AZƏRBAYCAN RESPUBLİKASININ NAZİRLƏR KABİNETİ QƏRAR "Radiotezliklərdən istifadəyə dair müqavilənin nümunəvi forması"nın təsdiq edilməsi haqqında "Telekommunikasiya haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2022-ci il 27 dekabr tarixli 768-VIQD nömrəli Qanununun tətbiqi və "Telekommunikasiya haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2005-ci il 9 avqust tarixli 277 nömrəli Fərmanında dəyişiklik edilməsi haqqında" Azərbaycan Respublikası Prezidentinin 2023-cü il 4 fevral tarixli 2022 nömrəli Fərmanının 2.1.2-ci yarımbəndinin icrasını təmin etmək məqsədilə Azərbaycan Respublikasının Nazirlər Kabineti qərara alır: "Radiotezliklərdən istifadəyə dair müqavilənin nümunəvi forması" təsdiq edilsin (əlavə olunur).
Əli Əsədov Azərbaycan Respublikasının Baş naziri Bakı şəhəri, 27 noyabr 2023-cü il № 426
Azərbaycan Respublikası Nazirlər Kabinetinin 2023-cü il 27 noyabr tarixli 426 nömrəli Qərarı ilə təsdiq edilmişdir. Radiotezliklərdən istifadəyə dair müqavilənin NÜMUNƏVİ FORMASI №______ Bakı şəhəri "_____" _________ 20___ il "Telekommunikasiya haqqında" Azərbaycan Respublikası Qanununun 13.2-2-ci maddəsinə uyğun olaraq, bir tərəfdən Azərbaycan Respublikası Rəqəmsal İnkişaf və Nəqliyyat Nazirliyinin (bundan sonra - Nazirlik) tabeliyində Dövlət Radiotezliklər İdarəsinin (bundan sonra - İcraçı) adından ____________________________________________ ____________________________________________________________ (səlahiyyətli şəxsin vəzifəsi, soyadı, adı və atasının adı) şəxsində və digər tərəfdən radiotezlik istifadəçisi (bundan sonra - İstifadəçi) adından________________________________________ ______________________________________________________ (hüquqi şəxsin tam adı, hüquqi ünvanı, onun səlahiyyətli şəxsinin vəzifəsi, soyadı, ______________________________________________________ adı və atasının adı, fiziki şəxsin soyadı, adı, atasının adı və ünvanı) şəxsində İcraçı və İstifadəçi adlandırılacaq, sonradan ayrılıqda Tərəf, birlikdə isə Tərəflər adlandırılmaqla, Radiotezliklərdən istifadəyə dair Müqaviləni (bundan sonra - Müqavilə) aşağıdakı şərtlərlə imzaladılar:
1. Müqavilənin predmeti
1.1. Bu Müqavilə İstifadəçiyə ayrılmış radiotezliklərdən və onlara köklənmiş radioelektron vasitələrindən (bundan sonra - REV) təyinatı üzrə istifadə və ödəniş şərtlərini, Tərəflərin hüquq və vəzifələrini, Müqavilənin ləğvi və dəyişdirilməsi qaydalarını və əsaslarını, habelə Müqavilənin predmetinə dair digər mühüm şərtləri tənzimləyir.
2. Tərəflərin hüquq və vəzifələri
2.1. İstifadəçinin hüquqları:
2.1.1. radiorabitə şəbəkəsinin istifadəsinə radiomaneə təsiri yarandıqda həmin radiomaneələrin aradan qaldırılmasını İcraçıdan tələb etmək;
2.1.2. beynəlxalq və ölkə səviyyəli tədbirlərin, o cümlədən idman yarışlarının keçirildiyi müddətdə radiotezlik zolaqlarından istifadə hüququ dövlət təhlükəsizliyi məqsədləri üçün müstəsna hallarda məhdudlaşdırıldıqda müvafiq tədbirin, o cümlədən idman yarışının təşkilatçısının vəsaiti hesabına kompensasiya tələb etmək.
