"Yetkinlik yaşına çatmayanların işləri və hüquqlarının müdafiəsi üzrə komissiyalar haqqında Əsasnamənin təsdiq edilməsi barədə" Azərbaycan Respublikasının Qanununda (Azərbaycan Respublikasının Qanunvericilik Toplusu, 2002, № 7, maddə 388 (Cild I) aşağıdakı dəyişikliklər edilsin:
1. Adında və 1-ci maddədə "Yetkinlik yaşına çatmayanların işləri və" sözləri "Uşaq" sözü ilə əvəz edilsin.
2. Həmin Qanunla təsdiq edilmiş "Yetkinlik yaşına çatmayanların işləri və hüquqlarının müdafiəsi üzrə komissiyalar haqqında Əsasnamə" üzrə:
2.1. adında "Yetkinlik yaşına çatmayanların işləri və" sözləri "Uşaq" sözü ilə əvəz edilsin;
2.2. preambulada "yetkinlik yaşına çatmayanların işləri və" sözləri "uşaq" sözü ilə əvəz edilsin;
2.3. 1-ci maddədə "yetkinlik yaşına çatmayanlara" sözləri "uşaqlara" sözü ilə əvəz edilsin və həmin maddəyə "mülkiyyət" sözündən sonra "və təşkilati-hüquqi" sözləri əlavə edilsin;
2.4. 2-ci maddənin birinci hissəsinin birinci abzasında "Yetkinlik yaşına çatmayanların işləri və hüquqlarının müdafiəsi üzrə komissiyalar" sözləri "Komissiyalar" sözü ilə əvəz edilsin;
2.5. 3-cü maddə aşağıdakı redaksiyada verilsin:
"Maddə 3. Komissiyaların tərkibi, fəaliyyətinin təşkili və hesabatların verilməsi Komissiyalar müvafiq icra hakimiyyəti orqanları yanında həmin orqanlar tərəfindən 9-11 nəfərdən ibarət tərkibdə yaradılır. Komissiyanın cari işlərini görmək və qərarlarının icrasına nəzarəti həyata keçirmək üçün yerli komissiyalarda məsul katib, uşaq və ailələrlə iş üzrə məsləhətçi-psixoloq, Naxçıvan Muxtar Respublikasının müvafiq icra hakimiyyəti orqanı və müvafiq icra hakimiyyəti orqanı yanındakı komissiyalarda isə məsul katib (katib) vəzifələri müəyyən edilir. Həmin vəzifələr ştat cədvəlində nəzərdə tutulmaqla ödənişli vəzifələrdir. Komissiyanın digər üzvləri ictimai əsaslarla fəaliyyət göstərirlər. Azərbaycan Respublikasının müvafiq icra hakimiyyəti orqanı yanındakı komissiyanın cari işlərinin görülməsi və qərarlarının icrasına nəzarətin həyata keçirilməsi müvafiq icra hakimiyyəti orqanında yaradılan Katiblik (bundan sonra — Katiblik) tərəfindən təmin edilir. Katiblik aşağıdakı vəzifələri həyata keçirir:
1) yerli komissiyaların fəaliyyətini təhlil edir, təhlilin nəticələrinə uyğun olaraq tövsiyələr hazırlayır və Azərbaycan Respublikasının müvafiq icra hakimiyyəti orqanı yanındakı komissiyaya təqdim edir; 2) komissiyaların məsul katiblərinə (katiblərinə) metodik yardım göstərir; 3) uşaq hüquqlarının pozulması, yerli komissiyaların fəaliyyəti və uşaq müəssisələrində keçirilən monitorinqlərlə bağlı daxil olmuş müraciətləri araşdırır və araşdırmanın nəticəsi barədə Azərbaycan Respublikasının müvafiq icra hakimiyyəti orqanı yanındakı komissiyaya məlumat verir; 4) uşaq hüquqlarının müdafiəsi ilə bağlı beynəlxalq təcrübəni öyrənir və onun tətbiqi ilə bağlı təkliflərini Azərbaycan Respublikasının müvafiq icra hakimiyyəti orqanı yanındakı komissiyaya təqdim edir; 5) Azərbaycan Respublikasının müvafiq icra