycan Respublikası Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyinin yaradılması haqqında" 2018-ci il 6 noyabr tarixli 325 nömrəli, "Azərbaycan Respublikası Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyinin fəaliyyətinin təmin edilməsi haqqında" 2019-cu il 22 fevral tarixli 545 nömrəli fərmanlarında dəyişiklik edilməsi barədə" Azərbaycan Respublikası Prezidentinin 2022-ci il 21 oktyabr tarixli 1862 nömrəli Fərmanının 3.1-ci bəndinə əsasən Azərbaycan Respublikasının Rəqəmsal İnkişaf və Nəqliyyat Nazirliyi (bundan sonra — Nazirlik) tərəfindən müəyyən edilir.
1.3. Dövlət orqanları (qurumları) və yerli özünüidarəetmə orqanları (bundan sonra — qurum) bu Qaydanın 1.2-ci bəndində qeyd olunan texniki tələblərə uyğunluğu bu Qaydaya müvafiq olaraq müəyyənləşdirilən texnoloji avadanlıqdan və proqram təminatından istifadə etməlidir.
1.4. Bu Qayda ali kateqoriya dövlət orqanları, mühafizə olunan şəxslər, kəşfiyyat və əks-kəşfiyyat fəaliyyətinin subyektləri tərəfindən, habelə qorunan obyektlər və dövlət sirri təşkil edən məlumatların işlənilməsi üzrə istifadə edilməsi nəzərdə tutulan texnoloji avadanlığa və proqram təminatına şamil olunmur.
2. Uyğunluğun müəyyənləşdirilməsinin həyata keçirilməsi qaydaları
2.1. Uyğunluğun müəyyənləşdirilməsi üçün qurum ərizə ilə Nazirliyə müraciət edir. Ərizədə qurumun adı, hüquqi ünvanı, VÖEN-i, əlaqə telefonu, internet informasiya ehtiyatı, elektron poçt ünvanı, fəaliyyət sahəsi, eləcə də qurumu səlahiyyətli nümayəndə təmsil etdikdə onun soyadı, adı, atasının adı, FİN-i, əlaqə telefonu və elektron poçt ünvanı qeyd edilir. Ərizə ona əlavə edilmiş sənədlərlə birlikdə elektron qaydada Nazirliyə təqdim olunur. Ərizə qurumun rəhbəri və ya səlahiyyətli nümayəndəsi tərəfindən imzalanır.
2.2. Ərizə hazırlanan proqram təminatına və istehsal edilən texnoloji avadanlığa münasibətdə nümunənin hazırlanma mərhələsində, alınan texnoloji avadanlığa və proqram təminatına münasibətdə isə satınalınma ilə bağlı Müqavilə imzalandıqdan sonra təqdim olunur.
2.3. Ərizəyə aşağıdakı sənədlər (məlumatlar) əlavə olunur:
2.3.1. qurumun vergi ödəyicisi kimi uçota alınması haqqında şəhadətnamənin surəti (olduqda), hüquqi şəxs olduqda isə hüquqi şəxslərin dövlət reyestrindən çıxarışının surəti;
2.3.2. qurumu səlahiyyətli nümayəndə təmsil etdikdə onun şəxsiyyətini təsdiq edən sənədin surəti və səlahiyyətini təsdiq edən sənəd;
2.3.3. müvafiq proqram təminatının lisenziyası, habelə texnoloji avadanlığın və proqram təminatının istifadə edildiyi informasiya təminatı üçün nəzərdə tutulan və ya konfidensial informasiyanın işlənməsini həyata keçirən informasiya sistemlərinin və ehtiyatlarının, eləcə də bu sistemlərin və ehtiyatların mühafizə vasitələrinin, habelə texnoloji avadanlığın sertifikatları (nömrəsi, verilmə tarixi, qüvvədə olma müddəti və sənədi verən qurum);
2.3.4. texnoloji avadanlıq və proqram təminatı haqqında məlumat (sayı, modeli, istehsal tarixi, təyinatı, funksiyaları və digər parametrləri);
2.3.5. texnoloji avadanlığın və proqram təminatının istehsalçısı haqqında məlumat (adı, VÖEN-i, elektron poçt ünvanı, hüquqi ünvanı, telefon və faks nömrələri);
