“Azərbaycan Biznesinin İnkişafı Fondu” Açıq Səhmdar Cəmiyyətinin NİZAMNAMƏSİ

Azərbaycan Respublikası Prezidentinin 2025-ci il 10 dekabr tarixli Fərmanı ilə təsdiq edilmişdir

1. Ümumi müddəalar

1.1. Azərbaycan Respublikası İqtisadiyyat Nazirliyinin tabeliyindəki "Azərbaycan Biznesinin İnkişafı Fondu" Açıq Səhmdar Cəmiyyəti (bundan sonra – Cəmiyyət) "Azərbaycan Biznesinin İnkişafı Fondu" publik hüquqi şəxsin yenidən təşkili və bununla əlaqədar Azərbaycan Respublikası Prezidentinin bəzi fərmanlarında dəyişiklik edilməsi haqqında" Azərbaycan Respublikası Prezidentinin 2025-ci il 10 dekabr tarixli Fərmanına əsasən Azərbaycan Respublikası İqtisadiyyat Nazirliyinin tabeliyindəki "Azərbaycan Biznesinin İnkişafı Fondu" publik hüquqi şəxsin çevrilmə formasında yenidən təşkili yolu ilə yaradılmışdır. Cəmiyyət Azərbaycan Respublikası İqtisadiyyat Nazirliyinin tabeliyindəki "Azərbaycan Biznesinin İnkişafı Fondu" publik hüquqi şəxsin hüquqi varisidir.

1.2. Cəmiyyət iqtisadiyyatın qeyri-neft/qaz sektorunun inkişafını dəstəkləyən, sahibkarlığın maliyyə təminatını gücləndirən, investisiyaların təşviqi və sahibkarlığa dəstək mexanizmlərinin inkişafını təmin edən və vəsaitini müəyyən olunmuş qaydada yerləşdirməklə dövlətin iqtisadi inkişaf prioritetlərinə xidmət edən (bundan sonra – müvafiq sahə) dövlətə məxsus kommersiya hüquqi şəxsidir.

1.3. Cəmiyyət öz fəaliyyətində Azərbaycan Respublikasının Konstitusiyasını, Azərbaycan Respublikasının tərəfdar çıxdığı beynəlxalq müqavilələri, Azərbaycan Respublikasının qanunlarını, Azərbaycan Respublikası Prezidentinin digər fərmanlarını, həmçinin sərəncamlarını, Azərbaycan Respublikası Nazirlər Kabinetinin qərar və sərəncamlarını, Azərbaycan Respublikasının digər normativ hüquqi aktlarını və bu Nizamnaməni rəhbər tutur.

1.4. Cəmiyyətin strukturunu Cəmiyyətin aparatı, idarə, filial və nümayəndəlikləri, törəmə təsərrüfat cəmiyyətləri təşkil edir.

1.5. Cəmiyyətin müstəqil balansı, əmlakı, xəzinə və bank hesabları, öz adı həkk olunmuş möhürü, habelə müvafiq ştampları, blankları və loqotipi (emblemi) vardır.

1.6. Qanuna uyğun olaraq Cəmiyyətin əqdlər bağlamaq, öz adından əmlak və qeyri-əmlak hüquqları əldə etmək və həyata keçirmək hüququ, həmçinin vəzifələri vardır. Cəmiyyət məhkəmədə, həmçinin arbitrajlarda iddiaçı və ya cavabdeh qismində çıxış etmək hüququna malikdir.

1.7. Cəmiyyət öz vəzifələrini yerinə yetirərkən və hüquqlarını həyata keçirərkən dövlət orqanları (qurumları) ilə, yerli özünüidarəetmə orqanları ilə, beynəlxalq və qeyri-hökumət təşkilatları ilə, habelə digər hüquqi və fiziki şəxslərlə qarşılıqlı əlaqədə fəaliyyət göstərir.

1.8. Təsisçi Cəmiyyətin öhdəlikləri üçün cavabdeh deyildir və Cəmiyyətin fəaliyyəti ilə bağlı zərər üçün ona mənsub səhmlərin dəyəri həddində risk daşıyır.

1.9. Cəmiyyət təsisçinin üzərinə götürdüyü hər hansı öhdəliklərinə görə cavabdeh deyildir.

1.10. Cəmiyyətin rəsmi adı aşağıdakı kimidir:

1.10.1. tam halda − "Azərbaycan Biznesinin İnkişafı Fondu" Açıq Səhmdar Cəmiyyəti;

1.10.2. qısaldılmış halda – "ABİF" ASC;

1.10.3. ingilis dilində tam adı – "Azerbaijan Business Development Fund" Open Joint Stock Company;

1.10.4. ingilis dilində qısaldılmış adı – "ABDF" OJSC.

1.11. Cəmiyyət Bakı şəhərində yerləşir.

2. Cəmiyyətin fəaliyyət istiqamətləri

2.1. Cəmiyyətin fəaliyyət istiqamətləri aşağıdakılardır:

2.1.1. müvafiq sahədə dövlət siyasətinin formalaşdırılmasında və həyata keçirilməsində iştirak etmək;

2.1.2. müvəkkil təşkilatlar vasitəsilə və investisiya qoyuluşu formasında Azərbaycan Respublikasında sahibkarlığın inkişafına maliyyə dəstəyi göstərmək;

2.1.3. investisiyaların təşviqi üzrə investorlar üçün davamlı əlverişli mühitin yaradılması proseslərində iştirak etmək;

2.1.4. Azərbaycan Respublikası Prezidentinin müəyyən etdiyi hallarda və qaydada sahibkarlıq subyektlərinin manatla aldıqları kreditlərə zəmanət və faiz subsidiyası vermək;

2.1.5. müvafiq sahədə aidiyyəti dövlət orqanları (qurumları) ilə əməkdaşlıq etmək, təkliflərin hazırlanmasında iştirak etmək;

2.1.6. bu Nizamnamə ilə müəyyən edilmiş digər istiqamətlərdə fəaliyyət göstərmək.

