Azərbaycan Respublikasının işğaldan azad edilmiş ərazilərində kənd təsərrüfatı təyinatlı torpaqların sahibkarlıq subyektlərinə icarəyə verilməsi üzrə…

1. Ümumi müddəalar

1.1. Bu Qaydalar "Torpaq icarəsi haqqında" Azərbaycan Respublikası Qanununun 10-1.8-ci maddəsinə uyğun olaraq hazırlanmışdır və Azərbaycan Respublikasının işğaldan azad edilmiş ərazilərində sahibkarlıq subyektlərinə icarəyə verilməsi nəzərdə tutulmuş kənd təsərrüfatı təyinatlı torpaqlar (bundan sonra − torpaqlar) üzrə investisiya müsabiqələri keçirilməsinin müvəqqəti qaydalarını müəyyən edir.

1.2. İnvestisiya müsabiqəsi icarəyə verilən torpaqlardan səmərəli istifadəni təmin edən investisiya layihələrinin seçilməsi məqsədilə keçirilir.

2. Müsabiqənin təşkili

2.1. Müsabiqə Azərbaycan Respublikasının Kənd Təsərrüfatı Nazirliyi (bundan sonra − Nazirlik) tərəfindən "Elektron kənd təsərrüfatı" informasiya sisteminin (bundan sonra − EKTİS) "kənd təsərrüfatı təyinatlı torpaqların istifadəsi" altsistemi vasitəsilə təşkil edilir.

2.2. Nazirlik müsabiqənin təşkili üçün aşağıdakıları təmin edir:

2.2.1. müsabiqənin keçirilməsi üçün bu Qaydaların 3.1-ci bəndi ilə müəyyən edilmiş tərkibdə komissiya (bundan sonra − Komissiya) yaradır və fəaliyyətini təşkil edir;

2.2.2. müsabiqə keçirilməsi haqqında elanın hazırlanmasını və bu Qaydaların 2.3-cü bəndinə uyğun olaraq dərc edilməsini təmin edir;

2.2.3. müsabiqədə iştirak etmək üçün ərizəni və bu Qaydaların 2.4.6-cı yarımbəndində göstərilən sənədləri (məlumatları) ərizəçilərdən EKTİS vasitəsilə qəbul edir;

2.2.4. ərizə qəbulu müddəti başa çatdıqdan sonra daxil olmuş ərizələri Komissiyaya təqdim edir;

2.2.5. müsabiqə başa çatdıqdan sonra 3 (üç) iş günü müddətində Nazirliyin rəsmi internet səhifəsində müsabiqənin nəticələri haqqında məlumatı dərc edir.

2.3. Müsabiqə keçirilməsi haqqında elan müsabiqənin keçirildiyi gündən azı 45 (qırx beş) gün əvvəl Nazirliyin rəsmi internet səhifəsində dərc edilməlidir.

2.4. Müsabiqə keçirilməsi haqqında elanda aşağıdakılar göstərilir:

2.4.1. investisiya layihəsinin həyata keçiriləcəyi torpaq sahəsinin yerləşdiyi yer və xüsusiyyətləri (keyfiyyət göstəricisi, su mənbələrinin, tikililərin, infrastrukturun, yaşıllıqların mövcudluğu, torpağın məqsədli təyinatı (əkin və ya çoxillik əkmə), dəmyə və ya suvarılan olması, suvarma kanalından, elektrik xətlərindən və yoldan əraziyə qədər olan məsafə və s.), bu Qaydaların 4.16-cı bəndinə uyğun olaraq icarəyə verilmə müddətləri);

2.4.2. investisiya layihəsinin istiqaməti (əkinçilik, tərəvəzçilik, bağçılıq, heyvandarlıq, istixana təsərrüfatı, kənd təsərrüfatı məhsullarının emalı və s.);

2.4.3. ərizə qəbulunun başlanma və bitmə müddəti (günü və saatı);

2.4.4. ərizələrin qəbul ediləcəyi informasiya sistemi haqqında məlumat;