2.3.6. texnoloji avadanlığa və proqram təminatına texniki dəstək verən şəxs haqqında məlumat (VÖEN-i, elektron poçt ünvanı, telefon və faks nömrələri, hüquqi şəxsin adı və hüquqi ünvanı, fiziki şəxsin adı və soyadı, qeydiyyat və fəaliyyət ünvanı);
2.3.7. proqram təminatı ilə bağlı texniki şərtlərə və texniki tapşırıqlara (həllər toplusuna) dair sənədlər;
2.3.8. proqram təminatını hazırlayan və ya hazırlanmasına sifariş verən şəxs (qurum) tərəfindən proqram təminatı ilə bağlı verilən dizayn sənədi;
2.3.9. proqram təminatı komponentlərinin və parametrlərinin baza vəziyyətinin inventar uçotu sənədi;
2.3.10. proqram təminatını hazırlayan və ya hazırlanmasına sifariş verən şəxs (qurum) tərəfindən proqram təminatının arxitekturası ilə bağlı müəyyən edilən tələblərə dair sənəd;
2.3.11. proqram təminatını hazırlayan və ya hazırlanmasına sifariş verən şəxs (qurum) tərəfindən proqram təminatının istismara verilməsi üçün verilən arxitektura dizaynı sənədləri;
2.3.12. proqram təminatının istismara verilməsi üçün istifadəçi təlimatları;
2.3.13. proqram təminatının istismara verilməsi üçün inzibatçı təlimatları;
2.3.14. proqram təminatının istismara verilməsi üçün quraşdırılma, sazlama və texniki xidmət üzrə təlimatlar;
2.3.15. proqram təminatının istismara verilməsi üçün təhlükəsizlik və funksionallıq testləri üzrə ssenarilər və testlərin nəticələri, o cümlədən uyğunsuzluqlar barədə hesabat (olduqda);
2.3.16. proqram təminatının istismara verilməsi üçün mənbə kodlarının saxlanma yeri və mənbə koduna təhlükəsiz giriş üçün təlimat (hazır həllər istisna olmaqla);
2.3.17. proqram təminatının istismarı müddətində formalaşan məlumatların ehtiyat nüsxələrinin çıxarılması və bərpası prosesinə dair sənəd;
2.3.18. proqram təminatının fəaliyyətinin dayandığı hallar üçün onun bərpaedilmə müddəti və həmin müddət ərzində istifadə ediləcək alternativ üsullara (vasitələrə) dair sənəd;
2.3.19. proqram təminatının istismarı müddətində texniki dəstək səviyyələri və onların göstərilmə prosesinə dair sənəd;
2.3.20. proqram təminatının istismardan çıxarılması və ya yenisi ilə əvəzlənməsi üzrə təlimat;
2.3.21. proqram təminatında bütün zəruri əməliyyat tarixçələrinin qeydiyyatının aparılmasına, həmin qeydiyyatların təhlükəsizliyini (tamlığını, əlçatanlığını və konfidensiallığını) təminetmə mexanizminə, qeydiyyat prosesinə və həmin qeydiyyatın saxlanma müddətinə dair sənəd;
2.3.22. texnoloji avadanlığın texniki göstərici və xüsusiyyətlərinə dair sənəd;
2.3.23. texnoloji avadanlığın istismara qəbulu prosesinə dair sənəd;
2.3.24. texnoloji avadanlığın təhlükəsizliyin qiymətləndirilməsi testlərinin nəticələrinə dair sənəd;
2.3.25. texnoloji avadanlığın saxlanılması, istismarı və istifadəsi ilə bağlı təlimatlar;
2.3.26. texnoloji avadanlığın istismarı müddətində texniki dəstək səviyyələri və onların göstərilmə prosesinə dair sənəd;
2.3.27. texnoloji avadanlığın fəaliyyətinin dayandığı hallar üçün alternativ üsullara dair sənəd;
2.3.28. texnoloji avadanlığa istehsalçı tərəfindən dəstək dayandırıldıqda onun istismardan çıxarılması planı.