2.2. İstifadəçinin vəzifələri:
2.2.1. radiorabitənin yaradılması üçün tələb olunan sənədləri və istifadə olunacaq REV-in təsdiqlənmiş anketlərini İcraçıya təqdim etmək;
2.2.2. radiotezliklərdən və REV-dən ən səmərəli və optimal şəkildə istifadəni təmin etmək və bu işi daimi təkmilləşdirmək;
2.2.3. radiorabitə şəbəkəsində olan bütün dəyişikliklər haqqında İcraçıya 10 (on) iş günü müddətində məlumat vermək;
2.2.4. radiotezliklərin və REV-in istifadəsi üzrə cavabdeh şəxsi təyin etmək və bu barədə 10 (on) iş günü ərzində İcraçıya məlumat vermək;
2.2.5. radiotezliklərin və REV-in istifadəsinə verilən icazə şərtlərinə riayət etmək, onlardan icazə şərtləri daxilində istifadə olunmasını təmin etmək;
2.2.6. qüvvədə olan mövcud tariflərə uyğun ödənişləri bu Müqavilədə və qanunvericilikdə nəzərdə tutulmuş qaydada vaxtında və tam şəkildə təmin etmək;
2.2.7. ayrılmış radiotezliklərdən onların istifadəsinə icazə verilmiş ərazidə mövcud qanunvericiliyə, eyni zamanda Azərbaycan Respublikasının üzv olduğu Beynəlxalq Telekommunikasiya İttifaqının, həmçinin sahə üzrə digər beynəlxalq təşkilatların qərar və tövsiyələrinə, müvafiq standartlara uyğun radiorabitə şəbəkəsinin qurulmasına zəmanət vermək;
2.2.8. ayrılmış radiotezliklərin və İstifadəçiyə məxsus REV-in üçüncü şəxslərin istifadəsinə verilməməsini təmin etmək;
2.2.9. mülki dövriyyəsi məhdudlaşdırılmış əşyalar üçün qanunvericiliyə uyğun xüsusi icazələr almaq;
2.2.10. ayrılmış radiotezliklərdə və radiorabitə şəbəkəsində REV-dən təyinatı üzrə və səmərəli istifadəyə nəzarət üçün tələb edilən müvafiq sənədləri təqdim etmək, İcraçıya "Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında" Azərbaycan Respublikası Qanununun tələbləri nəzərə alınmaqla yerində texniki baxış keçirilməsi üçün şərait yaratmaq;
2.2.11. icazə vərəqəsi olmadan REV-in istifadəsi aşkar edilərsə, bu halda İstifadəçi həmin REV-in istifadəyə verilməsinə dair aktda göstərilən tarixdən qeydiyyata salınmaqla mövcud tariflərə uyğun hesablanmış məbləğin ödənilməsini təmin etmək;
2.2.12. REV-in istismarına verilən icazə şərtlərinin İstifadəçi tərəfindən pozulması faktları aşkar edildikdə, həmin avadanlıqların İcraçı tərəfindən möhürlənməsinə şərait yaratmaq;
2.2.13. möhürlənmiş REV-in İcraçının icazəsi olmadan möhürünün açılmasına, həmin avadanlığın satışına, təqdimetmə formasından asılı olmayaraq üçüncü şəxsə verilməsinə və yaxud balansdan çıxarılması hallarına yol verməmək;
2.2.14. İcraçı tərəfindən təqdim edilmiş müraciət əsasında və ya hər hansı REV-in istismarı dayandırıldıqda, həmin REV-in möhürlənməsinə şərait yaratmaq;
2.2.15. radiorabitə şəbəkəsində istifadə edilən REV-lər üçün qanunvericiliyə uyğun icazə vərəqələri almaq və həmin icazə vərəqələri əsasında onların istismarını təmin etmək;
2.2.16. İcraçı tərəfindən göndərilən xəbərdarlıqlara uyğun operativ tədbirlər görmək və nəticəsi barədə məlumat vermək;
2.2.17. radiomübadilə prosesində efir təhlükəsizliyini təmin etmək;
2.2.18. radiorabitə şəbəkəsinin istifadəsini fəaliyyətdə olan digər radiorabitə şəbəkələrinə radiomaneələr yaratmamaqla təşkil etmək və fəaliyyətdə olan digər radiorabitə şəbəkələrinə radiomaneə təsiri olduqda həmin radiomaneələrin aradan qaldırılmasını təmin etmək.
