Azərbaycan Respublikası Nazirlər Kabinetinin 2025-ci il " 13 " mart tarixli 77 nömrəli Qərarı ilə təsdiq edilmişdir. Xəzər dənizinin (gölünün) Azərbaycan Respublikasına mənsub olan bölməsində süni torpaq sahəsinin yaradılması məqsədilə ayrılmış su fondu torpaq sahəsinin və süni torpaq sahəsinin icarə haqqının hesablanması QAYDASI
1. Bu Qayda "Xəzər dənizinin (gölünün) Azərbaycan Respublikasına mənsub olan bölməsində süni torpaq sahələrinin yaradılması haqqında" Azərbaycan Respublikasının 2024-cü il 7 may tarixli 1143-VIQ nömrəli Qanununun 9-cu maddəsinə uyğun hazırlanmışdır və süni torpaq sahəsinin yaradılması məqsədilə ayrılmış su fondu torpaq sahəsinə və süni torpaq sahəsinə görə ödənilən illik icarə haqqının məbləğinin hesablanması qaydasını müəyyən edir.
2. Xəzər dənizinin (gölünün) Azərbaycan Respublikasına mənsub olan bölməsində süni torpaq sahəsinin yaradılması məqsədilə ayrılmış su fondu torpaq sahəsinin və süni torpaq sahəsinin 100 kvadratmetri üçün illik icarə haqqının bazis qiyməti 10,0 (on) manat təşkil edir.
3. Xəzər dənizinin (gölünün) Azərbaycan Respublikasına mənsub olan bölməsində süni torpaq sahəsinin yaradılması məqsədilə ayrılmış su fondu torpaq sahəsinin və süni torpaq sahəsinin 100 kvadratmetri üçün illik icarə haqqının məbləği sahilboyu zonada yerləşən şəhər və rayonlar üzrə aşağıdakı düsturla hesablanır: Q = St x Bq x Zə + Ssf x Bq x Zə x Tə burada: Q - illik icarə haqqının məbləği; St - sahilboyu zolaqda, adada yerləşən və sahilboyu zolağa bitişik torpaq sahəsinin ölçüsü; Ssf - süni torpaq sahəsinin yaradılması məqsədilə ayrılmış su fondu torpaq sahəsinin ölçüsü (sahilboyu zolaqda, adada yerləşən və sahilboyu zolağa bitişik torpaq sahəsi çıxılmaqla); Bq - bazis qiyməti; Zə - zona əmsalı; Tə - təshih əmsalı. Xəzər dənizinin (gölünün) Azərbaycan Respublikasına mənsub olan bölməsində süni torpaq sahəsinin yaradılması məqsədilə ayrılmış su fondu torpaq sahəsinə (sahilboyu zolaqda yerləşən torpaq sahəsi çıxılmaqla) 0,6 həddində təshih əmsalı tətbiq edilir.
4. Xəzər dənizinin (gölünün) Azərbaycan Respublikasına mənsub olan bölməsi üzrə 9 zona müəyyən edilərək bu Qaydaya əlavədə göstərilən müvafiq zona əmsalları tətbiq edilir.
"Xəzər dənizinin (gölünün) Azərbaycan Respublikasına mənsub olan bölməsində süni torpaq sahəsinin yaradılması məqsədilə ayrılmış su fondu torpaq sahəsinin və süni torpaq sahəsinin icarə haqqının hesablanması Qaydası"na əlavə Xəzər dənizinin (gölünün) Azərbaycan Respublikasına mənsub olan bölməsində 100 kvadratmetr süni torpaq sahəsinin yaradılması məqsədilə ayrılmış su fondu torpaq sahəsinin və süni torpaq sahəsinin icarə haqqının məbləğinin müəyyən edilməsində tətbiq olunan zonalar və zona əmsalları Zonalar Zona əmsalları 1 25 2 15 3 10 4 8 5 7 6 5 7 2,5 8 1,5 9 1 ____________________________________________