2.4. Bu Qaydanın 2.3.1-ci, 2.3.2-ci, 2.3.5-ci və 2.3.6-cı yarımbəndlərində göstərilən sənədlərin və ya məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və ya məlumatlar qurumdan tələb edilmir. Belə sənədlərin və ya məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi qurumun razılığı ilə sorğu əsasında müvafiq dövlət orqanından (qurumundan) tələb olunur və ya qurum tərəfindən təmin edilir.
2.5. Ərizə Nazirliyə daxil olduğu gün qeydiyyata alınır. Nazirlik ərizənin qeydiyyata alındığı vaxtdan 30 (otuz) gün müddətində şəhadətnamənin verilməsi və ya verilməsindən imtina haqqında əsaslandırılmış qərar qəbul edir. Həmin müraciətlər üzrə icraatın yekunlaşdırılması üçün sənədləri araşdırmaq, əlavə məlumatları əldə etmək, aidiyyəti üzrə sorğu göndərmək məqsədilə icraatın müddəti Nazirlik tərəfindən 30 (otuz) gün müddətində uzadıla bilər. Nazirlik tərəfindən müddətin uzadılması barədə ərizə verən quruma 2 (iki) iş günü müddətində məlumat verilir.
2.6. Ərizədə və ona əlavə edilmiş sənədlərdə (məlumatlarda) aradan qaldırılması mümkün olan, eləcə də bu Qaydanın 1.2-ci bəndində qeyd edilən texniki tələblərə uyğunluğa dair şəhadətnamənin (bundan sonra — şəhadətnamə) verilməsindən imtinaya səbəb olmayan çatışmazlıqlar aşkar edildikdə, ərizənin qeydiyyata alındığı tarixdən 15 (on beş) gündən gec olmayaraq, Nazirlik onların aradan qaldırılması barədə məlumatı quruma təqdim edir. Eyni zamanda, quruma formal tələblərə əməl olunmamasının hüquqi nəticələri izah edilir və bütün çatışmazlıqlar bildirilir.
2.7. Qurum bu Qaydanın 2.6-cı bəndində göstərilən çatışmazlıqları məlumatı aldığı tarixdən ən geci 10 (on) iş günü müddətində aradan qaldırmalıdır. Bu zaman bu Qaydanın 2.5-ci bəndində nəzərdə tutulmuş müddətin axımı dayandırılır və dayandırılmış müddət uyğunluğun müəyyənləşdirilməsi müddətinə daxil edilmir. Çatışmazlıqların aradan qaldırılması barədə qurumun müraciətindən sonra müddətin axımı bərpa olunur.
2.8. Qurum ərizədə və ona əlavə edilmiş sənədlərdə (məlumatlarda) aşkar olunmuş çatışmazlıqları bu Qaydanın 2.7-ci bəndində göstərilən müddətdə aradan qaldırmadıqda, Nazirlik ərizənin baxılmamış saxlanılması haqqında qərar qəbul edir və bu barədə məlumatı 2 (iki) iş günü müddətində quruma təqdim edir.
2.9. Qurum aşkar olunmuş çatışmazlıqları aradan qaldırdıqdan sonra uyğunluğun müəyyənləşdirilməsi üçün bu Qaydanın 2.1-2.3-cü bəndlərinin tələblərinə əməl etməklə təkrar ərizə ilə Nazirliyə müraciət edə bilər.
2.10. Ərizədə və ona əlavə edilmiş sənədlərdə (məlumatlarda) çatışmazlıqlar aşkar edilmədikdə, yaxud bu Qaydanın 2.7-ci bəndinə uyğun olaraq çatışmazlıqlar aradan qaldırıldıqda həmin sənədlər (məlumatlar) baxılması məqsədilə Nazirlikdə yaradılmış və daimi əsaslarla fəaliyyət göstərən İşçi qrupa təqdim edilir. İşçi qrup Nazirlik tərəfindən aşağıdakı tərkibdə formalaşdırılır:
2.10.1. Nazirlik;
2.10.2. Azərbaycan Milli Elmlər Akademiyası;
2.10.3. İnnovasiya və Rəqəmsal İnkişaf Agentliyi;
2.10.4. İnformasiya Kommunikasiya Texnologiyaları Agentliyi;
2.10.5. "Az InTelecom" Məhdud Məsuliyyətli Cəmiyyəti;