3. Cəmiyyətin vəzifələri və hüquqları

3.1. Bu Nizamnamə ilə müəyyən edilmiş fəaliyyət istiqamətlərinə uyğun olaraq, Cəmiyyətin vəzifələri aşağıdakılardır:

3.1.1. müvafiq sahənin inkişafı ilə bağlı normativ hüquqi aktların, eləcə də inkişaf konsepsiyalarının və məqsədli proqramların hazırlanmasında və həyata keçirilməsində iştirak etmək;

3.1.2. Azərbaycan Respublikasının müvafiq sahədə tərəfdar çıxdığı beynəlxalq müqavilələrdən irəli gələn öhdəliklərin yerinə yetirilməsi ilə əlaqədar tədbirlərin görülməsində iştirak etmək;

3.1.3. Cəmiyyətin vəsaiti hesabına Azərbaycan Respublikasının sosial-iqtisadi inkişafının prioritet istiqamətləri çərçivəsində Cəmiyyətin Müşahidə Şurasının müəyyən etdiyi prioritet sahələrdə, o cümlədən qeyri-neft/qaz sektorunda innovativ texnologiyaların tətbiqi və ixrac əməliyyatları üzrə maliyyələşdirmə və ya təminat mexanizmləri vasitəsilə sahibkarlara dəstək göstərmək;

3.1.4. qeyri-neft/qaz sektorunda investisiya imkanlarının genişləndirilməsi və dövlət əmlakının özəlləşdirilməsi prosesində investorların iştirakının stimullaşdırılması məqsədilə müvafiq tədbirlər görmək;

3.1.5. Azərbaycan Respublikası Prezidentinin müəyyən etdiyi hallarda və qaydada sahibkarlıq subyektlərinin manatla aldıqları kreditlərə zəmanət və faiz subsidiyası vermək;

3.1.6. "İnvestisiya fəaliyyəti haqqında" Azərbaycan Respublikası Qanununun 8.1.1-ci, 8.1.2-ci və 8.1.5−8.1.7-ci maddələrində nəzərdə tutulmuş formalarda ölkə daxilində, eləcə də ölkə xaricində layihələrə investisiya qoyuluşunu həyata keçirmək;

3.1.7. Cəmiyyətə təqdim olunan investisiya layihələrinin ekspertizasını həyata keçirmək;

3.1.8. Cəmiyyətin maliyyə dayanıqlığının təmin edilməsi məqsədilə tədbirlər görmək;

3.1.9. Cəmiyyətin fəaliyyət istiqamətləri üzrə riskləri müəyyənləşdirmək, qiymətləndirmək və idarə etmək, habelə bu sahədə həyata keçirilən siyasətin optimallaşdırılması istiqamətində müvafiq tədbirlər görmək;

3.1.10. fəaliyyət istiqamətləri üzrə ayrılmış vəsaitdən təyinatına uyğun istifadə olunmasına nəzarət etmək üçün müvəkkil təşkilatlar vasitəsilə və ya müstəqil surətdə monitorinqlər aparmaq, bu vəsaitdən təyinatı üzrə istifadə edilmədikdə müvafiq tədbirlər görmək;

3.1.11. müvafiq sahədə elektron xidmətləri "Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları"nın təsdiq edilməsi və elektron hökumətlə bağlı bəzi tədbirlər haqqında" Azərbaycan Respublikası Prezidentinin 2018-ci il 12 sentyabr tarixli 263 nömrəli Fərmanına uyğun olaraq təşkil etmək;

3.1.12. Cəmiyyətin fəaliyyəti ilə bağlı daxil olan müraciətlərə "Vətəndaşların müraciətləri haqqında" və "İnformasiya əldə etmək haqqında" Azərbaycan Respublikasının qanunlarına uyğun olaraq baxmaq və qanunla müəyyən edilmiş qaydada tədbirlər görmək;

3.1.13. müvafiq sahədə təşviqat işləri təşkil etmək;

3.1.14. kargüzarlığı və vətəndaşların qəbulunu müvafiq normativ hüquqi aktların tələblərinə uyğun təşkil etmək;

3.1.15. Cəmiyyətin əməkdaşlarının əlavə təhsili və peşəkarlığının yüksəldilməsi üçün tədbirlər görmək;

3.1.16. öz fəaliyyəti haqqında əhalinin məlumatlandırılmasını, rəsmi internet səhifəsinin yaradılmasını, malik olduğu və siyahısı "İnformasiya əldə etmək haqqında" Azərbaycan Respublikasının Qanunu ilə müəyyən edilmiş açıqlanmalı olan ictimai informasiyanın həmin səhifədə yerləşdirilməsini və bu informasiyanın daim yenilənməsini təmin etmək;

3.1.17. Cəmiyyətə ayrılan büdcə vəsaitindən, kredit, qrant və digər maliyyə vəsaitindən təyinatı üzrə istifadə olunmasını təmin etmək;

3.1.18. dövlət və kommersiya sirrinin, habelə məxfilik rejiminin qorunması üçün tədbirlər görmək;

3.1.19. Cəmiyyətin informasiya təminatını təşkil etmək və onun təhlükəsizliyini təmin etmək;

3.1.20. Cəmiyyətin strukturunun və fəaliyyətinin təkmilləşdirilməsi üçün tədbirlər görmək;

3.1.21. qabaqcıl beynəlxalq təcrübəni nəzərə almaqla, müvafiq sahədə elmi-texniki nailiyyətlərin tətbiqini təmin etmək;

3.1.22. bu Nizamnamə ilə müəyyən edilmiş digər vəzifələri həyata keçirmək.