2.3. İcraçının hüquqları:
2.3.1. müqavilə öhdəliklərini yerinə yetirmək üçün İstifadəçidən lazım olan sənədləri və məlumatları tələb etmək;
2.3.2. REV-in istismarına "Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında" Azərbaycan Respublikasının Qanununa uyğun olaraq plan üzrə (növbəti) və ya plandankənar (növbədənkənar) texniki baxışlar keçirmək;
2.3.3. İstifadəçi tərəfindən müqavilə öhdəlikləri pozulduğu və texniki baxış zamanı qeydiyyatsız REV aşkarlandıqda qanunvericiliyə uyğun olaraq həmin REV-in istifadəsinə qadağa qoymaq və istismarını dayandırmaq məqsədilə möhürləmək;
2.3.4. texniki baxış zamanı tərtib olunmuş aktı təhlil etmək və aktda qeyd olunan çatışmazlıqların aradan qaldırılmasını tələb etmək;
2.3.5. beynəlxalq və ölkə səviyyəli tədbirlərin, o cümlədən idman yarışlarının keçirildiyi müddətdə radiotezlik zolaqlarından istifadə hüququnu Azərbaycan Respublikası Dövlət Təhlükəsizliyi Xidmətinin təklifi ilə dövlət təhlükəsizliyi məqsədləri üçün müstəsna hallarda məhdudlaşdırmaq;
2.3.6. radiorabitə şəbəkəsinin istifadəsi fəaliyyətdə olan digər radiorabitə şəbəkələrinin istifadəsinə radiomaneələr yaratdıqda, həmin radiomaneələrin aradan qaldırılmasını İstifadəçidən tələb etmək;
2.3.7. radiotezliklərdən və REV-dən səmərəli və optimal şəkildə istifadənin təmin edilməsini və bu işin daimi təkmilləşdirilməsini tələb etmək.
2.4. İcraçının vəzifələri:
2.4.1. radiotezliklərin istifadəsinə müvafiq olaraq yayım tezlikləri üzrə Azərbaycan Respublikasının Audiovizual Şurası tərəfindən, digər tezliklər üzrə isə Azərbaycan Respublikasının Radiotezliklər üzrə Dövlət Komissiyası (bundan sonra - Dövlət Komissiyası) tərəfindən İstifadəçiyə ayrılmış radiotezliklər (zolaqlar) çərçivəsində konkret tezlik nominallarını (kanallarını) təyin etmək və qeydiyyata almaq;
2.4.2. ödənişlər tam aparıldıqdan sonra REV-in istismarı üçün icazə vərəqəsi vermək;
2.4.3. ayrılmış radiotezliklərin və həmin radiotezliklərdə işləyən REV-in qeydiyyatını aparmaq;
2.4.4. radiorabitə şəbəkəsinə təsir edən radiomaneə mənbələrini İstifadəçinin rəsmi müraciətinə əsasən araşdırmaq və onun aradan qaldırılması üzrə qanunvericiliyə uyğun tədbirlər həyata keçirmək;
2.4.5. radiotezliklərdən təyinatı və ərazi üzrə düzgün istifadə olunmasına nəzarət etmək;
2.4.6. İstifadəçi tərəfindən təqdim edilmiş müraciət əsasında hər hansı REV-in istismarı dayandırıldıqda, həmin REV-in möhürlənməsini təmin etmək;
2.4.7. İstifadəçi tərəfindən radiorabitə vasitələrinin istismarı şərtlərinin pozulması faktları (bu faktlar avadanlığın qeydə alınmış texniki parametrlərinin kənaraçıxmaları ilə əlaqədar baş verdiyi halda da) aşkar edildikdə, həmin avadanlıqların istismarına verilən icazələrə məhdudiyyət qoymaq və ya onları ləğv etmək;
2.4.8. İstifadəçi tərəfindən öhdəliklərin pozulduğu hallarda ona məxsus REV-in istismarını dayandırmaq və möhürlənməsini aparmaq;
2.4.9. radiotezliklərdən istifadəyə görə tezlik nominalları üçün mövcud tariflərə uyğun 2 (iki) il müddətində ödənişlər tam aparılmadıqda və ya ayrılmış radiotezliklərdən 3 (üç) ay müddətində istifadə edilmədikdə radiotezliklərin geri alınması barədə Dövlət Komissiyası qarşısında məsələ qaldırmaq;