2.10.6. Nazirlik tərəfindən cəlb edilən müstəqil ekspertlər.
2.11. İşçi qrup qurumun istifadə etməli olduğu texnoloji avadanlığa və proqram təminatına baxış keçirir və test edir, nəticələrini aktla rəsmiləşdirir, eləcə də təqdim olunan sənədləri (məlumatları) araşdırır və təhlil edir. Bundan sonra həmin texnoloji avadanlığın və proqram təminatının bu Qaydanın 1.2-ci bəndində qeyd olunan texniki tələblərə uyğunluğunun müəyyənləşdirilməsi məqsədilə keçirilən iclasda müvafiq rəy tərtib olunur və təsdiq edilir.
2.12. Qurumun istifadə etməli olduğu texnoloji avadanlığa və proqram təminatına baxış keçirilməsi və test edilməsi barədə aktda aşağıdakılar göstərilir:
2.12.1. aktın tərtib edilmə tarixi və yeri;
2.12.2. baxış keçirən və test edən şəxslərin vəzifəsi, adı, soyadı və atasının adı;
2.12.3. baxış keçirilən və test edilən texnoloji avadanlıq və proqram təminatı haqqında məlumat (sayı, təqdim edən qurumun adı, istehsalçısı (adı, VÖEN-i, elektron poçt ünvanı, hüquqi ünvanı, telefon və faks nömrələri), modeli, istehsal tarixi, təyinatı, funksiyaları və digər parametrləri);
2.12.4. keçirilən baxış və test zamanı müəyyən edilən hallar;
2.12.5. baxış keçirən və test edən şəxslərin imzası.
2.13. İşçi qrupun fəaliyyətinə Nazirlik tərəfindən bu Qaydanın 2.10.1-ci yarımbəndində qeyd olunan şəxslər sırasından təyin edilən üzv sədrlik edir. İşçi qrupun iclasları üzvlərinin yarıdan çoxu iştirak etdikdə səlahiyyətlidir. İşçi qrupun iclasında hər üzvün bir səsi olmaqla, qərarlar açıq səsvermə yolu və sadə səs çoxluğu ilə qəbul edilir. Səsvermə zamanı üzvlərin bitərəf qalmasına icazə verilmir. Səslərin sayı bərabər olduqda, iclasa sədrlik edənin səsi həlledicidir. İşçi qrupun sadə səs çoxluğu ilə təsdiq edilmiş müvafiq rəyi (texnoloji avadanlığın və proqram təminatının bu Qaydanın 1.2-ci bəndində qeyd olunan texniki tələblərə uyğun olması və ya olmaması barədə) Nazirliyə təqdim edilir. Qeyd edilən rəylə razılaşmayan İşçi qrupun üzvü bununla bağlı özünün xüsusi rəyini Nazirliyə təqdim edə bilər.
2.14. Uyğunluğun müəyyənləşdirilməsi informasiya ehtiyatlarının və sistemlərinin, habelə elektron xidmətlərin formalaşdırılması ilə bağlı layihələrin hazırlanması, sınağının aparılması, təkmilləşdirilməsi və səmərəli istifadə imkanlarının artırılması, eləcə də onların texniki və səmərəliliyi baxımından məqsədəuyğunluğu barədə rəy verilməsi və ya qiymətləndirilməsinə dair proseslərin həyata keçirilməsi zamanı bu Qaydanın 2.1-ci və 2.3-cü bəndlərində qeyd olunan sənədlər
(məlumatlar) üzrə, bu Qaydanın 2.4-2.13-cü bəndlərinə və 3-cü hissəsinə uyğun olaraq həyata keçirilir.
2.15. Uyğunluğun müəyyənləşdirilməsi məqsədilə texnoloji avadanlığa və proqram təminatına baxış keçirilməsi və test edilməsi, o cümlədən bu Qaydanın 2.14-cü bəndində qeyd olunan fəaliyyətlərin həyata keçirilməsi zamanı Nazirlik tərəfindən 5 (beş) iş günü əvvəl qurumlar məlumatlandırılır.