hakimiyyəti orqanı yanındakı komissiyanın fəaliyyəti ilə bağlı ictimaiyyəti məlumatlandırır. Komissiya üzvlərinin sayı işin həcmindən asılı olaraq, komissiyanın təşkil olunduğu müvafiq icra hakimiyyəti orqanları tərəfindən müəyyən edilir. Komissiyanın tərkibinə əmək və əhalinin sosial müdafiəsi, hüquq mühafizə orqanlarının, təhsil, səhiyyə, mədəniyyət, gənclər və idman sahələrində orqan və müəssisələrin nümayəndələri daxil edilirlər. Komissiyanın tərkibinə həmçinin digər orqan və müəssisələrin, bələdiyyələrin və qeyri-hökumət təşkilatlarının (ictimai birliklərin və fondların) nümayəndələri də daxil edilə bilərlər. Bakı şəhərinin yerli komissiyaları müvafiq icra hakimiyyəti orqanı yanındakı komissiyaya, Naxçıvan Muxtar Respublikasının yerli komissiyaları Naxçıvan Muxtar Respublikasının müvafiq icra hakimiyyəti orqanı yanındakı komissiyaya ildə 4 dəfə (rüblük, altıaylıq, doqquzaylıq, illik) gördükləri işlər barəsində hesabat verirlər. Müvafiq icra hakimiyyəti orqanı və Naxçıvan Muxtar Respublikasının müvafiq icra hakimiyyəti orqanı yanındakı komissiyalar, Bakı şəhərinin və Naxçıvan Muxtar Respublikasının yerli komissiyaları istisna olmaqla, bütün digər yerli komissiyalar ildə 4 dəfə (rüblük, altıaylıq, doqquzaylıq, illik) gördükləri işlər barəsində Katibliyə hesabat təqdim edirlər. Katiblik hesabatları ümumiləşdirərək, Azərbaycan Respublikasının müvafiq icra hakimiyyəti orqanı yanındakı komissiyaya təqdim edir.";
2.6. 4-cü maddə ləğv edilsin;
2.7. 5-ci maddə aşağıdakı redaksiyada verilsin:
"Maddə 5. Yerli komissiyaların səlahiyyətləri Yerli komissiyaların səlahiyyətləri aşağıdakılardır: 1) uşaqların hüquqlarına və qanuni mənafelərinə dair normativ hüquqi aktların layihələrinin hazırlanmasında iştirak etmək; 2) uşaqların hüquqlarının və qanuni mənafelərinin qorunması, həyat şəraitinin yaxşılaşdırılması, sağlamlığının qorunması, tərbiyəsi, təhsil alması, əmək qabiliyyətli şəxslərə məşğulluq imkanlarının yaradılması və onların asudə vaxtının səmərəli təşkili, uşaqların baxımsızlığının və kimsəsizliyinin profilaktikası sahəsində proqramların işlənib hazırlanmasında iştirak etmək və onların icrasına nəzarət etmək, uşaqların hüquq pozuntularının profilaktikasını həyata keçirən orqan və müəssisələrin fəaliyyətini əlaqələndirmək; 3) uşaqlar (himayədar ailəyə verilmiş uşaqlar, habelə Azərbaycan Respublikasının Ailə Məcəlləsinə uyğun olaraq yerləşdirilənədək — valideynlərini
itirmiş və valideyn himayəsindən məhrum olmuş uşaqlar istisna olmaqla) üzərində qəyyumluq və himayəçilik orqanının funksiyalarını həyata keçirmək; 4) təhsil müəssisələrində, habelə mülkiyyət və təşkilati-hüquqi formasından asılı olmayaraq, uşaqların işlədikləri müəssisələrdə, təşkilatlarda və idarələrdə onlar arasında tərbiyə işinin təşkilinin monitorinqini aparmaq və həmin müəssisə, təşkilat və idarələrin müdiriyyətinin (işəgötürənlərinin) uşaqların təlim-tərbiyəsi prosesinə aid məsələlərlə bağlı məlumatını komissiyanın iclaslarında