2.4.5. investisiya layihəsinə dair bu Qaydaların 4.9-cu bəndində nəzərdə tutulmuş şərtlər və bu Qaydaların 4.10-cu bəndində nəzərdə tutulmuş qiymətləndirmə meyarları;

2.4.6. müsabiqədə iştirak üçün ərizəçilər tərəfindən təqdim ediləcək aşağıdakı sənədlər (məlumatlar):

2.4.6.1. fiziki şəxs olduqda — şəxsiyyətini təsdiq edən sənədin surəti, qeydiyyat ünvanı, VÖEN-i və vergi ödəyicisi kimi uçota alınması haqqında digər məlumatlar, əlaqə nömrələri, elektron poçt ünvanı;

2.4.6.2. hüquqi şəxs olduqda — hüquqi şəxslərin dövlət reyestrindən çıxarışın, onun nümayəndəsinin səlahiyyətini və şəxsiyyətini təsdiq edən sənədlərin surətləri, VÖEN-i və vergi ödəyicisi kimi uçota alınması haqqında digər məlumatlar, əlaqə nömrələri, elektron poçt ünvanı;

2.4.6.3. ərizəçinin oxşar layihələrin icrası sahəsində təcrübəyə malik olması, habelə idarəetmə imkanlarına, biliklərə, innovasiyaya, texnologiyalara və ya onların hazırlanması və ya cəlb edilməsi imkanlarına malik olması barədə özünün hazırladığı məlumat və təsdiqedici sənədlər;

2.4.6.4. ərizəçinin Azərbaycan Respublikasında vergilər və digər icbari ödənişlər üzrə vaxtı keçmiş öhdəliklərinin və riskli vergi ödəyicisi olmaması barədə təsdiqedici sənədlər;

2.4.6.5. ərizəçinin son maliyyə ili üzrə maliyyə hesabatı, habelə azı son 12 aylıq dövrü əhatə edən bank dövriyyəsi barədə bank (banklar) tərəfindən verilmiş arayış (cari ildə fəaliyyətə başlama halında — maliyyə vəziyyəti barədə hesabat və bank dövriyyəsi barədə bank tərəfindən verilmiş arayış, bütün fəaliyyət dövrünü əhatə etməklə);

2.4.6.6. müsabiqədə iştirak haqqının ödənildiyini təsdiq edən sənəd;

2.4.7. Komissiyanın yerləşdiyi ünvan, telefon nömrələri və elektron poçt ünvanı;

2.4.8. müsabiqədə iştirak haqqının məbləği (hər iştirak üzrə 50 manat) və iştirak haqqının köçürüləcəyi Nazirliyin müvafiq bank hesabı.

2.5. Müsabiqədə iştirak üçün nəzərdə tutulan sənədlərin və ya məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və ya məlumatlar sahibkarlıq subyektindən tələb edilmir. Belə sənədlərin və ya məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi sahibkarlıq subyektinin razılığı ilə sorğu əsasında müvafiq dövlət orqanından (qurumundan) tələb olunur və ya sahibkarlıq subyekti tərəfindən təmin edilir.

3. Komissiyanın fəaliyyəti

3.1. Komissiya Nazirlik tərəfindən təyin edilən sədr də daxil olmaqla 9 (doqquz) üzvdən — Nazirliyin (2 nəfər), Azərbaycan Respublikası İqtisadiyyat Nazirliyinin (2 nəfər), Azərbaycan Respublikası Ekologiya və Təbii Sərvətlər Nazirliyinin (1 nəfər), Azərbaycan Respublikası Rəqəmsal İnkişaf və Nəqliyyat Nazirliyinin (1 nəfər), Azərbaycan Respublikası Dövlət Şəhərsalma və Arxitektura Komitəsinin (1 nəfər), Azərbaycan Dövlət Su Ehtiyatları Agentliyinin (1 nəfər), torpaq sahəsinin yerləşdiyi ərazi üzrə Azərbaycan Respublikası Prezidentinin Xüsusi Nümayəndəliyinin (1 nəfər) nümayəndələrindən ibarətdir.