2.4.10. REV-dən və yüksəktezlikli qurğulardan səmərəli istifadə olunmasını təmin etmək üçün zəruri tədbirlər görmək.
3. Radiospektr idarəçisi ilə münasibətlərin tənzimlənməsi
3.1. Tərəflər Nazirliyin tabeliyində İnformasiya Kommunikasiya Texnologiyaları Agentliyi (bundan sonra - Agentlik) tərəfindən radiospektr idarəçiliyi ilə bağlı tələb edilən məlumat və sənədləri, Agentliyin müəyyən etdiyi formada və dövriliklə, dövrilik təyin edilmədiyi halda belə tələb daxil olduğu gündən ən geci 15 (on beş) iş günü müddətində, Agentlik tərəfindən təcili hesab edildiyi halda isə 5 (beş) iş günündən gec olmayaraq Agentliyə təqdim etməli, radiospektr idarəçiliyi ilə bağlı qanunvericiliklə müəyyən edilmiş tələblərin yerinə yetirilməsini təmin etməlidirlər.
4. Müqavilənin dəyəri, radiotezliklərdən istifadə və ödəniş şərtləri
4.1. İcraçının göstərdiyi xidmətlərin dəyəri İstifadəçinin bu Müqavilə ilə İcraçıya təqdim etdiyi anket sənədlərinə və qüvvədə olan mövcud tariflərə uyğun hesablanır.
4.2. İstifadəçi İcraçı tərəfindən ona bu Müqavilə üzrə təqdim olunmuş hesab-faktura əsasında ödənişləri 10 (on) iş günü müddətində təmin edir.
4.3. İstifadəçi tərəfindən bu Müqavilənin 4.2-ci bəndində nəzərdə tutulan müddətdə ödəniş təmin olunmadığı halda, İcraçı birtərəfli qaydada dəbbə pulu (cərimə və ya penya) tətbiq edə bilər.
4.4. İstifadəçi tərəfindən ödənişin aparılması gecikdirildiyi halda, hər gecikdirilmiş gün üçün ödənilməyən məbləğin ___ faizi həcmində penya hesablanır və İstifadəçi tərəfindən İcraçıya ödənilir.
Hesablanan penyanın ümumi məbləği illik ödənilməli məbləğin 10 faizindən artıq olmamalıdır.
4.5. Radiotezliklərdən istifadə Azərbaycan Respublikası Nazirlər Kabinetinin 2007-ci il 1 fevral tarixli 22 nömrəli Qərarı ilə təsdiq edilmiş "Radiotezliklərin ayrılması, qeydiyyatı, istifadəsi və ödənişlərin təyin olunması Qaydaları"na uyğun həyata keçirilir.
5. Vergilər və rüsumlar
5.1. Tərəflər Azərbaycan Respublikasının qanunlarına uyğun olaraq bütün vergilərin, rüsumların və digər ödənişlərin ödənilməsini təmin edirlər.
6. Fors-major
6.1. Bu Müqavilənin icrasına fors-major hallar təsir göstərərsə, Tərəflər bu Müqavilə üzrə öhdəliklərinin icra edilməməsi üçün məsuliyyət daşımırlar.
6.2. Fors-major hallara Tərəflər tərəfindən nəzarət edilməyən, onların səhvi və ya laqeydliyi nəticəsində baş verməyən, əvvəlcədən nəzərdə tutulması mümkün olmayan hadisələr aid edilir. Bunlara hərbi və silahlı münaqişələr, epidemiyalar, epizootiyalar, karantinlər, daşqınlar, zəlzələlər, digər fövqəladə hallar, embarqolar, həmçinin Müqavilənin şərtlərinə təsir edən qanunvericilikdə edilən əhəmiyyətli dəyişikliklər, dövlət orqanlarının (qurumlarının) qərarları aid edilir.