3.2. Öz vəzifələrini yerinə yetirmək üçün Cəmiyyətin aşağıdakı hüquqları vardır:

3.2.1. müvafiq sahədə normativ hüquqi aktın layihəsinin qəbul olunması, aktda dəyişiklik edilməsi, aktın şərh edilməsi, qüvvəsinin dayandırılması və ya ləğv edilməsi haqqında aidiyyəti üzrə təklif vermək;

3.2.2. müvafiq sahədə beynəlxalq müqavilələrə Azərbaycan Respublikasının tərəfdar çıxması barədə təkliflər vermək;

3.2.3. Cəmiyyətə maliyyə vəsaitinin cəlb olunması üçün tədbirlər görmək, o cümlədən maliyyə bazarlarından resursların cəlb olunması barədə danışıqlar aparmaq və təkliflər hazırlamaq;

3.2.4. investisiya mühitinin əlverişliliyinin artırılması və yeni maliyyə resurslarının cəlb olunması məqsədilə potensial investorlar üçün məlumatlandırıcı və dəstəkləyici tədbirlər görmək, bu prosesdə diaspor təşkilatları ilə və ölkədə yaşayan əcnəbilərlə investisiya təşviqi üzrə müvafiq işlər aparmaq;

3.2.5. qiymətli kağızlar (istiqraz, investisiya fond payı və s.) almaq;

3.2.6. beynəlxalq təcrübənin tətbiqi imkanlarının araşdırılması məqsədilə beynəlxalq təşkilatlarla, xarici dövlətlərin aidiyyəti dövlət orqanları (qurumları) ilə əməkdaşlıq etmək, xarici dövlətlərin müvafiq təcrübəsini öyrənmək;

3.2.7. fəaliyyət istiqamətləri üzrə rəy və təkliflər vermək, təhlillər və ümumiləşdirmələr aparmaq, analitik materiallar hazırlamaq, xüsusi bülletenlər və digər nəşrlər buraxmaq;

3.2.8. fəaliyyət istiqamətlərinə aid məsələlərlə bağlı araşdırmalar aparmaq, işçi qruplar və komissiyalar yaratmaq;

3.2.9. dövlət orqanlarına (qurumlarına), yerli özünüidarəetmə orqanlarına, fiziki və hüquqi şəxslərə zəruri məlumatlar (sənədlər) barədə sorğu vermək və onlardan belə məlumatları (sənədləri) almaq;

3.2.10. müqavilə əsasında müstəqil ekspertləri və mütəxəssisləri öz fəaliyyətinə cəlb etmək;

3.2.11. fəaliyyət istiqamətlərinə uyğun olaraq konfranslar, müşavirələr, seminarlar keçirmək və digər tədbirlər təşkil etmək, bu cür tədbirlərdə iştirak etmək;

3.2.12. əməkdaşlarını dövlət təltiflərinə və digər mükafatlara təqdim etmək, onların həvəsləndirilməsi üçün tədbirlər görmək;

3.2.13. bu Nizamnamə ilə müəyyən edilmiş digər hüquqları həyata keçirmək.

4. Cəmiyyətin nizamnamə kapitalı, əmlakı və maliyyə fəaliyyətinin əsasları

4.1. Cəmiyyətin nizamnamə kapitalı 1.180.929.648,0 (bir milyard bir yüz səksən milyon doqquz yüz iyirmi doqquz min altı yüz qırx səkkiz) manatdır və onun səhmlərinin nominal dəyərindən təşkil olunur. Nizamnamə kapitalı nominal dəyəri 1 (bir) manat olan 1.180.929.648,0 (bir milyard bir yüz səksən milyon doqquz yüz iyirmi doqquz min altı yüz qırx səkkiz) ədəd adi səhmdən ibarətdir.

4.2. Cəmiyyətin bütün səhmləri dövlətə məxsusdur. Cəmiyyətin dövlətə məxsus səhmlərinin saxlanılması və idarə olunması Azərbaycan Respublikasının İqtisadiyyat Nazirliyi tərəfindən həyata keçirilir.

4.3. Cəmiyyətin nizamnamə kapitalı bu Nizamnaməyə uyğun olaraq Cəmiyyətin mülkiyyətinə verilmiş və qanunla müəyyən edilmiş qaydada qiymətləndirilmiş aktivlərin dəyərindən təşkil olunur. Cəmiyyətin nizamnamə kapitalı puldan, qiymətli kağızlardan, başqa əmlakdan, əmlak hüquqlarından və ya pul dəyəri olan digər hüquqlardan ibarət ola bilər.

4.4. Cəmiyyətin əmlakı nizamnamə kapitalından, təsisçinin verdiyi digər əmlakdan, puldan, qiymətli kağızlardan, əmlak və qeyri-əmlak hüquqlarından və ya pul dəyəri olan digər hüquqlardan, habelə fəaliyyətindən əldə olunmuş gəlirdən, ianələrdən, qrantlardan, cəlb edilən investisiyalardan və qanunla qadağan olunmayan digər vəsaitdən formalaşır.

4.5. Cəmiyyətin əmlakının dəyəri onun balansında göstərilir.

4.6. Cəmiyyət müstəqil büdcəyə malikdir. Cəmiyyətin büdcəsi maliyyə ilinin başlamasından əvvəl Müşahidə Şurası tərəfindən təsdiq edilir.

4.7. Cəmiyyət ona verilmiş əmlakdan yalnız bu Nizamnamə ilə müəyyən olunmuş fəaliyyət istiqamətlərinə uyğun istifadə edir.

4.8. Cəmiyyətin nizamnamə kapitalının artırılması və ya azaldılması Azərbaycan Respublikasının Mülki Məcəlləsində və bu Nizamnamədə nəzərdə tutulmuş qaydada həyata keçirilir.

4.9. Cəmiyyət qanunla müəyyən edilən vergiləri və digər məcburi ödənişləri ödədikdən sonra Cəmiyyətin, onun idarə, filial və nümayəndəliklərinin, habelə törəmə cəmiyyətlərinin fəaliyyətindən əldə edilmiş vəsait üzərində müstəqil sərəncam vermək, fəaliyyət istiqamətləri üzrə yerləşdirilmiş vəsaitdən əlavə, Cəmiyyətin hesablarında qalan sərbəst vəsaiti depozit, digər maliyyə aktivlərinə və qiymətli kağızlar alınmasına yönəltmək hüququna malikdir.