3.2. Komissiyanın əsasnaməsini Nazirlik təsdiq edir.

3.3. Komissiya:

3.3.1. ərizəçilərdən EKTİS vasitəsilə qəbul olunmuş sənədlərin (məlumatların) tamlığını və düzgünlüyünü araşdırır, onların bu Qaydaların tələblərinə uyğun olubolmadığını müəyyən edir;

3.3.2. bu Qaydaların 4.2-ci və 4.5-ci bəndlərinə uyğun olaraq qərar qəbul edir;

3.3.3. müsabiqə iştirakçılarının təqdim etdiyi investisiya layihələrini təhlil edir;

3.3.4. müsabiqə qalibinin müəyyən edilməsi barədə qərar qəbul edir;

3.3.5. müsabiqənin protokollarını, o cümlədən yekun protokolu rəsmiləşdirir;

3.3.6. əsasnaməsinə uyğun olaraq digər tədbirlər görür.

3.4. Komissiyanın qərarları hər bir Komissiya üzvünün bir səsi olmaqla, açıq səsvermə yolu ilə, iclasda iştirak edən Komissiya üzvlərinin sadə səs çoxluğu ilə qəbul edilir. Komissiyanın iclaslarında onun üzvlərinin azı üçdə ikisi iştirak etdikdə Komissiya səlahiyyətlidir. Səslər bərabər olduqda, Komissiya sədrinin səsi həlledici hesab olunur. Komissiya üzvləri səsvermə zamanı bitərəf qala bilməzlər.

3.5. Komissiyanın qərarları onun sədri və Komissiyanın iclasında iştirak edən bütün üzvləri tərəfindən imzalanmış protokollarla rəsmiləşdirilir.

3.6. Komissiyanın qərarından inzibati qaydada və (və ya) məhkəmə qaydasında şikayət verilə bilər.

4. İnvestisiya müsabiqəsinin keçirilməsi

4.1. Ərizəçilər müsabiqədə iştirak üçün ərizəni elektron imza ilə təsdiq edərək, EKTİS-dəki şəxsi kabinetləri vasitəsilə Nazirliyə təqdim edirlər. Ərizə EKTİS-də müəyyən edilmiş elektron sənəd formasında "Elektron imza və elektron sənəd haqqında" Azərbaycan Respublikası Qanununun tələblərinə uyğun olaraq yaradılır. Nazirlik ərizəçilərdən daxil olmuş sənədləri (məlumatları) ərizələrin qəbulu müddəti başa çatdıqdan sonra 3 (üç) iş günü müddətində Komissiyaya təqdim edir. Sənədlər (məlumatlar) Komissiyaya təqdim edildikdən sonra Komissiya tərəfindən 5 (beş) iş günü müddətində həmin sənədlərin (məlumatların) tamlığı və düzgünlüyü araşdırılır. Sənədlərdə (məlumatlarda) aradan qaldırılması mümkün olan çatışmazlıqlar aşkar edildikdə, həmin çatışmazlıqların 2 (iki) iş günü müddətində aradan qaldırılması ilə bağlı ərizəçinin şəxsi kabinetinə bildiriş göndərilir.

4.2. Sənədlər tam və düzgün təqdim edildikdə Komissiya ərizəçinin müsabiqə iştirakçısı hesab olunmasına dair qərar qəbul edir və qərar qəbul edildiyi tarixdən 1 (bir) iş günü müddətində bu barədə ərizəçinin EKTİS-dəki şəxsi kabinetinə bildiriş göndərilməsini təmin edir.

4.3. Ərizəçinin iştirakçı hesab olunması barədə qərar qəbul edildikdən sonra təqdim etdiyi sənədlərdə (məlumatlarda) hər hansı dəyişiklik edilə bilməz.

