Azərbaycan Republikası Nazirlər Kabinetinin 2024-cü il " 21 " noyabr tarixli 488 nömrəli Qərarı ilə təsdiq edilmişdir. Poçt rabitəsinin milli operatorunun qəbul etdiyi poçt əmanətlərinin və poçt hesablarının qalıq vəsaitlərinin idarə edilməsi üzrə İNVESTİSİYA STRATEGİYASI
1. Vəsaitlərin idarə edilməsinin məqsədi və prinsipləri
1.1. Poçt rabitəsinin milli operatoru (bundan sonra — milli operator) tərəfindən investisiya portfelinin idarə edilməsinin məqsədi maliyyə xidmətləri sahəsində nəzarətedici qurum tərəfindən müəyyən edilmiş prudensial və likvidlik tələbləri təmin edilmək şərtilə investisiya gəlirinin əldə edilməsidir.
1.2. Milli operator investisiya portfelini prioritetlik nəzərə alınmaqla təhlükəsizlik, likvidlik və gəlirlilik prinsipləri əsasında idarə edir.
1.3. Milli operator investisiya portfelinin idarə edilməsində aktiv-passiv yanaşmasını tətbiq edir.
2. İnvestisiya portfelinin həcmi
2.1. Milli operatorun investisiya portfelinin maksimal həcmi sonuncu prudensial hesabata əsasən milli operatorun likvid aktivləri ilə prudensial normativlərlə müəyyən olunan ani likvidlik əmsalı əsasında hesablanmış likvid aktivlər arasındakı fərq kimi müəyyənləşdirilir.
2.2. İnvestisiya portfeli milli operatorun qəbul etdiyi poçt əmanətləri və poçt hesablarının qalıq vəsaitləri hesabına formalaşır.
3. İnvestisiya portfelinin valyuta strukturu
3.1. İnvestisiya portfelinin valyuta strukturu vəsaitlərin valyuta strukturuna müvafiq olaraq milli valyutada və xarici valyutada formalaşdırılır.
3.2. Milli operatorun valyuta mövqeyi tələblərinə müvafiq olaraq xarici valyutada investisiya portfelini sərbəst dönərli xarici valyutalar təşkil edir. Sərbəst dönərli xarici valyutaya aid edilməyən digər xarici valyutalar investisiya portfelinin tərkibinə daxil edilə bilməz.
3.3. Xarici valyutada investisiya portfelinin baza valyutası ABŞ dolları müəyyən edilir.
4. İnvestisiya portfeli üzrə məqbul investisiya alətləri
4.1. İnvestisiya portfeli daxili və beynəlxalq maliyyə bazarlarında buraxılan maliyyə alətlərinə investisiya edilə bilər.
4.2. İnvestisiya portfeli Azərbaycan manatında ifadə olunan aşağıdakı maliyyə alətlərinə investisiya edilir:
4.2.1. Azərbaycanın dövlət borc qiymətli kağızları və dövlət zəmanəti ilə təmin edilərək emissiya edilən borc qiymətli kağızları;
4.2.2. yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) beynəlxalq maliyyə təşkilatları tərəfindən buraxılmış borc qiymətli kağızları;
4.2.3. paylarının (səhmlərinin) nəzarət zərfi Azərbaycan Dövlətinə məxsus olan və maliyyə hesabatlarının Beynəlxalq Mühasibat Uçotu Standartlarına uyğunluğu mötəbər kənar audit təşkilatları tərəfindən təhlil olunaraq ictimaiyyətə açıqlanan emitentlər tərəfindən buraxılmış borc qiymətli kağızları;
4.2.4. beynəlxalq reytinq agentlikləri tərəfindən verilmiş kredit reytinqi Azərbaycan Respublikasının suveren borc reytinqindən maksimum 3 pillə aşağı olan yerli banklarda depozitlər.