5. Cəmiyyətin idarə olunması

5.1. Cəmiyyət öz fəaliyyətində və idarəetmədə mütərəqqi korporativ idarəetmə standartlarını tətbiq edir. Müşahidə Şurası Cəmiyyətin korporativ idarəetmə standartlarını təsdiq edir və onun fəaliyyətinin həmin standartlara uyğun təşkilinə nəzarət edir.

5.2. Cəmiyyətin ali idarəetmə orqanı onun ümumi yığıncağıdır. Cəmiyyətin digər idarəetmə orqanları Müşahidə Şurası və kollegial icra orqanı olan İdarə Heyətidir.

6. Cəmiyyətin ali idarəetmə orqanı

6.1. Cəmiyyətin ümumi yığıncağının səlahiyyətlərinə aşağıdakı məsələlər aid edilir:

6.1.1. Azərbaycan Respublikasının Prezidentinə:

6.1.1.1. Cəmiyyətin yenidən təşkili və ləğvi;

6.1.1.2. Cəmiyyətin nizamnaməsinin təsdiqi və nizamnamə kapitalının miqdarının müəyyən edilməsi, onlarda dəyişiklik edilməsi;

6.1.1.3. Cəmiyyətin icra orqanının yaradılması;

6.1.1.4. Cəmiyyətin Müşahidə Şurasının sədrinin və digər üzvlərinin vəzifəyə təyin və vəzifədən azad edilməsi;

6.1.2. Azərbaycan Respublikasının İqtisadiyyat Nazirliyinə:

6.1.2.1. Cəmiyyətin xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), eləcə də müstəqil auditorun rəyi ilə aidiyyəti şəxslə dəyəri Cəmiyyətin aktivlərinin 5 (beş) faizini və daha çox hissəsini təşkil edən əqdin bağlanılması haqqında qərar qəbul edilməsi;

6.1.3. Cəmiyyətin Müşahidə Şurasına:

6.1.3.1. bu Nizamnamənin 6.1.1-ci və 6.1.2-ci yarımbəndlərində qeyd edilənlər istisna olmaqla, Azərbaycan Respublikasının Mülki Məcəlləsi ilə səhmdarların ümumi yığıncağının səlahiyyətlərinə aid edilmiş digər məsələlərin həlli.

6.2. Ümumi yığıncaq növbəti və növbədənkənar ola bilər. Növbəti ümumi yığıncaq ildə bir dəfə çağırılır. Növbədənkənar ümumi yığıncaq icra orqanının və Müşahidə Şurasının təşəbbüsü, habelə İqtisadiyyat Nazirliyinin tələbi ilə çağırılır.

6.3. Ümumi yığıncağın qərarları açıq səsvermə yolu ilə iştirakçıların sadə səs çoxluğu ilə qəbul edilir və yazılı surətdə rəsmiləşdirilir.

7. Cəmiyyətin Müşahidə Şurası

7.1. Cəmiyyətin fəaliyyətinə ümumi rəhbərliyi və nəzarəti kollegial idarəetmə orqanı olan Cəmiyyətin Müşahidə Şurası (bundan sonra – Şura) həyata keçirir. Şuranın tərkibi Şuranın sədri də daxil olmaqla 5 (beş) üzvdən ibarətdir. Şuranın sədri və üzvləri Azərbaycan Respublikasının Prezidenti tərəfindən vəzifəyə təyin və vəzifədən azad edilir. Cəmiyyətin İdarə Heyətinin (bundan sonra – İdarə Heyəti) sədri və üzvləri Şuraya üzv təyin edilə bilməzlər.

7.2. Şura üzvlərinin səlahiyyət müddəti 3 (üç) ildir və onlar növbəti müddətlərə yenidən təyin edilə bilərlər.

7.3. Şura ictimai (ödənişsiz) əsaslarla fəaliyyət göstərir.

7.4. Şura öz fəaliyyətinin nəticələrinə görə ümumi yığıncaq qarşısında cavabdehdir.

7.5. Şuranın səlahiyyətləri aşağıdakılardır:

7.5.1. İdarə Heyəti üzvlərini, o cümlədən sədrini vəzifəyə təyin və vəzifədən azad etmək;

7.5.2. Cəmiyyətin ümumi yığıncağının qərarlarının icrasına və Cəmiyyətin fəaliyyətinin normativ hüquqi aktların tələblərinə uyğun təşkilinə nəzarət etmək;

7.5.3. Cəmiyyətin illik hesabatlarını və maliyyə hesabatlarını təsdiq etmək, mənfəətini və zərərini bölüşdürmək;

7.5.4. İdarə Heyəti üzvlərinin fəaliyyətinə nəzarət etmək, onların fəaliyyətini yoxlamaq, habelə ümumi yığıncaqla razılaşdırmaqla, müəyyən etdiyi əsas fəaliyyət göstəriciləri əsasında qiymətləndirmək;

7.5.5. İdarə Heyəti üzvünün şəxsi marağı ilə Cəmiyyətin mənafeyi arasında ziddiyyətə səbəb ola bilən əqdlərin bağlanılması barədə müraciətə baxaraq qərar qəbul etmək;

7.5.6. Şura üzvlərinin və İdarə Heyətinin müraciətlərinə baxmaq və qərar qəbul etmək;

7.5.7. Cəmiyyətin təsərrüfat cəmiyyətlərinin yaradılması və ya onlarda iştirak barədə, həmçinin Cəmiyyətin idarə, filial və nümayəndəliklərinin yaradılması barədə qərar qəbul etmək;

7.5.8. Cəmiyyətin fəaliyyətinə dair daxili qaydaları (o cümlədən maraqlar münaqişəsinin istisna olunması qaydasını) təsdiq etmək;

7.5.9. Şuranın yardımçı komitələrini yaratmaq və onların əsasnamələrini təsdiq etmək;

7.5.10. Audit Komitəsini yaratmaq, onun əsasnaməsini təsdiq etmək, rəhbərini və üzvlərini vəzifəyə təyin və vəzifədən azad etmək;