4.4. Aşağıdakı hallarda ərizəçi müsabiqəyə buraxılmır:

4.4.1. müsabiqədə iştirak üçün ərizə və digər sənədlər (məlumatlar) müsabiqə keçirilməsi haqqında elanda göstərilən müddət bitdikdən sonra təqdim edildikdə;

4.4.2. sənədlərdə (məlumatlarda) olan çatışmazlıqlar bu Qaydaların 4.1-ci bəndi ilə müəyyən edilmiş müddətdə aradan qaldırılmadıqda.

4.5. Müsabiqəyə buraxılmayan ərizəçinin şəxsi kabinetinə bu Qaydaların 4.1-ci bəndində sənədlərin araşdırılması üçün nəzərdə tutulmuş müddət başa çatdıqdan sonra Komissiya tərəfindən qərar qəbul edilərək, 1 (bir) iş günü müddətində bu barədə bildiriş göndərilməsi təmin olunur.

4.6. Müsabiqə aşağıdakı hallarda baş tutmamış hesab edilir:

4.6.1. müsabiqədə iştirak etmək üçün müraciət olunmadıqda;

4.6.2. müsabiqədə iştirak etmək üçün ərizə vermiş bütün ərizəçilər müsabiqənin keçirilməsinədək və ya müsabiqə zamanı müsabiqədən imtina etdikdə;

4.6.3. ərizəçilərin heç biri iştirakçı kimi tanınmadıqda (müsabiqəyə buraxılmadıqda);

4.6.4. müsabiqədə bir ərizəçi iştirak etdikdə.

4.7. Müsabiqə bu Qaydaların 4.1-ci bəndində sənədlərin və məlumatların araşdırılması ilə bağlı nəzərdə tutulmuş müddət (çatışmazlıqların aradan qaldırılması üçün verilmiş müddət nəzərə alınmaqla) başa çatdıqdan sonra 30 (otuz) gün müddətində keçirilir.

4.8. Komissiya müsabiqə iştirakçılarının investisiya layihələri ilə bağlı təkliflərinə bu Qaydaların 4.10-cu bəndi ilə müəyyən edilmiş meyarları rəhbər tutaraq baxır.

4.9. Təklif edilən investisiya layihəsində aşağıdakı məlumatlar və tələblər (şərtlər) nəzərdə tutulmalıdır:

4.9.1. layihənin məqsədləri və mərhələli şəkildə icra müddəti göstərilməklə, layihənin təşkilati planı (o cümlədən istehsal və maliyyə planları), habelə ərizəçi haqqında bu Qaydaların 2.4.6.3-cü və 2.4.6.5-ci abzaslarında qeyd edilən məlumatlar;

4.9.2. satış bazarının xarakteristikası (o cümlədən istehsal ediləcək məhsulların xarici bazarlara çıxış imkanları);

4.9.3. məşğulluğun təmin edilməsi ilə bağlı həyata keçiriləcək tədbirlər, yaradılacaq iş yerləri, habelə layihənin icrası zamanı yerli resurslardan (yerli işçi qüvvəsindən (işğaldan azad edilmiş kəndlərdə və qəsəbələrdə məskunlaşan və yaşayan şəxslərdən), mal, iş və xidmətlərdən) istifadə edilməsi;

4.9.4. layihənin həyata keçirilməsi zamanı aqrar sığorta sisteminin tətbiq edilməsi;

4.9.5. istehsal üçün tələb olunan avadanlıq haqqında məlumatlar (o cümlədən məhsulun saxlanılması üçün elevatorlar (taxıl siloları) və soyuq hava depoları);

4.9.6. layihə ilə bağlı növbəti illərdə kreditə tələbatın dövrlər üzrə bölgüsü (aylar və illər üzrə ehtiyac olan kredit məbləğlərini göstərən qrafik);

4.9.7. layihə üzrə risklərin qiymətləndirilməsi;

4.9.8. layihənin icrasının ətraf mühitə, torpaqların münbitliyinə mənfi təsirlərinin qarşısının alınması, ekoloji risk səviyyəsinin azaldılması üçün həyata keçiriləcək tədbirlər, habelə yaşıl texnologiyaların tətbiq edilməsi;

