2025-ci il yanvarın 29-da keçirilmiş bələdiyyə seçkilərində 115 saylı Şəki kənd seçki dairəsindən Kiçik Dəhnə bələdiyyəsi üzvlüyünə qeydə alınmış namizəd Qasımov Mahir Təmraz oğlu 2025-ci il fevralın 10-da Azərbaycan Respublikasının Mərkəzi Seçki Komissiyasına (bundan sonra – Mərkəzi Seçki Komissiyası) müraciət edərək həmin seçki dairəsi dairə seçki komissiyasının 1 fevral 2025-ci il tarixli 9/16 saylı Qərarını mübahisələndirərək, bununla bağlı müvafiq tədbirlərin görülməsini xahiş etmişdir.
Müraciət Azərbaycan Respublikası Seçki Məcəlləsinin (bundan sonra – Seçki Məcəlləsi) 112-ci və 112-1-ci maddələrinə uyğun olaraq Mərkəzi Seçki Komissiyasının nəzdində ekspert qrupunun üzvü tərəfindən araşdırılıb və bu barədə müvafiq rəy verilərək Komissiyanın iclasında baxılıb.
Araşdırma ilə bağlı müraciət etmiş namizədlə əlaqə saxlanılmış, araşdırma və iclasda iştirak etmək, həmçinin digər hüquqlarının olması izah edilmişdir. Namizəd əlavə sənəd və materialların olmadığını bildirmiş, eləcə də dəvət olunsa da araşdırma və Komissiyanın iclasında iştirak etməmişdir.
Qeydə alınmış namizəd M. T. Qasımov müraciətində 115 saylı Şəki kənd seçki dairəsinin Kiçik Dəhnə bələdiyyəsinə seçki keçirilən 32, 34 və 35 saylı seçki məntəqələrində səsvermə prosesi başa çatdıqdan sonra səslərin hesablanmasında qanun pozuntularına yol verildiyini iddia edərək həmin seçki məntəqələri üzrə səsvermənin nəticələrinin ləğv edilməsini xahiş etmişdir. Ərizəçi tərəfindən müraciətə 1 akt, 2 elektron məlumat daşıyıcısında 1 videogörüntü və 2 audioyazı əlavə edilmişdir.
Müəyyən edilmişdir ki, qeydə alınmış namizəd M. T. Qasımov dairə seçki komissiyasına müraciət edərək 32, 34 və 35 saylı seçki məntəqələrində səsvermə günü qanun pozuntularına yol verildiyini, o cümlədən səslərin düzgün hesablanmadığını iddia etmiş, qeyd edilən seçki məntəqələri üzrə səsvermənin nəticələrinin ləğv edilməsini tələb etmişdir. Həmin müraciətdə iddia edilən pozuntular dairə seçki komissiyası tərəfindən araşdırılmış, komissiyanın 1 fevral 2025-ci il tarixli 9/16 saylı qərarı ilə müraciət əsassız hesab olunaraq təmin edilməmişdir.
Araşdırma ilə əlaqədar dairə seçki komissiyasından müvafiq sənədlər alınaraq araşdırma materiallarına əlavə edilmiş və təkrarən araşdırılmışdır.
Mərkəzi Seçki Komissiyasında aparılmış tam, hərtərəfli, obyektiv araşdırma zamanı 115 saylı Şəki kənd seçki dairəsi dairə seçki komissiyasının sədrindən, üzvlərindən və namizədin mübahisələndirdiyi seçki məntəqələri üzrə müvafiq seçki subyektlərindən, o cümlədən səsvermə günü həmin seçki məntəqələrində səsvermə prosesini, səslərin hesablanmasını və protokolların tərtib edilməsini müşahidə etmiş müşahidəçilər, qeydə alınmış, lakin seçilməmiş digər namizədlər, məntəqə seçki komissiyalarının sədrləri, katibləri, üzvləri tərəfindən verilmiş izahatlarla səslərin seçki məntəqəsində hesablanmaması iddiası öz təsdiqini tapmamışdır. Araşdırma ilə əlaqədar belə nəticəyə gəlinmişdir ki, məntəqə seçki komissiyaları tərəfindən səsvermənin nəticələrinə dair protokollar Seçki Məcəlləsində nəzərdə tutulmuş qaydada və müddətdə tərtib edilərək 115 saylı Şəki kənd seçki dairəsinin dairə seçki komissiyasına çatdırılmışdır. Təqdim edilmiş videogörüntünün və audioyazıların araşdırılması zamanı səsvermə günü seçki məntəqəsində hər hansı qanun pozuntusu müşahidə edilməmişdir.
Bundan əlavə nəticələri mübahisələndirilən 34 saylı seçki məntəqəsində quraşdırılmış veb-kamera görüntülərinə baxış keçirilmiş, səsvermə prosesində və səslərin hesablanmasında hər hansı qanun pozuntusu müşahidə olunmamışdır.
Araşdırma ilə müəyyən edilmişdir ki, 115 saylı Şəki kənd seçki dairəsi dairə seçki komissiyası mübahisələndirilən qərarla düzgün hüquqi nəticəyə gəlmiş, namizədin səsvermə günü baş verdiyi ehtimal edilən qanun pozuntuları ilə əlaqədar müraciətinə qanunla nəzərdə tutulmuş qaydada və müddətdə baxmış, o cümlədən Seçki Məcəlləsinin normalarını düzgün tətbiq etməklə əsaslandırılmış qərar qəbul etmişdir.
Beləliklə, 115 saylı Şəki kənd seçki dairəsindən Kiçik Dəhnə bələdiyyəsi üzvlüyünə qeydə alınmış namizəd M. T. Qasımovun müraciəti əsassız olduğundan təmin edilməməli və həmin seçki dairəsi dairə seçki komissiyasının 1 fevral 2025-ci il tarixli 9/16 saylı qərarı dəyişdirilmədən saxlanılmalıdır.
Yuxarıda göstərilənləri əsas götürərək, Mərkəzi Seçki Komissiyası Seçki Məcəlləsinin 19.4-cü, 28.2-ci, 112-ci və 112-1-ci maddələrinə əsasən qərara alır:
1. 2025-ci il yanvarın 29-da keçirilən bələdiyyə seçkilərində 115 saylı Şəki kənd seçki dairəsindən Kiçik Dəhnə bələdiyyəsi üzvlüyünə qeydə alınmış namizəd Qasımov Mahir Təmraz oğlunun 10 fevral 2025-ci il tarixli 45 saylı müraciəti əsassız olduğundan təmin edilməsin, dairə seçki komissiyasının 1 fevral 2025-ci il tarixli 9/16 saylı qərarı dəyişdirilmədən saxlanılsın.
2. Bu Qərar dərc edildiyi gündən qüvvəyə minir.
Sədr Məzahir Pənahov Katib Arifə Muxtarova Katib Mikayıl Rəhimov