7.5.11. daxili audit xidməti əməkdaşlarının fəaliyyətinə nəzarət etmək və fəaliyyətinə dair hesabatlar almaq, habelə onun üzvlərini vəzifəyə təyin və vəzifədən azad etmək;

7.5.12. Cəmiyyətin audit hesabatını qəbul etmək;

7.5.13. Azərbaycan Respublikası Nazirlər Kabinetinin müəyyən etdiyi sahibkarlıq subyektlərinin güzəştli kreditlərlə maliyyələşdirilməsi, həmçinin investisiya qoyuluşunun həyata keçirilməsi qaydaları ilə tənzimlənməyən təfərrüatlı şərtlərə (maliyyələşdirilən layihələr üzrə kredit və digər maliyyələşdirmə növləri, faiz dərəcələri, müddətlər və tətbiq olunan güzəştlər, investisiya layihələrinin tərtibi və qiymətləndirilməsi, bu sahədə risklərin idarə olunması, monitorinq həyata keçirilməsi və sair) dair qaydaları təsdiq etmək;

7.5.14. müvəkkil təşkilatların seçilməsi və onlara limitlərin müəyyən edilməsi qaydasını təsdiq etmək;

7.5.15. Cəmiyyət ilə müvəkkil təşkilatlar arasında bağlanılan əməkdaşlıq müqavilələrinin nümunəvi formasını təsdiq etmək;

7.5.16. Cəmiyyətin maliyyə planlaşdırmasını təsdiq etmək;

7.5.17. Cəmiyyətin vəsaitinin səmərəli yerləşdirilməsi məqsədilə Azərbaycan Respublikasının sosial-iqtisadi inkişafının prioritet istiqamətləri çərçivəsində prioritet sahələri müəyyənləşdirmək;

7.5.18. Cəmiyyətin təsərrüfat cəmiyyətlərinin nizamnamə kapitalına investisiya qoyuluşunun müddətini müəyyən etmək;

7.5.19. Cəmiyyətin strukturunu, əməyin ödənişi fondunu, işçilərin say həddini, onların əməkhaqlarının (vəzifə maaşının, vəzifə maaşına əlavələrin, mükafatların və digər ödənişlərin) məbləğini, o cümlədən Cəmiyyətin əldə etdiyi vəsait (dövlət büdcəsindən və dövlətə məxsus digər fondlardan ayrılan vəsait istisna olmaqla) hesabına işçilərə əlavə ödənilən həvəsləndirmə forması və sistemini müəyyənləşdirmək;

7.5.20. Cəmiyyətin maliyyə-təsərrüfat fəaliyyətinin təftişinin keçirilməsi barədə qərar qəbul etmək;

7.5.21. kənar auditorun yoxlamalarının, habelə digər yoxlamaların nəticələrinə dair tədbirlər görmək;

7.5.22. Cəmiyyətin fəaliyyətinin təkmilləşdirilməsi istiqamətində zəruri tədbirlər görmək.

7.6. Şura bu Nizamnamənin 7.5.1–7.5.18-ci yarımbəndlərindəki müstəsna səlahiyyətlərinə aid edilmiş məsələlərin həllini Cəmiyyətin icra orqanına həvalə edə bilməz.

7.7. Şuranın sədri:

7.7.1. Şuranın işini təşkil edir və onun fəaliyyətinə rəhbərlik edir, habelə özünün və İdarə Heyətinin normativ hüquqi aktların tələblərinə zidd olan qərarlarını ləğv edir;

7.7.2. Şuranın iclaslarının gündəliyini müəyyənləşdirir, iclasları çağırır və iclaslara sədrlik edir;

7.7.3. öz təşəbbüsü ilə, habelə Şuranın hər hansı digər üzvünün və ya İdarə Heyəti sədrinin xahişi əsasında digər şəxsləri Şuranın iclasında iştirak etməyə dəvət edir;

7.7.4. Şuranın üzvü olmayan Cəmiyyətin əməkdaşları sırasından Şuranın katibini təyin edir;

7.7.5. Şuranın fəaliyyətinin təşkili ilə bağlı digər tədbirlər görür.

7.8. Şuranın üzvləri:

7.8.1. Şuranın səlahiyyətlərinə aid olan məsələlərin həllində iştirak edirlər;

7.8.2. Şuranın iclasının gündəliyi ilə və baxılması nəzərdə tutulmuş materiallarla əvvəlcədən tanış olurlar;

7.8.3. Şurada qəbul ediləcək qərarlara dair fikir bildirirlər və qərarların qəbul edilməsində səs verirlər;

7.8.4. Şuranın səlahiyyətlərinə aid məsələlərə onun iclaslarında baxmaq barədə təkliflər verirlər;

7.8.5. Şuranın qərarları ilə, iclas protokolları ilə və digər sənədlərlə tanış olurlar.

7.9. Şuranın katibi:

7.9.1. Şuranın iclaslarını təşkil edir;

7.9.2. bu Nizamnamənin 7.17-ci bəndində nəzərdə tutulan vəzifəni yerinə yetirir;

7.9.3. Şuranın iclaslarının protokollarını tərtib edir və imzalanmaq üçün Şuranın üzvlərinə təqdim edir;

7.9.4. Şuranın qərarlarının layihələrini hazırlayır, baxılmaq və imzalanmaq üçün Şuranın üzvlərinə təqdim edir;

7.9.5. Şuranın sədrinə hesabat verir;

7.9.6. Şuranın qəbul etdiyi qərarların aidiyyəti üzrə göndərilməsini təmin edir.

7.10. Şura üzvlərinin səlahiyyətləri onlar arasında aparılmış vəzifə bölgüsü və Şura sədrinin verdiyi tapşırıqlar əsasında müəyyən edilir.

7.11. Şuranın üzvləri adlarına xələl gətirə biləcək hərəkətlərə və çıxışlara yol verməməli, həmçinin Azərbaycan Respublikası Mülki Məcəlləsinin 49-cu və 49-1-ci maddələri ilə müəyyən edilmiş tələbləri yerinə yetirməlidirlər.