4.3. İnvestisiya portfeli xarici valyutada ifadə olunan aşağıdakı maliyyə alətlərinə investisiya edilir:
4.3.1. beynəlxalq reytinq agentlikləri tərəfindən verilmiş kredit reytinqi Azərbaycanın suveren borc reytinqindən maksimum 3 pillə aşağı olan yerli emitentlərin xarici valyutada emissiya etdikləri borc qiymətli kağızları və yerli banklarda yerləşdirilmiş depozitlər;
4.3.2. yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) xarici ölkələrin dövlət borc qiymətli kağızları, dövlət zəmanətləri ilə təmin edilərək emissiya edilən qiymətli kağızlara;
4.3.3. xarici ölkələrin birbaşa dövlət zəmanəti ilə təmin edilməyən yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) digər dövlət təsisatları və yerli özünü idarəetmə orqanları, dövlət agentlikləri tərəfindən emissiya edilən borc qiymətli kağızları;
4.3.4. yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) beynəlxalq maliyyə təşkilatları tərəfindən emissiya edilən borc qiymətli kağızları;
4.3.5. yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) xarici kommersiya təşkilatları tərəfindən emissiya edilən borc qiymətli kağızları;
4.3.6. xarici ölkələrin yüksək kredit reytinqinə malik (A+ və daha yüksək və ya buna ekvivalent digər reytinq dərəcəsinə) banklarında yerləşdirilən depozitlərə.
5. İnvestisiya portfelinin risklərinin idarə edilməsi üzrə tələblər
5.1. İnvestisiya portfelinin risklərinin idarə edilməsi məqsədilə aşağıdakı kredit, konsentrasiya (təmərküzləşmə), likvidlik və faiz dərəcəsi riskləri üzrə tələblər müəyyənləşdirilir:
5.1.1. kredit riski maliyyə alətlərinə və kontragentlərə beynəlxalq kredit reytinqi agentlikləri tərəfindən verilmiş kredit reytinqləri üzrə minimum tələblərin müəyyən edilməsi əsasında idarə olunur;
5.1.2. konsentrasiya (təmərküzləşmə) riski milli operator tərəfindən müəyyən maliyyə alətinə və ya kontragentə investisiya olunan vəsaitin maksimal məbləğinə məhdudiyyətlər tətbiq edilməklə investisiya portfelinin diversifikasiyasını təmin edir;
5.1.3. likvidlik riski milli operatorun öhdəliklərinin tam və vaxtında yerinə yetirilməsini təmin etmək üçün likvid aktivlərin seçilməsi və investisiyaların müddət üzrə bölgüsünün müəyyənləşdirilməsi ilə idarə olunur;
5.1.4. faiz dərəcəsi riski investisiya portfelinin maksimum müddətinin (dürasiyasının) və ya öhdəliklərin orta müddətindən kənarlaşmaların müəyyənləşdirilməsi ilə idarə olunur.
5.2. Azərbaycanın və xarici ölkələrin dövlət borc qiymətli kağızları və dövlət zəmanəti ilə təmin edilərək emissiya edilən qiymətli kağızlar istisna olmaqla, bir maliyyə alətinə və ya bir kontragentə investisiya olunan vəsaitin maksimal məbləği müvafiq valyutada olan investisiya subportfelinin 10 faizi həddində müəyyən edilir.
5.3. Borc qiymətli kağızlarının maksimum müddəti 2(iki) il, depozitlər üçün isə 1(bir) il müəyyən edilir.
5.4. Milli operator yuxarıda qeyd olunan risklərlə yanaşı digər riskləri (siyasi, ölkə, əməliyyat, hüquqi və strateji) də qiymətləndirir və bunun əsasında investisiya portfeli idarə olunur.
6. Yekun müddəalar
6.1. Vəsaitlərin idarə olunması zamanı milli operatorun investisiya portfelinin bu İnvestisiya Strategiyası çərçivəsində parametrlərinin və risk tələblərinin müəyyənləşdirilməsi, idarə edilməsi, əməliyyat prosedurlarının müəyyən edilməsi və hesabatlıq sisteminin yaradılması milli operatorun müşahidə şurası tərəfindən təsdiq olunan daxili qaydalarla müəyyən edilir.
6.2. Milli operatorun investisiya portfelinin idarə edilməsi barədə hesabatı "Poçt haqqında" Azərbaycan Respublikasının Qanununa əsasən Azərbaycan Respublikasının Mərkəzi Bankına aylıq əsasda hər növbəti ayın yeddisinə kimi təqdim edilir. _____________________