Azərbaycan Respublikası Nazirlər Kabinetinin 2025-ci il " 22 " may tarixli 164 nömrəli Qərarı ilə təsdiq edilmişdir. Alkoqollu içkilərin pərakəndə satışına dair minimum qiymətin müəyyən edilməsi QAYDASI
1. Ümumi müddəalar
1.1. Bu Qayda "İstehlakçıların hüquqlarının müdafiəsi haqqında" Azərbaycan Respublikası Qanununun 29-1.2-ci maddəsinə uyğun olaraq hazırlanmışdır və alkoqollu içkilərin pərakəndə satışına dair minimum qiymətin müəyyən edilməsini tənzimləyir.
1.2. Bu Qaydanın məqsədləri üçün alkoqollu içkilər dedikdə pərakəndə satış ticarət obyektlərində satılan bütün araq məhsulları (meyvə araqları istisna olmaqla) (bundan sonra - məhsul) nəzərdə tutulur.
2. Məhsulun pərakəndə satışına dair minimum qiymətin müəyyən edilməsi
2.1. Məhsulun pərakəndə satışına dair minimum qiymət qablaşdırma həcmlərinə uyğun olaraq müəyyən edilir.
2.2. Pərakəndə satışa dair minimum qiymətin müəyyənləşdirilməsi üçün Azərbaycan Respublikası İqtisadiyyat Nazirliyinin (bundan sonra - Nazirlik) müraciəti əsasında illik istehsal həcmi 60 min dekalitrdən və işçi sayı 30 nəfərdən çox olan məhsul istehsalçıları tərəfindən bu Qaydaya əlavə olunmuş "Məhsulun pərakəndə qiymətinin kalkulyasiyası Forması" (bundan sonra - Forma) doldurularaq 15 (on beş) iş günü müddətində Nazirliyə təqdim olunur.
2.3. Məhsulun pərakəndə satışına dair minimum qiymət istehsalçıların bu Qaydanın 2.2-ci bəndində nəzərdə tutulmuş müddətdə müvafiq məhsul üzrə təqdim etdiyi pərakəndə satış qiymətlərinin ədədi ortası kimi müəyyən edilir.
2.4. Məhsulun pərakəndə satışına dair minimum qiymətin müəyyən edilməsi barədə qərar Forma təqdim edildikdən sonra Nazirlik tərəfindən 1 (bir) ay müddətində təsdiq edilir və təsdiq edildiyi gündən 1 (bir) ay sonra qüvvəyə minir.
2.5. Məhsulun maya dəyəri 5 faizdən çox dəyişdiyi halda bu Qaydanın 2.2-ci bəndində göstərilən istehsalçıların minimum 50 faizinin müraciəti əsasında məhsulun pərakəndə satışına dair müəyyən olunmuş minimum qiymətə bu Qaydaya uyğun olaraq yenidən baxılır.
2.6. Məhsulun pərakəndə satışına dair minimum qiymətin müəyyən edilməsi barədə qəbul edilmiş qərar haqqında məlumat Nazirlik tərəfindən "İnformasiya əldə etmək haqqında" Azərbaycan Respublikası Qanununun tələblərinə uyğun olaraq qiymətin qüvvəyə mindiyi tarixdən ən azı 30 (otuz) gün əvvəl verilir.
3. Keçid müddəa
"Qida təhlükəsizliyi haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2024-cü il 24 may tarixli 1162-VIQD nömrəli Qanununun tələblərinə uyğun olaraq bu Qaydanın 2.2-ci bəndində qeyd edilən tələb üzrə alkoqollu içki növü olan arağın illik istehsal həcmi 2030-2031-ci illər üzrə 80 min dekalitr, 2032-ci il yanvarın 1-dən 100 min dekalitr tətbiq edilir. _____________________
"Alkoqollu içkilərin pərakəndə satışına dair minimum qiymətin müəyyən edilməsi Qaydası"na
əlavə Məhsulun pərakəndə qiymətinin kalkulyasiyası FORMASI
1. Formanın təqdim edildiyi orqan barədə məlumat
1.1. Orqanın adı
2. İstehsalçı barədə məlumat
2.1. İstehsalçının adı
2.2. İstehsalçının VÖEN-i
2.3. Sahibkarlıq subyektinin kateqoriyası kiçik orta iri
3. Məhsulun vahidinin pərakəndə qiymətinə daxil olan meyarlar ________________________ Həcm* Xərclər İstehsalçı müəssisə üzrə Aksiz İstehsalçı müəssisənin qiyməti Topdansatış müəssisəsi üçün əlavə Topdansatış müəssisəsinin qiyməti Pərakəndə satış müəssisəsi üçün əlavə Pərakəndə satış qiyməti (ƏDV ilə) maya dəyəri marja ƏDV-siz ƏDV ilə ƏDV-siz ƏDV ilə CƏMİ:
əməkhaqqı və DSMF amortizasiya su təchizatı və tullantı sularının axıdılması elektrik enerjisi spirt şüşə tıxac etiket skoç şəkər tozu termokapsula qutu digər xərclər aksiz markası *Qeyd. Məlumatlar qablaşdırma tutumu 0.1 l, 0.2 l, 0.33 l, 0.5 l, 0.7 l, 0.75 l, 1.0 l, 1.5 l, 1.75 l və s. olan məhsullar üzrə ayrı-ayrılıqda doldurulur.