2.16. Bu Qaydanın 2.14-cü bəndində qeyd olunan fəaliyyətlərin həyata keçirilməsi zamanı bu Qaydanın 2.1-ci və 2.3-cü bəndlərində qeyd olunan sənədlərdə (məlumatlarda) çatışmazlıqlar aşkar etdikdə, qurumlar ən geci 2 (iki) iş günü ərzində Nazirliyə müvafiq sənədləri (məlumatları) təqdim etməli, həmçinin texnoloji avadanlığa və proqram təminatına baxış keçirilməsi və test edilməsi üçün zəruri şərait yaratmalıdır.
3. Uyğunluğun müəyyənləşdirilməsinin nəticələrinin rəsmiləşdirilməsi
3.1. Nazirlik informasiya təhlükəsizliyi üzrə rəy verilməsi üçün qurumun istifadə etməli olduğu texnoloji avadanlığın və proqram təminatının bu Qaydanın 1.2-ci bəndində qeyd olunan texniki tələblərə uyğunluğuna dair İşçi qrupun rəyini və bu Qaydanın 2.3-cü bəndində göstərilən sənədləri (məlumatları) Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinə (bundan sonra — Dövlət Xidməti) təqdim edir.
3.2. Müvafiq sənədlər (məlumatlar) təqdim olunduqdan sonra Dövlət Xidməti 5 (beş) iş günü müddətində informasiya təhlükəsizliyi üzrə əsaslandırılmış rəyini Nazirliyə təqdim edir.
3.3. Nazirlik İşçi qrupun və Dövlət Xidmətinin rəylərinə əsasən qurumun istifadə etməli olduğu texnoloji avadanlığın və proqram təminatının bu Qaydanın 1.2-ci bəndində qeyd olunan texniki tələblərə uyğunluğuna dair şəhadətnamənin verilməsi və ya verilməsindən imtina haqqında əsaslandırılmış qərar qəbul edir.
3.4. Qərarda aşağıdakılar göstərilir:
3.4.1. qərarın adı, qəbul olunma tarixi və yeri, qeydiyyat nömrəsi;
3.4.2. qərarı qəbul etmiş qurumun adı;
3.4.3. qərarın ünvanlandığı qurumun adı, hüquqi ünvanı və VÖEN-i;
3.4.4. barəsində qərar qəbul edilən texnoloji avadanlıq və proqram təminatı;
3.4.5. inzibati qaydada və məhkəməyə şikayət etmək hüququ haqqında məlumat;
3.4.6. Azərbaycan Respublikası rəqəmsal inkişaf və nəqliyyat nazirinin (o olmadıqda isə onun vəzifələrini icra edən şəxsin) imzası, soyadı, adı və atasının adı;
3.4.7. Nazirliyin möhürü.
3.5. Şəhadətnamənin verilməsi haqqında qərar şəhadətnamə ilə birlikdə qərarın qəbul edildiyi tarixdən 3 (üç) iş günü müddətində quruma təqdim edilir.
3.6. Şəhadətnamə bu Qaydanın əlavəsi ilə müəyyən edilmiş formada və müddətsiz verilir.
3.7. Şəhadətnamənin verilməsindən aşağıdakı hallarda imtina edilir:
3.7.1. bu Qaydanın 2.6-cı bəndində nəzərdə tutulmuş hal istisna olmaqla, ərizədə və ona əlavə olunmuş sənədlərdə (məlumatlarda) səhv və ya təhrif olunmuş məlumatlar olduqda;
3.7.2. qurumun istifadə etməli olduğu texnoloji avadanlıq və proqram təminatı bu Qaydanın 1.2-ci bəndində qeyd edilən texniki tələblərə uyğun olmadıqda;
3.7.3. Dövlət Xidməti tərəfindən mənfi rəy verildikdə.
3.8. Nazirlik şəhadətnamənin verilməsindən imtina haqqında qərarı 3 (üç) iş günü müddətində quruma təqdim edir.
3.9. Şəhadətnamənin verilməsindən imtina edilən texnoloji avadanlığın və proqram təminatının qurumlar tərəfindən istifadə edilməsinə yol verilmir.