4.9.9. intensiv əkinçilik layihəsi ilə bağlı (bu Qaydaların 4.9.1—4.9.8-ci yarımbəndlərində qeyd olunan məlumatlardan əlavə) aşağıdakı məlumatlar və tələblər (şərtlər):

4.9.9.1. əkin üçün seçilmiş bitkilərin, torpaq-iqlim şəraiti nəzərə alınmaqla müəyyən edilmiş bölgənin ixtisaslaşmasına uyğun olması;

4.9.9.2. sertifikatlı toxumlardan istifadə edilməsi;

4.9.9.3. ekoloji təmiz və digər kənd təsərrüfatı məhsullarının istehsalına dair beynəlxalq sertifikatın olması;

4.9.9.4. növbəli əkin metodundan istifadə edilməsi;

4.9.9.5. "Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında" Azərbaycan Respublikası Prezidentinin 2018-ci il 19 dekabr tarixli 413 nömrəli Fərmanına uyğun olaraq siyahısı Nazirlik tərəfindən müəyyən edilən aqrar sahədə güzəşt tətbiq olunan müasir suvarma sistemlərindən istifadə edilməsi;

4.9.9.6. torpaq-iqlim şəraitinə uyğun olan, habelə resursqoruyucu və digər ağıllı kənd təsərrüfatı texnologiyalarından istifadə edilməsi;

4.9.10. intensiv bağçılıq layihələri ilə bağlı (bu Qaydaların 4.9.1—4.9.8-ci yarımbəndlərində qeyd olunan məlumatlardan əlavə) aşağıdakı məlumatlar və tələblər (şərtlər):

4.9.10.1. alma bağlarında bir hektarda azı 2250 ədəd, armud və heyva bağlarında bir hektarda azı 1250 ədəd, süfrə sortu üzüm bağlarında bir hektarda azı 2500 ədəd, texniki sort üzüm bağlarında bir hektarda azı 3000 ədəd tingin dirək sistemində (dəmir, beton, profil və s.) əkilməsi;

4.9.10.2. çəyirdəkli (gilas, şaftalı, nektarin, ərik, gavalı) meyvə bağlarında bir hektarda azı 650 ədəd, fındıq bağlarında bir hektarda azı 500 ədəd, digər qərzəkli meyvə bağlarında bir hektarda azı 350 ədəd, nar və zeytun bağlarında bir hektarda azı 650 ədəd tingin əkilməsi;

4.9.10.3. "Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında" Azərbaycan Respublikası Prezidentinin 2018-ci il 19 dekabr tarixli 413 nömrəli Fərmanına uyğun olaraq siyahısı Nazirlik tərəfindən müəyyən edilən aqrar sahədə güzəşt tətbiq olunan müasir suvarma sistemlərindən istifadə edilməsi;

4.9.10.4. beynəlxalq sertifikatlı və ya xəstəlik və zərərvericilərdən azad olması akkreditasiyadan keçmiş laboratoriya tərəfindən təsdiqlənmiş tinglərdən istifadə edilməsi;

4.9.10.5. dolu riski mövcud olan ərazilərdə dolu əleyhinə avadanlıqla təchiz edilmə;

4.9.10.6. müasir texnologiya və metodikalardan (texnika izləmə, iqlim məlumatlarının toplanılması və analizi, suvarmaya nəzarət, inteqrasiya olunmuş mübarizə metodları və s.) istifadə edilməsi;

4.9.11. intensiv heyvandarlıq təsərrüfatları layihələri ilə bağlı (bu Qaydaların 4.9.1—4.9.8-ci yarımbəndlərində qeyd olunan məlumatlardan əlavə) aşağıdakı məlumatlar və tələblər (şərtlər):

4.9.11.1. iribuynuzlu heyvandarlıq təsərrüfatları üzrə azı 80 baş damazlıq inəyin və ya 50 baş ana camışın olması, habelə damazlıq istiqamətli təsərrüfatlarda inək, düyə və camış düyəsinin 100 faizinin süni mayalandırılması;