7.12. Şuranın sədri 3 (üç) ayda bir dəfədən az olmayaraq Şuranın iclaslarını çağırır və iclaslara sədrlik edir. Şuranın iclaslarının keçirilməsi təşəbbüsü ilə ümumi yığıncaq, Şuranın üzvü və ya İdarə Heyətinin sədri çıxış edir.

7.13. Şuranın iclasları onun üzvlərinin əyani (bilavasitə) iştirakı ilə, informasiya texnologiyalarından istifadə etməklə distant, habelə qarışıq formada və ya qiyabi (iclas keçirilmədən müvafiq olaraq qərar vermə (qərarı imzalama) keçirilə bilər.

7.14. Şuranın növbədənkənar iclasları Şura sədrinin və üzvlərinin, İdarə Heyəti üzvlərinin təklifi ilə çağırıla bilər. Bu cür təkliflər daxil olduqdan sonra 15 (on beş) gün müddətində Şuranın sədri növbədənkənar iclası çağırmağa borcludur.

7.15. Şuranın sədri müvəqqəti olmadıqda onun səlahiyyətlərini müvafiq əmrlə Şuranın üzvləri sırasından sədrin müəyyən etdiyi şəxs icra edir.

7.16. Gündəliyə daxil edilməmiş və ya tələb olunan aidiyyəti sənədləri iclasdan əvvəl təqdim edilməmiş məsələlər barədə, bütün iştirakçı üzvlərin razılıq verdiyi hallar istisna olmaqla, qərar qəbul edilə bilməz.

7.17. Şuranın katibi tərəfindən Şura üzvlərinə, habelə İdarə Heyətinin sədrinə və Şuranın iclaslarına dəvət olunan şəxslərə iclasın başlanmasına azı 3 (üç) iş günü qalmış bildiriş göndərilir. Bildirişdə iclasın vaxtı, yeri, gündəliyi və digər məlumatlar göstərilir. İclasın gündəliyindəki məsələlərlə bağlı materiallar bildirişə əlavə edilir.

7.18. İclasda iştirak edə bilməyən üzvlər gündəlikdəki məsələlərlə bağlı öz mövqelərini yazılı formada təqdim edə bilərlər. Səsvermə zamanı bu nəzərə alınır.

7.19. Şuranın iclasları Şura üzvlərinin azı beşdə üçü iştirak etdikdə səlahiyyətlidir. Yetərsay olmadıqda, 15 (on beş) gündən sonra yeni iclas çağırılır.

7.20. Şura üzvlərinin hər biri bir səsə malikdir.

7.21. İclasın gündəliyinə Şuranın hər hansı üzvünün maraqlarına toxunan məsələ çıxarıldıqda, həmin üzv bununla bağlı maraqları haqqında ətraflı məlumat verməli, bu məsələnin müzakirəsində və həmin məsələyə dair səsvermədə iştirak etməməlidir.

7.22. Şuranın qərarları iclasda iştirak edən üzvlərin açıq səsvermə yolu ilə sadə səs çoxluğu ilə qəbul edilir. Səslər bərabər olduqda, iclasa sədrlik edənin səsi həlledicidir.

7.23. Şuranın iclasları protokollaşdırılır. Protokolların dəqiq aparılması üçün Şuranın katibi məsuliyyət daşıyır. İclasın protokolu Şuranın sədri tərəfindən imzalanır. Şuranın üzvləri protokolun məzmunu ilə bağlı 10 (on) gün ərzində öz irad və təkliflərini təqdim edə bilərlər.

8. Cəmiyyətin icra orqanı

8.1. Cəmiyyətin fəaliyyətinə cari rəhbərliyi onun kollegial icra orqanı olan İdarə Heyəti həyata keçirir. İdarə Heyətinin tərkibi 5 (beş) üzvdən – Şura tərəfindən vəzifəyə təyin olunan və vəzifədən azad edilən sədrdən və onun 4 (dörd) müavinindən ibarətdir. İdarə Heyətinin fəaliyyətinə İdarə Heyətinin sədri rəhbərlik edir.

8.2. İdarə Heyətinin vəzifələri aşağıdakılardır:

8.2.1. Cəmiyyətin fəaliyyətini təşkil etmək;

8.2.2. Ümumi yığıncağın və Şuranın qərarlarının vaxtında və lazımi qaydada icrasını təmin etmək;

8.2.3. aidiyyəti şəxslə dəyəri Cəmiyyətin aktivlərinin 5 (beş) faizədək hissəsini təşkil edən əqdin bağlanılması haqqında qərar qəbul etmək;

8.2.4. Cəmiyyətin strateji məqsəd və planlarının, habelə büdcəsinin icrasına nəzarət etmək;

8.2.5. Cəmiyyətin struktur bölmələrinin əsasnamələrini təsdiq etmək;

8.2.6. Cəmiyyətin illik hesabatlarını və maliyyə hesabatlarını təsdiq etmək, mənfəəti və zərərin bölüşdürülməsi üçün Şuraya təkliflər vermək;

8.2.7. Cəmiyyətin inkişaf və biznes planlarının formalaşdırılması barədə Şuraya təkliflər vermək;

8.2.8. Cəmiyyətin xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), eləcə də müstəqil auditorun rəyi ilə aidiyyəti şəxslə dəyəri Cəmiyyətin aktivlərinin 5 (beş) faizini və daha çox hissəsini təşkil edən əqdin bağlanılması haqqında İqtisadiyyat Nazirliyinə təkliflər vermək;

8.2.9. Şuranın və İdarə Heyəti sədrinin səlahiyyətlərinə aid edilməyən bütün digər məsələlər barədə qərar vermək.