dinləmək; 5) komissiyanın işi üçün lazım olan məlumatın təqdim olunmasını mülkiyyət və təşkilati-hüquqi formasından asılı olmayaraq müəssisələrin, təşkilatların və idarələrin müdiriyyətindən (işəgötürənlərindən) tələb etmək; 6) uşaqları, onların valideynlərini və ya digər qanuni nümayəndələrini şəxsən qəbul etmək, onların müraciətlərinə baxmaq, şəxsi işləri ilə tanış olmaq; 7) uşaqların tərbiyəsi, təhsili və əmək qabiliyyətli şəxslərə məşğulluq imkanlarının yaradılması ilə əlaqədar, həmçinin uşaqların pozulmuş hüquqlarının bərpası məqsədilə müvafiq dövlət orqanlarına, mülkiyyət və təşkilati-hüquqi formasından asılı olmayaraq müəssisələrə, idarələrə və təşkilatlara müraciət etmək; 8) komissiyanın qərarını yerinə yetirmədikdə və ya komissiyanın uşaqların pozulmuş hüquqlarının və qanuni mənafelərinin bərpasına dair müraciətinə baxmadıqda vəzifəli şəxslərin məsuliyyətə cəlb olunması üçün aidiyyəti dövlət orqanları qarşısında məsələ qaldırmaq; 9) valideynlərini itirmiş və valideyn himayəsindən məhrum olmuş uşaqların yaşayış yeri və olduğu yer üzrə qeydiyyatdan çıxarılmasına razılıq verilməsi məsələsinə baxmaq; 10) valideynlərini itirmiş və valideyn himayəsindən məhrum olmuş uşaqların mülkiyyətində olmuş özəlləşdirilmiş mənzil sahələri, habelə həmin uşaqların müvəqqəti yaşamadıqları, lakin özəlləşdirmə zamanı müvafiq yaşayış sahəsinə mülkiyyətçi və ya icarəçi ilə bərabər hüququ olduğu yaşayış sahəsi barəsində əqdlər yerinə yetirilərkən razılıq vermək; 11) insan alveri qurbanlarına yardım mərkəzlərində və insan alveri qurbanlarının müvəqqəti yaşaması üçün sığınacaqlarda saxlanılan uşaqlar barədə dərhal məlumat almaq; 12) insan alverinin qurbanı olmuş uşaqlara sığınacaq verilmə müddətinin uzadılması barədə vəsatət vermək; 13) cinayət törədərkən on dörd yaşından on səkkiz yaşınadək olmuş və Azərbaycan Respublikasının məhkəmələri tərəfindən məhkum olunmuş şəxslərin əfv olunması barədə müraciət etmək; 14) uşaqların hüquqlarını pozan, yaxud onları qanunazidd əməllər törətməyə təhrik və cəlb edən şəxslərin məsuliyyətə cəlb olunması üçün aidiyyəti dövlət orqanlarına müraciət etmək; 15) uşaqların qanunazidd əməllərinin törədilməsi səbəblərini öyrənmək, onların qarşısının alınması və aradan qaldırılması məqsədilə tədbirlər həyata keçirmək; 16) komissiyanın iclasında baxılan məsələlər barəsində məlumatlar və izahatlar almaq üçün vəzifəli şəxsləri, mütəxəssisləri, ekspertləri və digər şəxsləri komissiyanın iclaslarına dəvət etmək; 17) cinayət törətmiş, lakin cinayət məsuliyyətinə cəlb olunması üçün Azərbaycan Respublikasının cinayət qanunvericiliyi ilə müəyyən edilmiş yaş