7. Mübahisələrin həlli
7.1. Tərəflər arasında yaranan fikir ayrılığı və ya mübahisələr bir qayda olaraq danışıqlar vasitəsilə həll edilir.
7.2. Tərəflər arasında yaranan fikir ayrılığı və ya mübahisələrin danışıqlar vasitəsilə həll edilməsi mümkün olmadıqda, Azərbaycan Respublikasının mövcud qanunvericiliyinə uyğun olaraq məhkəmə yolu ilə həll edilir.
7.3. Bu Müqavilə ilə tənzimlənməyən digər məsələlərin həllində Azərbaycan Respublikasının qanunvericiliyi rəhbər tutulur.
8. Müqavilənin ləğvi və dəyişdirilməsi qaydaları və əsasları, tərəflərin məsuliyyəti
8.1. Müqavilə Tərəflərin razılığı ilə və ya Tərəflərdən birinin tələbi ilə Azərbaycan Respublikasının mövcud qanunvericiliyində nəzərdə tutulmuş qaydada və əsaslarla ləğv edilə bilər.
8.2. Tərəflər bu Müqavilə üzrə yaranan öhdəliklərinin icra edilməməsinə və ya lazımi səviyyədə icra edilməməsinə görə Azərbaycan Respublikasının qanunlarına uyğun olaraq məsuliyyət daşıyırlar.
8.3. Tərəflər qarşılıqlı razılıq əsasında bu Müqaviləyə müvafiq protokollarla rəsmiləşdirilən əlavələr və dəyişikliklər edə bilərlər. Həmin əlavələr və dəyişikliklər bu Müqavilənin ayrılmaz hissəsi hesab edilir.
8.4. Tərəflər bir-birilərinə təqdim etdikləri, yaxud bu Müqavilənin icrası ilə əlaqədar iş prosesində əldə olunmuş bütün informasiyanın tam məxfiliyini təmin etməyi öz üzərilərinə götürürlər.
8.5. İcraçı tərəfindən təqdim edilmiş hesab bu Müqavilənin 4.2-ci bəndində göstərilən müddət ərzində ödənilmədikdə bu hal ödəmə şərtinin pozulması kimi qəbul edilir və verilən icazələr ləğv edilir. Eyni zamanda, İcraçı tərəfindən radiotezliklərin geri alınması üçün aidiyyəti üzrə tədbirlər görülür.
9. Yekun müddəalar
9.1. Müqavilə imzalandığı gündən qüvvəyə minir və radiotezliklərin ayrılması haqqında qərarın qüvvədə olduğu müddət ərzində qüvvədədir.
9.2. Bu Müqavilə Azərbaycan dilində eyni hüquqi qüvvəyə malik olan iki nüsxədə tərtib olunmuşdur və bir nüsxəsi İcraçıda, digər nüsxəsi isə İstifadəçidə saxlanılır.
10. Tərəflərin ünvanları (hüquqi ünvanları) və rekvizitləri İstifadəçi _____________________ VÖEN: _______________________ Ünvan/hüquqi ünvan: ____________ S. W. I. F. T: _____________________ Bankın adı: ____________________ Bankın VÖEN-i: ________________ Bankın kodu: _________________ Hesablaşma hesabı:____________ Müxbir hesab: ________________ _________________________________ (səlahiyyətli şəxsin soyadı, adı, atasının adı) İmzası _____________ M. Y.
İcraçı ________________________ VÖEN: _______________________ Hüquqi ünvan:_________________ S. W. I. F. T: ___________________ Bankın adı: __________________ Bankın VÖEN-i: ______________ Bankın kodu: _________________ Hesablaşma hesabı: ___________ Müxbir hesab: ________________ _______________________________ (vəzifəli şəxsin vəzifəsi, soyadı, adı, atasının adı) İmzası _______________ M. Y.
___________________