8.3. İdarə Heyətinin sədri rübdə bir dəfədən az olmayaraq, İdarə Heyətinin iclaslarını çağırır və iclaslara sədrlik edir. İdarə Heyəti iclaslarının keçirilməsi təşəbbüsü ilə İdarə Heyətinin üzvləri və ya Şura çıxış edir. İdarə Heyətinin iclasları əyani (onun üzvlərinin bilavasitə iştirakı ilə), distant (informasiya texnologiyalarından istifadə etməklə), habelə qarışıq və ya qiyabi (iclas keçirilmədən müvafiq olaraq qərar vermə (qərarı imzalama) formada keçirilə bilər. İdarə Heyətinin iclasları İdarə Heyəti üzvlərinin beşdə üçü iştirak etdikdə səlahiyyətlidir. İdarə Heyətinin iclasında hər üzvün bir səsi olmaqla, qərarlar açıq səsvermə yolu ilə sadə səs çoxluğu əsasında qəbul edilir. İdarə Heyətində səsvermə zamanı üzvlərin bitərəf qalmasına icazə verilmir. Səslərin sayı bərabər olduqda, iclasa sədrlik edənin səsi həlledicidir.

8.4. İdarə Heyətinin iclasına münasibətdə bu Nizamnamənin 7.17-ci, 7.18-ci və 7.21-ci bəndlərində nəzərdə tutulmuş müddəalar tətbiq edilir.

8.5. İdarə Heyətinin sədri:

8.5.1. Cəmiyyətin cari fəaliyyətinə rəhbərlik edir və onu təmsil edir;

8.5.2. İdarə Heyətinin fəaliyyətini təşkil edir, iclaslarının gündəliyini müəyyənləşdirir və iclaslarına sədrlik edir;

8.5.3. öz təşəbbüsü ilə, İdarə Heyətinin digər üzvünün və ya Şuranın təşəbbüsü ilə İdarə Heyətinin iclaslarını çağırır;

8.5.4. öz təşəbbüsü ilə, habelə İdarə Heyətinin hər hansı bir üzvünün xahişi əsasında digər şəxsləri İdarə Heyətinin iclasında iştirak etməyə dəvət edir;

8.5.5. Cəmiyyətin fəaliyyətinin təşkili ilə əlaqədar icrası məcburi olan daxili sərəncam və əmrlər verir;

8.5.6. Cəmiyyətin fəaliyyət istiqamətlərinə dair qəbul olunmuş aktların icrasını təşkil edir, yoxlayır və buna nəzarəti həyata keçirir;

8.5.7. normativ hüquqi aktlara və bu Nizamnaməyə uyğun olaraq, Cəmiyyətin üzərinə düşən vəzifələrin yerinə yetirilməsi və onun hüquqlarının həyata keçirilməsi, habelə səmərəli fəaliyyət göstərməsi üçün zəruri tədbirlər görür;

8.5.8. özünün və Cəmiyyətin struktur bölmələrinin vəzifəli şəxslərinin normativ hüquqi aktların tələblərinə zidd olan qərarlarını ləğv edir;

8.5.9. Şura tərəfindən müəyyən edilmiş struktur, əməyin ödənişi fondu və işçilərin say həddi daxilində Cəmiyyətin Aparatının və digər struktur bölmələrinin strukturunu, ştat cədvəlini və xərclər smetasını təsdiq edir;

8.5.10. Cəmiyyət işçilərinin vəzifə maaşlarının, vəzifə maaşlarına əlavələrin, mükafatların və digər ödənişlərin verilməsini əməyin ödənişi fondu çərçivəsində təşkil edir;

8.5.11. bu Nizamnamə ilə müəyyən edilmiş hallar istisna olmaqla, Cəmiyyət işçilərinin vəzifəyə təyin və vəzifədən azad edilməsi, onlar barəsində həvəsləndirmə və intizam tənbehi tədbirlərinin tətbiq edilməsi barədə qərarlar qəbul edir;

8.5.12. Cəmiyyətin əmlakından onun Nizamnaməsində nəzərdə tutulmuş fəaliyyət istiqamətlərinə uyğun istifadə olunmasına nəzarət edir;

8.5.13. bu Nizamnamə ilə müəyyən edilmiş səlahiyyətlər çərçivəsində Cəmiyyətin adından əməliyyatlar aparır, müqavilələr bağlayır və onların yerinə yetirilməsini təmin edir;

8.5.14. Cəmiyyətin fəaliyyət istiqamətləri ilə bağlı işçi qruplar yaradır;

8.5.15. Cəmiyyətdə dövlət və kommersiya sirrinin, habelə məxfilik rejiminin qorunması üçün tədbirlər görür;

8.5.16. kargüzarlıq və arxiv işinin aparılmasını təmin edir;

8.5.17. Cəmiyyətdə müraciətlərə baxılmanı və vətəndaşların qəbulunu təmin edir.

8.6. İdarə Heyətinin sədri müvəqqəti olmadıqda, onun səlahiyyətlərini İdarə Heyəti sədrinin müavinləri arasından sədrin müəyyən etdiyi şəxs icra edir.

8.7. İdarə Heyətinin üzvləri:

8.7.1. İdarə Heyətinin səlahiyyətlərinə aid olan məsələlərin həllində iştirak edirlər;

8.7.2. İdarə Heyətinin iclasının gündəliyi ilə və baxılması nəzərdə tutulmuş materiallarla əvvəlcədən tanış olurlar;

8.7.3. İdarə Heyətinin qəbul ediləcək qərarlarına dair fikir bildirirlər;

8.7.4. İdarə Heyətinin səlahiyyətlərinə aid məsələlərə İdarə Heyətinin iclaslarında baxmaq barədə təkliflər verirlər;

8.7.5. İdarə Heyətinin qərarları ilə, iclas protokolları ilə və digər sənədlərlə tanış olurlar.

8.8. İdarə Heyətinin üzvləri İdarə Heyətinin iclaslarında baxılan məsələlərə qərəzsiz yanaşmalı, İdarə Heyəti üzvünün adına xələl gətirə biləcək hərəkətlərə və çıxışlara yol verməməli, həmçinin Azərbaycan Respublikası Mülki Məcəlləsinin 49-cu və 49-1-ci maddələri ilə müəyyən edilmiş digər tələbləri yerinə yetirməlidirlər.