həddinə çatmamış uşaqlar barəsində müvafiq dövlət orqanlarından daxil olan materiallara baxmaq; 18) spirtli içkilər içən, narkotik vasitələr və psixotrop maddələr qəbul edən uşaqlar barəsində materialları müalicə-profilaktika və reabilitasiya tədbirlərinin həyata keçirilməsi üçün müvafiq tibb müəssisələrinə göndərmək; 19) uşağın törətdiyi cinayətə görə müəyyən edilmiş cəzadan daha yüngül cəza təyin edilməsi haqqında, cəzanın çəkilməmiş hissəsinin daha yüngül cəza növü ilə əvəz edilməsi haqqında, şərti məhkum etmə haqqında, məhkumluğun vaxtından əvvəl götürülməsi haqqında, cəzadan şərti olaraq vaxtından əvvəl azad etmə haqqında məhkəmə qarşısında vəsatət qaldırmaq; 20) komissiyanın təşəbbüsü ilə qaldırılan və uşaqların hüquqlarının və qanuni mənafelərinin qorunması ilə bağlı işlərə məhkəmədə baxılması zamanı iştirak etmək; 21) uşağın islah olunması ilə əlaqədar qapalı tipli xüsusi təlim-tərbiyə müəssisəsində saxlanılmasına zərurət aradan qalxdıqda onun vaxtından əvvəl müəssisədən azad edilməsi haqqında qapalı tipli xüsusi təlim-tərbiyə müəssisəsinin müdiriyyəti ilə birgə məhkəməyə təqdimat vermək; 22) tərbiyə müəssisələrindən, açıq və qapalı tipli xüsusi təlim-tərbiyə müəssisələrindən buraxılmış uşaqlar üçün əmək və məişət şəraitinin yaradılmasında onlara yardım göstərmək, dövlət yardımına ehtiyacı olan uşaqları müəyyən etmək və onlara yardım göstərmək, uşaqların sosial reabilitasiyası üzrə normativ hüquqi aktlarda nəzərdə tutulmuş digər funksiyaları həyata keçirmək; 23) müvafiq icra hakimiyyəti orqanının uşaqlarla iş üzrə inspektorlarından zəruri məlumatlar almaq; 24) internat, uşaq evlərində, açıq və qapalı tipli xüsusi təlim-tərbiyə müəssisələrində, tərbiyə müəssisələrində, qəbul-bölüşdürmə məntəqələrində saxlanılan uşaqların şəxsiyyətini təsdiq edən sənədləri əldə etmək mümkün olmadıqda həmin sənədlərin əldə edilməsi məqsədilə müvafiq icra hakimiyyəti orqanına müraciət etmək; 25) valideynlər vəfat etdikdə, yaxud valideynlik hüquqlarından məhrum edilmiş valideynlərin yaşayış sahəsi məcburi dəyişdirildikdə, valideynlərini itirmiş və valideyn himayəsindən məhrum olmuş uşaqların hüququ olduğu yaşayış sahəsini normativ hüquqi aktlara uyğun olaraq özəlləşdirmək və həmin yaşayış sahəsi məcburi dəyişdirildiyi halda valideynlərini itirmiş və valideyn himayəsindən məhrum olmuş uşaqların mülkiyyətinə keçməsi barədə müqavilə bağlamaq; 26) bu Qanun və digər normativ hüquqi aktlarla müəyyən edilmiş başqa səlahiyyətlər.";
2.8. 6-cı və 7-ci maddələrin birinci hissələrinin 1-ci (hər üç halda), 2-ci və 5-ci bəndlərində ismin müvafiq hallarında "yetkinlik yaşına çatmayanlar" sözləri ismin müvafiq hallarında "uşaqlar" sözü ilə əvəz edilsin;
2.9. III fəslin adında "İNTİZAM TƏSİR TƏDBİRLƏRİ" sözləri "KOMİSSİYALAR TƏRƏFİNDƏN UŞAQLAR, VALİDEYNLƏR VƏ YA DİGƏR QANUNİ NÜMAYƏNDƏLƏR BARƏSİNDƏ TƏTBİQ EDİLƏN TƏDBİRLƏR" sözləri ilə əvəz edilsin;
2.10. 8-ci və 9-cu maddələr aşağıdakı redaksiyada verilsin:
"Maddə 8. İnzibati xətalar haqqında işlərə komissiyalar tərəfindən baxılması