3.10. Qurum şəhadətnamənin verilməsindən imtina haqqında qərardan inzibati qaydada və (və ya) məhkəməyə şikayət verə bilər.
4. Şəhadətnamənin dublikatının verilməsi qaydası
4.1. Şəhadətnamə itirildikdə və ya zədələndikdə, şəhadətnamənin sahibi olan qurum onun dublikatının verilməsi üçün Nazirliyə bu Qaydanın 2.1-ci bəndinin tələbinə əməl etməklə kağız və ya elektron qaydada ərizə ilə müraciət edir. Zədələnmiş şəhadətnamə qurum tərəfindən qeyd edilən ərizə ilə birlikdə Nazirliyə təqdim olunur.
4.2. Nazirlik ərizənin daxil olduğu tarixdən 3 (üç) iş günü müddətində şəhadətnamənin dublikatını hazırlayaraq quruma təqdim edir.
4.3. Şəhadətnamənin dublikatı itirilmiş və ya zədələnmiş şəhadətnamə ilə eyni hüquqi qüvvəyə malikdir.
5. Şəhadətnamənin ləğv edilməsi qaydası
5.1. Şəhadətnamə aşağıdakı hallarda ləğv edilir:
5.1.1. şəhadətnamənin sahibi olan qurum ləğv edildikdə;
5.1.2. şəhadətnamə verilən texnoloji avadanlığın və proqram təminatının istismarı dayandırıldıqda (istismar müddəti başa çatdıqda, texnoloji avadanlıq məhv edildikdə, proqram təminatı arxivləşdirildikdə);
5.1.3. şəhadətnamə verilən texnoloji avadanlıqda və proqram təminatında bu Qaydanın 1.2-ci bəndində qeyd olunan texniki tələblərə uyğun olmayan dəyişikliklər edildikdə.
5.2. Şəhadətnamə bu Qaydanın 5.1-ci bəndində göstərilən hallara istinad edilməklə, Nazirliyin qərarı (qurumun müraciəti və ya Nazirliyin müəyyən etdiyi hallar əsasında qəbul edilən) ilə ləğv edilir. Həmin qərar qəbul olunduğu tarixdən 2 (iki) iş günü müddətində şəhadətnamənin sahibinə təqdim edilir. Şəhadətnamə ləğv edildikdə 3 (üç) iş günü müddətində həmin şəhadətnamə qurum tərəfindən Nazirliyə qaytarılır.
5.3. Qurumun adı dəyişdirildikdə və ya bu qurum adının dəyişdirilməsinə səbəb olan birləşmə, qoşulma, çevrilmə yolu ilə yenidən təşkil edildikdə, əvvəlki adı əks etdirən şəhadətnamənin ad dəyişmə hissəsində Nazirlik tərəfindən dəyişikliklər edilir. Belə dəyişikliklər edilənədək əvvəlki adı əks etdirən şəhadətnamə dəyişdirilmiş (yeni yaradılmış) quruma tam həcmdə şamil olunur. _________________
"Dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığa və proqram təminatına dair tələblərə uyğunluğun müəyyənləşdirilməsi Qaydası"na əlavə Azərbaycan Respublikasının Rəqəmsal İnkişaf və Nəqliyyat Nazirliyi ŞƏHADƏTNAMƏ № _____ "____" ___________ 20__ il ____________________________________________________________ (şəhadətnamənin verildiyi dövlət orqanının (qurumunun) və ya yerli özünüidarəetmə orqanının tam adı və VÖEN-i) ____________________________________________________________ (şəhadətnamənin verildiyi dövlət orqanının (qurumunun) və ya yerli özünüidarəetmə orqanının hüquqi ünvanı) ____________________________________________________________ (texnoloji avadanlıq və proqram təminatı) Bu şəhadətnamə dövlət orqanlarının (qurumlarının) və yerli özünüidarəetmə orqanlarının istifadə etməli olduqları texnoloji avadanlığın və proqram təminatının texniki tələblərə uyğunluğunu təsdiq edir. (soyadı, adı) (məsul şəxsin vəzifəsi) (imzası)
MY.