4.9.11.2. xırdabuynuzlu heyvandarlıq təsərrüfatları üzrə azı 500 baş ana qoyun və şişəyin və ya 200 baş ana keçi və küvərin olması;

4.9.11.3. yumurtalıq istiqamətli quşçuluq təsərrüfatları üzrə azı 50000 baş, ətlik-yumurtalıq istiqamətli quşçuluq təsərrüfatları üzrə azı 25000 baş, ətlik istiqamətli quşçuluq təsərrüfatları üzrə azı 20000 baş kənd təsərrüfatı quşlarının yetişdirilməsi;

4.9.11.4. arıçılıq təsərrüfatları üzrə azı 150 vahid arı ailəsinin (pətək) olması;

4.9.11.5. donuzçuluq təsərrüfatları üzrə azı 100 baş ana donuzun olması;

4.9.11.6. təkdırnaqlı heyvandarlıq təsərrüfatları üzrə azı 30 baş madyanın və 10 baş ayğırın olması;

4.9.11.7. xəzdərili heyvandarlıq təsərrüfatları üzrə azı 50 baş ana xəzdərili heyvanın olması;

4.9.11.8. dovşançılıq təsərrüfatı üzrə azı 50 baş ana dovşanın olması;

4.9.11.9. heyvandarlıq təsərrüfatında zootexniki tələblərə və baytarlıq tələblərinə cavab verən mexanikləşdirilmiş tövlə, köməkçi bina, karantin izolyatoru, müalicəxana, dərman və dezinfeksiya maddələrinin saxlanılması üçün anbar, yem istehsalı sexi (və ya təsərrüfatı yemlə təmin edən digər infrastruktur), habelə ventilyasiya sisteminin olması;

4.9.11.10. bütün heyvanların identikləşdirilməsi, hərəkətinin izlənilməsi və hesabatlılığın təmin olunması üçün müasir elektronlaşdırılmış idarəetmə sisteminin olması;

4.9.11.11. yem bazasının (qüvvəli, qaba və sulu-şirəli yemə tələbat nəzərə alınmaqla) təşkil edilməsi və müvafiq kənd təsərrüfatı texnikasının olması.

4.10. Təklif edilən investisiya layihələri bu Qaydalara əlavəyə uyğun olaraq aşağıdakı meyarlar üzrə qiymətləndirilir və ən yüksək nəticə əldə etmiş iştirakçı müsabiqənin qalibi hesab olunur:

4.10.1. layihənin bu Qaydaların 4.9-cu bəndində müəyyən edilmiş tələblərə (şərtlərə) uyğunluğu;

4.10.2. layihənin iqtisadi səmərəliliyi, o cümlədən torpaqların hər hektarı üzrə qoyulacaq investisiyaya münasibətdə yaradılacaq əlavə dəyər (layihənin dəyər zəncirini ehtiva etməsi);

4.10.3. ərizəçinin Azərbaycan Respublikasında vergilər və ya digər icbari ödənişlər üzrə vaxtı keçmiş öhdəliklərinin olmaması (habelə riskli vergi ödəyicisi olmaması);

4.10.4. ərizəçinin müvafiq fəaliyyət və ya oxşar layihələrin icrası sahəsində təcrübəyə malik olması;

4.10.5. layihənin icrası zamanı yarana biləcək maliyyə riskləri, o cümlədən ərizəçinin layihənin həyata keçirilməsi üçün maliyyə resurslarına və (və ya) həmin maliyyə resurslarını cəlb etmək imkanına malik olması;

4.10.6. ərizəçinin idarəetmə imkanlarına, biliyə, innovasiyaya və texnologiyalara və ya onların hazırlanması və ya cəlb edilməsi imkanlarına malik olması;

4.10.7. bu Qaydaların 4.10.1— 4.10.6-cı yarımbəndlərində göstərilən meyarlar üzrə qiymətləndirmə nəticələri bərabər olduğu təqdirdə, investisiya qoyuluşu nəzərdə tutulan inzibati ərazi dairəsində doğulmuş və ya qeydiyyatda olan ərizəçiyə (habelə həmin inzibati ərazi dairəsində dövlət qeydiyyatına alınmış və hüquqi ünvanı həmin ərazidə yerləşən (və ya faktiki olaraq həmin ərazidə fəaliyyət göstərən) hüquqi şəxsə) üstünlük verilməsi.