Uşaqlar barəsində müvafiq dövlət orqanlarından daxil olan inzibati xətalar haqqında işlərə komissiyalar baxır və bu Əsasnamənin 9-cu maddəsinin birinci hissəsinin 1—4-cü bəndlərində nəzərdə tutulmuş intizam təsir tədbirləri tətbiq edirlər. Komissiyalar həmçinin Azərbaycan Respublikası İnzibati Xətalar Məcəlləsinin 189.1, 189.3, 189.4, 212.3, 512 və 522-ci maddələrində nəzərdə tutulmuş inzibati xətalar haqqında işlərə baxır və inzibati xəta törətmiş şəxslər barəsində inzibati tənbeh tətbiq edirlər. Maddə 9. Hüquq pozuntusu törətmiş uşaqlar barəsində tətbiq edilən intizam təsir tədbirləri və fərdi profilaktik iş Komissiyalar qanunazidd əməllərin xarakterini və səbəblərini, uşaqların yaşını, həyat şəraitini, qanunazidd əməlin törədilməsində iştirak dərəcəsini, habelə məişətdə, məktəbdə və ya işdə davranışını nəzərə almaqla onların barəsində aşağıdakı intizam təsir tədbirlərini tətbiq edirlər: 1) xəbərdarlıq etmək; 2) uşaq müstəqil əməkhaqqına malikdirsə və zərərin məbləği otuz üç manatdan artıq deyildirsə, vurduğu zərəri ödəmək, yaxud maddi zərərin otuz üç manatdan artıq olmayan məbləğdə nəticələrini öz əməyi ilə aradan qaldırmaq vəzifəsini onun öhdəsinə qoymaq; 3) uşaqları valideynlərinin və ya digər qanuni nümayəndələrinin nəzarətinə vermək; 4) on beş yaşından on səkkiz yaşınadək olan uşaqların öz qazancını və ya təqaüdünü müstəqil xərcləmək hüququndan məhrum edilməsi üçün tədbirlər görmək; 5) böyük ictimai təhlükə törətməyən və ya az ağır cinayət törətmiş, cinayət məsuliyyətinə cəlb olunması üçün Azərbaycan Respublikasının cinayət qanunvericiliyində nəzərdə tutulmuş yaş həddinə çatmamış, habelə müxtəlif hüquqpozmalara görə daxili işlər orqanlarında profilaktiki qeydiyyatda olan, lakin islah olunması mümkün olmayan uşaqları açıq tipli xüsusi təlim-tərbiyə müəssisəsinə göndərmək; 6) çətin tərbiyə olunan uşaqları onların valideynlərinin və ya digər qanuni nümayəndələrinin razılığı ilə açıq tipli xüsusi təlim-tərbiyə müəssisəsinə göndərmək; 7) ağır və ya xüsusilə ağır cinayət törətmiş, lakin cinayət məsuliyyətinə cəlb olunması üçün Azərbaycan Respublikasının cinayət qanunvericiliyində nəzərdə tutulmuş yaş həddinə çatmamış uşağın qapalı tipli xüsusi təlim-tərbiyə müəssisəsinə göndərilməsi barədə məhkəmə qarşısında vəsatət qaldırmaq. Açıq və qapalı tipli xüsusi təlim-tərbiyə müəssisələrinin fəaliyyətinin hüquqi əsasları müvafiq icra hakimiyyəti orqanı tərəfindən müəyyən edilir. Bu maddənin birinci hissəsinin 1—4-cü bəndlərində göstərilən tədbirlər nəticə vermədikdə, törətdikləri əməllərə görə inzibati məsuliyyətə cəlb olunması üçün on altı yaşından on səkkiz yaşınadək olan uşaqlar barəsində inzibati xətalar haqqında işlər komissiya tərəfindən aidiyyəti dövlət orqanlarına geri qaytarılır.
Hüquq pozuntusu törətmiş uşaqlar barəsində "Yetkinlik yaşına çatmayanların baxımsızlığının və hüquq pozuntularının profilaktikası haqqında" Azərbaycan Respublikasının Qanununa uyğun olaraq fərdi profilaktik iş aparılır. Qeyd:
1. Xəbərdarlıq etmək şəxsə onun əməli nəticəsində vurulmuş ziyanın, əməlin təhlükəlilik dərəcəsini və xarakterini izah etməkdən, eləcə də həmin əməlin təkrar törədiləcəyi təqdirdə onun barəsində daha sərt intizam təsir tədbirinin tətbiq ediləcəyinin xatırladılmasından ibarətdir.