9. Cəmiyyətin işinin planlaşdırılması, mühasibat uçotu, maliyyə və statistik hesabatların aparılması

9.1. Cəmiyyət mühasibat uçotunu "Mühasibat uçotu haqqında" Azərbaycan Respublikasının Qanununa uyğun olaraq aparır. Cəmiyyət maliyyə hesabatlarını Maliyyə Hesabatlarının Beynəlxalq Standartlarına uyğun olaraq tərtib, təqdim və dərc edir.

9.2. Cəmiyyət "Rəsmi statistika haqqında" Azərbaycan Respublikasının Qanununa uyğun olaraq statistik uçot aparır, statistik hesabatları tərtib və təqdim edir.

9.3. Cəmiyyətin maliyyə ili yanvarın 1-dən başlayır və dekabrın 31-də başa çatır (birinci maliyyə ili qeydiyyata alındığı vaxtdan başlayır və dekabrın 31-də başa çatır).

9.4. Cəmiyyət xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin) bağlanılması barədə məlumatı mətbu orqanda dərc etdirməyə və ya Cəmiyyətin internet informasiya ehtiyatında yerləşdirməyə borcludur.

10. Audit və maliyyə nəzarəti

10.1. Cəmiyyətin, o cümlədən onun struktur bölmələrinin fəaliyyətinə nəzarətin təmin edilməsi məqsədilə daxili və kənar audit həyata keçirilir.

10.2. Daxili və kənar audit normativ hüquqi aktların və bu Nizamnamə ilə müəyyən olunmuş qaydada növbəli (plana əsasən) və ya növbədənkənar qaydada keçirilə bilər.

10.3. Cəmiyyət daxili audit xidmətini təsis edir. Daxili audit xidməti "Daxili audit haqqında" Azərbaycan Respublikasının Qanunu ilə müəyyən edilmiş vəzifələri yerinə yetirir.

10.4. Cəmiyyətin maliyyə-təsərrüfat fəaliyyətinin müstəqil (kənar) auditi "Auditor xidməti haqqında" Azərbaycan Respublikasının Qanununa uyğun olaraq həyata keçirilir.

10.5. Cəmiyyətin bütün əməkdaşları daxili auditi həyata keçirən əməkdaşların tələbi ilə zəruri olan sənədləri təqdim etməyə, onlara öz vəzifələrinin icrası üçün lazımi şərait yaratmağa borcludurlar.

10.6. Cəmiyyətdə daxili audit siyasətinin və strategiyasının hazırlanması, həyata keçirilməsi və auditor nəzarətinin təşkili üçün Şura tərəfindən Audit Komitəsi yaradılır. Cəmiyyətin fəaliyyətinin daxili auditi Audit Komitəsinin təşəbbüsü əsasında Şuranın və ya İdarə Heyətinin qərarı ilə həyata keçirilir. Audit Komitəsinin üzvləri öz fəaliyyətində müstəqildir və öz funksiyalarını icra edərkən onların müstəqil qiymət vermək, nəticələr çıxarmaq hüquqları vardır. İdarə Heyətinin üzvləri və ya Cəmiyyətin iştirakçıları Audit Komitəsinin üzvü ola bilməzlər. Audit Komitəsinin üzvlərinin səlahiyyət müddəti 2 (iki) ildir.

10.7. Cəmiyyətin Audit Komitəsinin üzvləri "Daxili audit haqqında" Azərbaycan Respublikasının Qanununda nəzərdə tutulmuş tələblərə cavab verməlidirlər.

10.8. Audit Komitəsi aşağıdakı vəzifələri yerinə yetirir:

10.8.1. Cəmiyyətdə daxili audit siyasətini və strategiyasını müəyyən edir, daxili audit planlarını təsdiq edir və daxili audit fəaliyyətinə nəzarət edir;

10.8.2. daxili audit xidmətinin rəhbəri və əməkdaşlarının vəzifə təlimatlarını, proqramlarını, daxili auditin hesabatlarını, nəzarət sisteminin təkmilləşdirilməsinə dair tövsiyələri təsdiq edir;

10.8.3. daxili nəzarət sisteminin yaradılmasına və tətbiqinə, daxili nəzarətin və risklərin idarə edilməsi sisteminin təkmilləşdirilməsinə dair İdarə Heyətinə təkliflər verir;

10.8.4. kənar auditin təyin edilməsi ilə əlaqədar İdarə Heyətinə təkliflər verir;

10.8.5. İdarə Heyətindən kənar və daxili auditorların daxili nəzarət sisteminə dair verdikləri tövsiyələrin yerinə yetirilməsinin vəziyyəti barədə məlumat əldə edir;

10.8.6. maliyyə risklərinin yüksək olduğu sahələri müəyyənləşdirir və İdarə Heyəti tərəfindən onların səmərəli idarə edilməsinə əminlik əldə edir;

10.8.7. kənar və daxili audit və ya digər yoxlamaların gedişində aşkar olunan saxtakarlıq hallarını, nöqsan və çatışmazlıqları müzakirə edir və onların aradan qaldırılması üçün İdarə Heyətinə təkliflər verir;

10.8.8. maliyyə hesabatlarına əhəmiyyətli dərəcədə təsir edə biləcək hüquqi məsələləri nəzərdən keçirir və öz tövsiyələrini verir;

10.8.9. müəssisənin illik və cari maliyyə hesabatlarının hazırlanması prosesinə və nəticələrinə nəzarət edir;

10.8.10. daxili auditorların audit nəticəsində təqdim etdiyi tövsiyələrin müzakirəsini təmin edir;

10.8.11. İdarə Heyətini daxili auditorlar tərəfindən təqdim olunmuş tövsiyələrin icrasına cəlb edir.

11. Cəmiyyətin yenidən təşkili və ləğvi Cəmiyyətin yenidən təşkili və ləğvi Azərbaycan Respublikasının Prezidenti tərəfindən həyata keçirilir.