4.11. İnvestisiya layihələrinin qiymətləndirilməsi meyarlarının mühümlük dərəcəsi (xüsusi çəkisi) hər bir layihənin istiqamətinə uyğun olaraq Komissiya tərəfindən ayrıayrılıqda müəyyən edilir. 4.12. Müsabiqənin başa çatdığı gündən 2 (iki) iş günü müddətində, müsabiqənin nəticələri haqqında aşağıdakılar barədə məlumatlar qeyd edilməklə, Komissiya tərəfindən 2 (iki) nüsxədə protokol tərtib olunur və Komissiyanın sədri, onun iclasında iştirak edən üzvləri və müsabiqənin qalibi tərəfindən imzalanır:

4.12.1. müsabiqənin qalibi;

4.12.2. qalib gəlmiş investisiya layihəsinin həcmi və istiqamətləri;

4.12.3. investisiya layihəsinin həyata keçirilmə müddəti;

4.12.4. protokolun tərtib olunma yeri və tarixi.

4.13. Müsabiqənin başa çatdığı gündən 1 (bir) iş günü müddətində müsabiqənin nəticələri barədə müsabiqə iştirakçılarının şəxsi kabinetinə bildiriş göndərilir. 4.14. Təsdiq edilmiş protokolun bir nüsxəsi Nazirlikdə saxlanılır, digər nüsxəsi isə müsabiqənin qalibinə təqdim olunur.

4.15. Bu Qaydaların 4.12-ci bəndində nəzərdə tutulmuş protokol "Azərbaycan Respublikasının işğaldan azad edilmiş ərazilərində kənd təsərrüfatı təyinatlı torpaqların idarə edilməsi ilə bağlı bəzi məsələlər haqqında" Azərbaycan Respublikası Prezidentinin 2021-ci il 27 aprel tarixli 1323 nömrəli Fərmanına uyğun olaraq, torpaqlar barədə icarə müqaviləsinin bağlanılması üçün əsasdır.

4.16. Müsabiqənin nəticələri haqqında protokol təsdiq edildiyi gündən 20 (iyirmi) gün müddətində müsabiqənin qalibi EKTİS vasitəsilə elektron imzadan istifadə edilməklə elektron sənəd formasında Nazirliklə ilkin olaraq 5 (beş) il müddətinə icarə müqaviləsi imzalayır. Həmin müddətin sonunda bu Qaydaların 5-ci hissəsinə uyğun olaraq həyata keçirilən nəzarət tədbirlərinə əsasən, müsabiqə qalibinin bu Qaydaların və icarə müqaviləsinin tələblərinə əməl etdiyi (o cümlədən torpaqlardan səmərəli istifadə etdiyi) müəyyən edildikdə, icarə müqaviləsinin müddəti əlavə 44 (qırx dörd) ilədək uzadılır.

4.17. Müsabiqənin qalibi protokolu və ya icarə müqaviləsini imzalamaqdan imtina etdikdə və ya bu Qaydaların müvafiq olaraq 4.12-ci və 4.16-cı bəndləri ilə müəyyən olunmuş müddətdə imzalamadıqda, növbəti investisiya müsabiqələrinə buraxılmır və bu zaman müsabiqənin nəticələrinin ləğvi barədə Komissiya tərəfindən protokol tərtib edilir.

4.18. Bu Qaydaların 4.6.3-cü və 4.6.4-cü yarımbəndlərində göstərilən əsaslarla müsabiqənin baş tutmamış hesab edildiyi hallar istisna olmaqla, iştirak haqqı geri qaytarılmır. İştirak haqqının geri qaytarılmasına əsas olan hallarda iştirak haqqı 7 (yeddi) iş günü müddətində Nazirlik tərəfindən geri ödənilir.