2. Nəzarətə vermək valideynlərin və ya digər qanuni nümayəndələrin üzərinə uşağa tərbiyəvi təsir göstərmək və onun davranışına nəzarət etmək vəzifəsinin qoyulmasından ibarətdir.";
2.11. 10-cu maddə üzrə:
2.11.1. adında "Yetkinlik yaşına çatmayanların" sözləri "Uşaqların" sözü ilə əvəz edilsin;
2.11.2. birinci hissə üzrə:
2.11.2.1. birinci abzasda "Yetkinlik yaşına çatmayanların" sözləri "Uşaqların" sözü ilə əvəz edilsin;
2.11.2.2. 2-ci bənddə "yetkinlik yaşına çatmayanlar" sözləri "uşaqlar" sözü ilə əvəz edilsin;
2.11.2.3. 4-cü bənd aşağıdakı redaksiyada verilsin:
"4) hərəkətləri və ya davranışları ilə uşağın sağlamlığını və ya həyatını birbaşa təhlükə altında qoyduqda uşağın qanuni nümayəndələrindən Azərbaycan Respublikasının Ailə Məcəlləsində nəzərdə tutulmuş qaydada təcili alınması ilə bağlı tədbirlər görmək.";
2.12. IV fəslin adında "YETKİNLİK YAŞINA ÇATMAYANLARIN" sözləri "UŞAQLARIN" sözü ilə əvəz edilsin;
2.13. 11-ci maddənin birinci hissəsi üzrə:
2.13.1. birinci abzasda, 1-ci və 3-cü bəndlərdə ismin müvafiq hallarında "yetkinlik yaşına çatmayanlar" sözləri ismin müvafiq hallarında "uşaqlar" sözü ilə əvəz edilsin;
2.13.2. 4-cü bəndə "mülkiyyət" sözündən sonra "və təşkilati-hüquqi" sözləri əlavə edilsin;
2.14. 12-ci maddə üzrə:
2.14.1. üçüncü hissə üzrə:
2.14.1.1. 1-ci bənddə "yetkinlik yaşına çatmayana" sözləri "uşağa" sözü ilə əvəz edilsin;
2.14.1.2. 4—6-cı bəndlərdə "yetkinlik yaşına çatmayanların" sözləri "uşaqların" sözü ilə əvəz edilsin;
2.14.2. dördüncü hissədə "yetkinlik yaşına çatmayanın" sözləri "uşağın" sözü ilə əvəz edilsin;
2.15. 13-cü maddə üzrə:
2.15.1. birinci hissə üzrə:
2.15.1.1. birinci cümlədə "yetkinlik yaşına çatmayan şəxs" sözləri "uşaq" sözü ilə, "yetkinlik yaşına çatmayanlar" sözləri "uşaqlar" sözü ilə əvəz edilsin;
2.15.1.2. ikinci cümlədə "Yetkinlik yaşına çatmayanların" sözləri "Uşaqların" sözü ilə, "yetkinlik yaşına çatmayanın" sözləri "uşağın" sözü ilə əvəz edilsin;
2.15.2. ikinci hissədə "yetkinlik yaşına çatmayanların" sözləri "uşaqların" sözü ilə, "yetkinlik yaşına çatmayan" sözləri "uşaq" sözü ilə əvəz edilsin;
2.16. 14-cü maddə üzrə:
2.16.1. ikinci hissədə "yetkinlik yaşına çatmayan" sözləri "uşaq" sözü ilə əvəz edilsin;
2.16.2. beşinci hissədə "yetkinlik yaşına çatmayanlar" sözləri "uşaqlar" sözü ilə, "yetkinlik yaşına çatmayanın" sözləri "uşağın" sözü ilə əvəz edilsin;
2.16.3. altıncı hissədə "yetkinlik yaşına çatmayan" sözləri "uşaq" sözü ilə əvəz edilsin;
2.16.4. yeddinci hissədə "yetkinlik yaşına çatmayan şəxsin" sözləri "uşağın" sözü ilə əvəz edilsin;
2.16.5. doqquzuncu hissədə "yetkinlik yaşına çatmayanın" sözləri "uşağın" sözü ilə əvəz edilsin;
2.16.6. on birinci hissənin birinci cümləsində "Yetkinlik yaşına çatmayana" sözləri "Uşağa" sözü ilə, "yetkinlik yaşına çatmayanı" sözləri "uşağı" sözü ilə əvəz edilsin;
2.17. 15-ci maddə üzrə:
2.17.1. ikinci hissənin 6-cı bəndində "yetkinlik yaşına çatmayanın" sözləri "uşağın" sözü ilə əvəz edilsin;
2.17.2. dördüncü hissənin ikinci cümləsinə "mülkiyyət" sözündən sonra "və təşkilati-hüquqi" sözləri əlavə edilsin;
2.18. 16-cı maddə üzrə:
2.18.1. ikinci hissədə "günədək müddətdə" sözləri "(üç) gün müddətində" sözləri ilə, "yetkinlik yaşına çatmayana" sözləri "uşağa (uşağın qanuni nümayəndəsinə)" sözləri ilə əvəz edilsin;
2.18.2. aşağıdakı məzmunda üçüncü hissə əlavə edilsin:
"Qəbul edilmiş qərarların surəti 3 (üç) gün müddətində komissiyalar tərəfindən həmçinin Katibliyə göndərilir.".