4.19. Müsabiqə qalibinin bu Qaydaların 4.16-cı bəndinə uyğun olaraq bağladığı icarə müqaviləsinə əsasən icarəyə götürülmüş torpaqların subicarəyə verilməsinə yol verilmir.

4.20. Bu Qaydaların 4.16-cı bəndində nəzərdə tutulan müqavilə əsasında müvafiq infrastrukturun qurulması üçün tələb olunan torpaq sahəsinin ayrılması (kənd təsərrüfatı təyinatlı torpaqlar istisna olmaqla) "İşğaldan azad edilmiş ərazilərdə şəhərsalma fəaliyyəti sahəsində idarəetmə ilə bağlı bəzi məsələlər haqqında" Azərbaycan Respublikası Prezidentinin 2021-ci il 18 mart tarixli 1304 nömrəli Fərmanına uyğun olaraq həyata keçirilir.

5. İnvestisiya qoyuluşu üzrə öhdəliklərin yerinə yetirilməsinə nəzarət

5.1. Müsabiqənin qalibi müqavilə üzrə investisiya layihəsinin icrasına başlanıldığı tarixdən etibarən, bu Qaydaların 4.9.1-ci yarımbəndində nəzərdə tutulmuş təşkilati plana əsasən, hər mərhələnin yekununa dair hesabatı növbəti ayın 10-dək EKTİS vasitəsilə Nazirliyə təqdim etməlidir.

5.2. Bu Qaydaların 5.1-ci bəndi nəzərə alınmaqla, müqavilə ilə investisiya qoyuluşu üzrə nəzərdə tutulan öhdəliklər və investisiya proqramı tam yerinə yetirildikdən sonra müsabiqənin qalibi bütün müqavilə müddətini əhatə edən və müstəqil auditorun təsdiqlədiyi yekun hesabatı hazırlayıb EKTİS vasitəsilə Nazirliyə təqdim edir.

5.3. İnvestisiya layihəsinin xüsusiyyətləri nəzərə alınmaqla, bu Qaydaların 5.1-ci və 5.2-ci bəndlərində nəzərdə tutulan hesabatlara öhdəliklərin yerinə yetirilməsini təsdiq edən sənədlər əlavə olunur və hesabatlarda qeyd olunan məlumatların doğruluğuna görə müsabiqənin qalibi, bu Qaydaların 5.2-ci bəndində nəzərdə tutulmuş yekun hesabata münasibətdə isə həmçinin auditor məsuliyyət daşıyır.

5.4. İcarə müqaviləsinə qanunda və müqavilədə nəzərdə tutulmuş hallarda xitam verilir.

"Azərbaycan Respublikasının işğaldan azad edilmiş ərazilərində kənd təsərrüfatı təyinatlı torpaqların sahibkarlıq subyektlərinə icarəyə verilməsi üzrə investisiya müsabiqələrinin keçirilməsi Qaydaları"na əlavə İnvestisiya layihələrinin qiymətləndirilməsi balları Sıra №-si Meyarlar Meyarların mühümlük dərəcəsi (%-lə) Qiymətləndirilmə balları Uyğun deyil (nəzərə alınmayıb) Qismən uyğundur (qismən nəzərə alınıb) Əsasən uyğundur (əsasən nəzərə alınıb) Uyğundur (nəzərə alınıb) Tam uyğundur (tam nəzərə alınıb) 0 2 3 4 5

1. Meyar 1.

2. Meyar 2.

3. ...

Yekun: Qeyd. İnvestisiya layihəsi meyarlara 10%-dək uyğun olduqda "0", 11−20% uyğun olduqda "2", 21−60% uyğun olduqda "3", 61−80% uyğun olduqda "4", 81−100% aralığında uyğun olduqda "5" balla qiymətləndirilir.